1 Timoti 1
1
Pol Timoti wakai we di togwa
1-2Timoti yo, na pepa magigl bogl teiga i, na Pol, Krais Jisas dedugwa yagl moglka i, pepa i ene bogl teiga. Na Jisas dedugwa yoba moglka i, God, ye nono ere yugwa yagl moglkwa i, ya Krais Jisas ede ikne unabedi nono sugl munga yagl moglkwa i, na dedebriko, kogon i ere moglka. Te, ene motnga i, nono pre meduglara i, ene na wana kaima mere yegl motnga. Na prika, nono Neno Kade God ya Yaglno Kade Krais Jisas i, ye ene mitn gogl, ere wakai ere tedre, den mudn wida di padigl tenabredi prika.
3Na okna dumo Efesus kide kodidre, ede provins Masedonia enagledi erika igne, na ene ka gigledi di te, dumo Efesus mogl pai moglo diga i, ene pitnga. Ana na okna dimere yegl, erme ama kuno yegl di tenagledi prika. Ene dumo Efesus mogl pai moglsre, yoba tau ye ka mabuno kibi didre, pre mediglkwa yoba beke te meglkwa i, ene ye drano si kegl dinatnedi prika. 4Yoba i, ye ege ege ka kibi kane kane, kubu kaman mere yegl bekidre, ka i kaima pamedi yoba beke te meglkwa. Ye God kamo mina okna ibo yoba kagno epigl beglkwa paugwa i kandre, yoba i kogon yegl yegl erimiwedi, yene primere ka kibi tau beke idre, i God kamo dumniwe di, di meda edigwa i pre diga. Yoba ka mabuno kibi yegl ta dikraiglkwa paugwa. I siragl pre, God ye yobama mogl pai eraiglmedi prukwa i, ye kamo pre medigl moglsre, mogl pai eraiglmedi prukwa. Yegl prukwa ba yoba ka mabuno kibi i digo, ye prikwa igne, ye God kamo pre mediglkwa i, u gigle dikrukwa. Ye ka i prikwa igne, ka drano di ikne ikne edidre, nonga keme digwa.
5Te, na ene kogon dedidre, yoba tau ka kibi beke te meglkwa i, si kegl do diga i, ene yegl etn, God yobama ta moraiglkwa i, ye ka kibi i mane dibi, ye nonga dikre, deno muduno ikne ikne tenaiglkwa pre diga. Ye nomano mina God kamo kaima pre medigl moglsre, mabuno wakai ta pamedi praiglkwa i keme eribi, ye kaima deno muduno ikne ikne tenaiglkwa i kuno erabuka. 6God yobama yegl eraiglkwa paugwa ba yoba tau yegl ta erekrikwa. Ye mabuno wakai i kide kodidre, ka kibi, mem wakai ta paikrukwa i, yoba beke te meglkwa. 7Ye God lomo, Moses okna boglkwa i, beke tomga yoba munedi prikwa, ba ye yene God lomo kaima ta pre pogl sikrikwa. Ye God lomo yegl yegl dumedi, ka gigledi digwa ba ye kaima pre pogl sikrikwa pre diga.
8God lomo pre diga i, na God lomo i, kide pame dikrika. Nono prumga God lomo i, wakai paugwa ba yoba God lomo i, kogonmo kaima siragl mere pamere yegl yoba beke tebi, i swara kuno erabuka. 9Nono prumga God lomo paugwa i, yoba ta God gumuglo mina yoba du munga i pre ta paikrukwa. Ye lomo i, yoba ye kamo duglo boglkre, sedigwa i ya tadaglme yoba ye God we di prikrikwa i, kide erumiwedi praiglkwa pre paugwa. Te, yoba God mabunomo pamere erekre, di kide yei tedre, neno mano si geglkwa mo yoba pere ta si geglkwa i pre paugwa. 10Te, God lomo i, yoba ta yagl abu pere ta bogl kunogl neigwa ya yagl ta yene yagl bogl mabuno kide erikwa ya yoba ta yoba pere si kane sidre, nigl kogon yoba moraiglmedi i pi topo beglkwa i pre paugwa. Te, yoba ta ye ka kibi digwa mo yoba pere kagno yoko ere kide ere teigwa i pre paugwa. Te, God lomo i, yoba mabuno kane kane ta nono ka wakai ta yoba beke tedre, erekrio dumga i ta ere meglkwa yoba i, kide erumiwedi praiglkwa pre paugwa. 11Na ka wakai yoba beke tomne diga i, God kamo wakai ye na yoba di tenatnedi na dedugwa i pre diga. God kamo wakai swara i mina, God siragl mere wakai yene moglkwa i nono kan pogl sidre, ye swara kagie kade tenamga pamedi pre pogl sumga.
12Na ege ege Krais Jisas, nono Yaglno Kade i, di wakai yei teiga. I siragl pre ye ere mogl, Pol na kogona wakai eratniwedi kandre, kogon wakai i na eratnedi dedidre, ama yobuglo bogl narukwa. 13Na okna Jisas kagie ere kide ere tedre, ye yobama ere si, ere kide kaima ere teiga pre God na ere sinabuka paugwa ba ye na sikre, dem muduo narukwa. I siragl pre na mabuno kide yegl erika i, Jisas ira moglkwa i na pre pogl sikre, ye pre mediglkrika pre erika. 14Na okna yegl erika ba Yaglno Kade God na yoko kaima ere wakai ere narukwa i, podo kide erukwa. Te, na Krais Jisas yugobunomo mina ede suna wigo, God erme na ye kamo pre medigl pai moratnedi ake ple di narsre, te na ye yobama dena muduna tenatnedi ake ple di nare moglkwa.
15Nono ege mere dumga i, Krais Jisas ede makandigle ugwa i, ye tadaglme yoba ere inagledi umiwe dumga. Yegl dumga i, ka i kaima paugwa pre dumga. Yegl pre yoba mudu ka i kaima dimiwedi pribi, kuno erabuka. Te, tadaglme yoba meglmara suna i, na swara tadaglme podo kide ere, yoba mudu egre atne ediga. 16Na yoba kide yegl moglka ba Jisas Krais na ere sinabuka i, sikre, na ere yugwa. Ye yegl erukwa i, okuo yoba ira ta aimadi kamin kor moramnedi ye pre medraiglkwa yoba i, ye kandre, nomane inaiglkwa pre erukwa. Ye nomane inaiglkwa i, na yoba kide kaima ta moglka ba Jisas tabre na ere sikre, ye komono kana Pol ere yugwa pre ye yoba ira ta okuo ye pre medraiglkwa i ama ye ere inabuka kuno erumedi nomane yegl inaiglkwa.
17Ana God moglkwa i, ye taragl mudu Kingno moglsre, aimadi kamin mogl, goglkrabuka moglkwa. Te, ye murubuglo moglkwa pre nono yoba ye ta kankrumga. Ye swara kaima God moglkwa pre nono aimadi kamin ye debie sidre, kagie kade tenamga paugwa. Kaima.
18Ana wana Timoti yo, na ene dumo Efesus kogon eratnedi ka di teiga i, yoba tau okna ene God kogonmo yegl yegl eratnedi God kamo kep ere ene di teimere kuno yegl, ene eratnga pre diga. Na prika i, ye okna ene di teimere mere ene poglo di prise, kogon ere motn, ene soldia mere yegl mogl, Jisas kamo wakai i pre kuda wakai boratnedi prika. 19Boglsre, ene ama God kamo pre medigl pai moglsre, den mudun pogl nenabuka i, ama boratnedi prika. Yoba tau yegl ta erekrikwa pre ye pre mediglkwa i, u kide pi kodugwa. 20Yoba tau yegl erime diga i, ene pitnga, yagl suo Himeneus ya Aleksander ama yegl eribrika pre na ye si meda edidre, Satan ye ere kide ere tenabedi ye ogo mina yeiga. Na yegl erika i, Satan ye ere kide ere tenan, ye nomane idre, okuo God kagie ta ere kide erekrabrika pre si meda ediga.
Currently Selected:
1 Timoti 1: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission