1 Timoti 3
3
Pre mediglkwa suglno yagl mabuno yegl eraiglkwa
1Ana yoba ta ere mogl, pre mediglkwa yoba suglno yagl ta moragledi pran, ye kogon kaima ta eragledi prukwa. Ka diga i, kaima diga. 2Ana pre mediglkwa yoba suglno yagl ta morabuka i, yoba ye kenaglmo sikraiglkwa mere moran, kogon i erabuka. Yagl i ye ebie swara keme morabuka paugwa. Te, ye mabuno kide ta dem muduo mina pogglau borabuka i mane didre, mabuno du ya mabuno wakai erabuka paugwa. Te, ye ama yoba yogugl ta unaiglkwa i, ka wakai di te, ere wakai ere tedre, God kamo yoba wakai ere beke tenabuka mere moran, kogon i erabuka. 3Pre mediglkwa yoba suglno yagl ta morabuka i, yegl mere moglsre, te ye ama spakman ta moglkre, kuda tabre erukwa yagl moglkre, kiede morabuka paugwa. Te, ye ama yoba pere bogl nonga tabre dikre, mige moni bubuno goglkre, erabuka paugwa. Yoba yegl mere ta morabuka i keme pre mediglkwa suglno yoba morabuka paugwa.
4Ana pre mediglkwa yoba suglno yagl ta morabuka i, ye yegl mere morabuka paugwa, te ye ebie gagiglma ama suglno wakai morabuka paugwa. Te, ye gagiglma moraiglkwa i, ye mogl atne edidre, mabuno du eraiglkwa paugwa. 5I siragl pre yoba ta yene ebie gagiglma suglno wakai ta moglkran, ye God yobama suglno morabuka i ama ta kuno erekrabuka. 6Te, yoba erme iga ta pre medrabuka i, ye suglno yoba ta moglkrabuka paugwa. I siragl pre yoba erme iga pre meduglkwa i, kogon yegl ta eran, kowai Yagl Kide okna erumere yegl, ye yene pre mitna edidre, tadaglme eran, God ye ka tage te dinabuka pre diga. 7Te, yagl ta kogon yegl erabuka i, yoba meda meglkwa i ye yagl wakai ta moglmedi kanibi, pra, ye kogon i erabuka. Ta manan, kowai ye Yagl Kide kitn korabara sinan, yoba ye kenaglmo sibi, kide panabuka.
Nigl kogon yoba mabuno yegl eraiglkwa
8Ana pre mediglkwa yoba niglno kogono yoba ta morabuka i we, ye ama mabuno du erabuka paugwa. Ye mabuno wakai yoba gumuglno mina keme eragledi erekrabuka ba ege ege erabuka moran, kogon i erabuka. Te, ye ama spak ere moglkre, mige moni pre bubuno goglkrabuka paugwa. 9Ye God kamo tau okna teke paugwa ba erme prumga i ake gi di moglsre, mabuno wakai ta pamedi prumere i keme ere morabuka paugwa. 10Yagl ta nigl kogon yoba yegl ta moragledi prabuka i, ene ye wakai ere kan moglsre, yoba ta ye kenaglmo sikraiglkwa mere yegl moglmedi kanibi, pra, ene ye kogon i tebi, erabuka.
11Te, abu ta nigl kogon eraiglkwa i, ye mabuno du eraiglkwa paugwa. Te, ye yoba kenaglno sikre, mabuno kide ta deno muduno mina pogglau borabuka i mane di tedre, ka dimara ege ege adigl moraiglkwa paugwa. 12Te, yagl ta nigl kogon yoba morabuka i, ye ebie swara keme moran, ye ebie gagiglma ama sugl wakai morabuka paugwa. 13Yagl ta nigl kogon yoba yegl moglsre, kogon i wakai eran, yoba meda meglkwa i ye wakai kanaiglkwa. Yegl pre yagl i ye yoba meda moraiglkwa i agai gogl tekre, Krais Jisas kamo nono pre medunga i, ye di tenan, ye praiglkwa kuno erabuka.
God kamo tau okna teke paugwa
14Ana Timoti yo, na ene motnara tabre unagledi prika ba na pepa bogl ene teiga i, 15na tabre ta ukribo, ene pepa i kersre, God yobama mabuno siragl mere ta eraiglkwa paugwa i, ene pre pogl sidre, ye di tenatnga pre boglka. Na God yobama we diga i, nono God kor aimadi moglkwa i yugobunomo munga i pre diga. God yugobunomo munga i, nono God kamo kaima paugwa i, ake gi dinamga paugwa. Yugu kauglage adigl paugo, kege te mitna edimere mere yegl, nono God kamo ake mitna ede, ake gi kaima dinamga pre diga.
16God kamo tau okna teke paugwa ba erme i nogugl ede noruko, nono pre medunga i, ka kaima podo paugwa. Ka i, mabuno yegl mere paugwa,
Jisas ye ede u yoba pidre, ede makandigle ugwa.
Te, Jisas moglkwa i, Mudu Murubuglo i nogugl ede,
Jisas dem muduo pe kaima sumedi i nogugl edugwa.
Jisas makandigle wan moglkwa igne, angelo ama ye kan meglkwa.
Te, Jisas swara i pre nono ye kamo i pi yoba yugobuno bage bage di tomgo,
yoba uglo koglo koglo meglkwa i, ye Jisas pre mediglkwa.
Te, Jisas swara i, God ye agre i ede heven ibo pidre, kagie podo kide togwa.
Currently Selected:
1 Timoti 3: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission