1 Timoti 2
2
God yobama yoba mudu pre kamage eraiglkwa paugwa
1Ana Timoti yo, ka swara ta podo kaima paugwa pre na ene God yobama di tenatnedi prika i, yegl paugwa, ene yoba di ten, ye ege ege kamage eraiglkwa paugwa. Ye God ake ple di norabedi agle didre, ye ama di wakai yei tenaiglkwa paugwa. Ye yegl ersre, te yoba mudu pre kamage ere tenaiglkwa paugwa. 2Ye yoba mudu pre kamage ersre, ama king meglkwa i ya gavman yoba ta nono bitno meglkwa i pre ama kamage ere teo do. Ye gavman yoba i pre kamage ere tebi, gavman yoba i God nomane wakai tenan, ye nomane wakai idre, nono suglno wakai moraiglkwa. Suglno wakai meglbi, nono munara kiede moglsre, mogl atne ede, God nono mabuno wakai boraiglmedi prumere i keme bogl moramga. 3Nono yoba mudu pre kamage eramga i, wakai panabuka. Te, yegl erumun, God, nono ere yugwa moglkwa i, ama wakai kanabuka. 4I siragl pre God ye yoba mudu na kana kaima paugwa i pribi, yoba mudu ere inagledi prukwa. Yegl pre nono yoba mudu pre kamage ere tenamga paugwa.
5God swara kaima moglko, yoba ta nono auro i pi God moglmara edenabuka i ama swara kaima moglkwa. Yoba swara kaima moglkwa i, Krais Jisas pre diga. 6God ege ta paduglmere i plau dugo, Jisas yoba mudu kumapno tenagledi goglkwa. Ye goglmara i mina God ye yoba mudu ere inagledi prukwa i, i nogugl ede kodugwa. 7Te, Jisas yoba mudu pre goglkwa kamo i, na yoba di nogugl ede tenatnedi God nana dedugwa. Na diga i, kibi dikre, kaima diga. God na kogon yegl dedidre, yoba ye Juda yoba moglkre, yugobuno pere, meda ta meglkwa i God kamo kaima paugwa i beke tebo, ye pre medraiglmedi kogon yegl narukwa.
8Ana nono kamage eramga i wakai paugwa pre pre mediglkwa yoba bage bage makai simara i, yoba yagl ta moraiglkwa i yoba gumuglnomugl kamage eraiglmedi prika. Yegl eraiglmedi prika ba komono kana ye mudu meglmere God tedre, okuo kamage eraiglkwa pre diga. Te, ye yoba pere kide pre tekre, kigl nonga di tekre, kamage eraiglkwa pre diga.
Abu mabuno yegl eraiglkwa
9Ana abu we, ye kugugl gagl edenaiglkwa i, ogono nagino wakai ere si bi dinaiglmedi prika. Ye yagl no kanaiglmedi bitno yugu bai akidre, taragl gol ya bis nugu mige podo boglkwa mo kugugl gagl mige podo boglkwa i ta edekraiglkwa. 10Ye ekin wakai garamnedi pribi, ye ebrie mabuno wakai beglbi, ye ebrie mabunono i mina ye ekin wakai gaiglkwa mere yegl moraiglkwa. Abu ta ye God kamo sika sumne dinaiglkwa i, ye ebrie mabuno yegl beglbi, kuno erabuka.
11Te, abu meglkwa i, ye ene makai sinaiglmara i kiede mogl, mogl atne edidre, God kamo beke praiglkwa paugwa. 12Ye mogl mitna edidre, God kamo beke yagl tenaiglkwa i, na mane diga. Kiede moraiglkwa. 13I siragl pre God yoba beke yogwa i, yagl Adam komono kana beke yedre, Ewa okuo beke yogwa. 14Te, Satan yoba bakagl togwa igne i ye u Adam moglmara bakagl tekrukwa. Ye abu Ewa bakagl togo, Ewa prisre, tadaglme erukwa. 15Yegl pre abu mogl atne edenaiglkwa paugwa ba abu ye gak kuraiglmara i, God ye ake ple di tedre, ake mitna edenabuka. God yegl erabuka ba abu ye ama God kamo pre medigl moglsre, yoba deno muduno tedre, kene ere, God mabunomo sika si moraiglkwa paugwa. Abu yegl eribi, God ye ake ple di tedre, ake mitna edenabuka.
Currently Selected:
1 Timoti 2: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission