1 Timoti 4
4
Yoba ka mabuno kibi dinaiglkwa
1-2Ana God Murubuglomo nono nogugl di norukwa i, okuo murubuglo kide ere mogl, yoba tau ka mabuno kibi beke tenaiglmedi nomane tebi, murubuglo kide ye beke tenaiglmere yegl, yoba ka mabuno kibi beke tenaiglme dugwa. Te, ye ka mabuno kibi yegl yoba beke tebi, pre mediglkwa yoba tau prisre, ye God kamo kide kodidre, ka mabuno kibi i praiglmiwe dugwa. Ana yoba ye ka mabuno kibi beke tenaiglkwa yobamo i, God kogonmo yoba meglmedi no kanaiglmedi pre, yoba ka beke tenaiglkwa ba ye ka mabuno kibi keme dinaiglkwa. Te, ye nomano kobuglo mere yegl gigle dinabuka pre ye mabuno kide eraiglkwa i agai ta goglkre, eraiglkwa. 3Ye yoba ka mabuno kibi di tenaiglkwa i, Ene yagl abu bogl ikre, kaya mokna tau mawagl erio! dinaiglkwa.
Yoba ka mabuno kibi didre, Ene kaya mokna tau mawagl erio! dinaiglkwa ba kaya mokna kane kane yogwa i, yoba ta pre mediglsre, God kamo kaima i ta pre pogl sinaiglkwa i ye di wakai yei tedre, nenaiglmedi pre God ere yogwa. 4I siragl pre God kaya mokna kane kane ere yogwa i, wakai keme yogwa. Nono God di wakai yei tomun, kaya mokna kane kane yogwa i, i nenamga. Swara ta mawagl paikrukwa. 5Nono kaya mokna kane kane nenamga, mawagl ta paikrukwa. I siragl pre God yene ye kamo mina di norsre, kaya mokna mudu wakai yome dugwa. Te, kaya mokna pre nono kamage ersre, God di wakai yei tomnara i mina, kaya mokna i, taragl wakai, God yene norumiwedi, i nogugl edumga.
Timoti ye Krais kogonmo yoba wakai morabuka paugwa
6Ana ene Krais Jisas kogonmo yoba wakai ta moragledi pitn, na ka tau ene yoba beke tenatnedi di teiga i, ene agroma abaroma beke tenatnga paugwa. Te, yoba okna God kamo pamere ene beke teigo, ene pre mediglsre, erme ama duglo bogl motnga ka i, ene yoba beke te motn, enene ama God kamo i mina yobuglo inatnga.
7Ene God kogonmo yegl eratnga ba yoba ka mabuno dumne didre, ka mem wakai ta paikrumere kubu kaman mere yegl, yene primere digwa i, ene prikro. Ene ka i prikre, God mabunomo duglo boragledi ersre, duo ere moglo. Yoba kigle baramnedi ogono nagino sugl mogl, ere wakai erimere mere yegl, ene God mabunomo duglo boragledi kogon podo eratnga pre diga. 8I siragl pre nono ogono nagino sugl mogl, ere wakai eramga i, wakaimo kuri ta panabuka ba nono God mabunomo duo ersre, duglo bun, i swara wakai kaima panabuka. Yegl erumun, nono erme makandigle mogl enamga i wakai moramga. Te, okuo aimadi kamin moramga igne i, taragl wakai wakai ama inamga.
9Ana na ka erme diga i, kaima diga pre yoba mudu ka i kaima pamedi praiglkwa paugwa. 10Te, ka erme ene di teiga i, nono okna ka i prisre, God okuo taragl wakai wakai ikra norabedi kogon podo erumga. God moglkwa i, ye kor aimadi moglsre, yoba mudu ere inabuka yagl moglkwa. Ye yoba mudu ere inabuka yagl moglsre, yoba ira ta ye pre medunga i, ka kaima nono ere i kodugwa. Nono ere i kodugwa pre ye okuo taragl wakai wakai noragle dugwa ka i, nono okna ka i prisre, ye kaima ere norabedi pre gi didre, kogon podo ere umga i pre diga.
11Na erme ka tau ene yoba beke tenatnedi ene di teiga i, ene yoba beke tedre, duglo bolo di to. 12Yoba ta ere mogl, ene yagl kulu motnga i pre kan atne edibi, ene pre yubun dekro. Ene i pre yubun dekre, pre mediglkwa yoba ebrie mabuno siragl mere beglbi, wakai panabuka i, ene obuno di to. Ene ka dinatnara ya mogl pai eratnara i, obuno wakai di tenatnga pre diga. Te, ene yoba den mudn tedre, God kamo pre medigl moglsre, mabuno deglbi yogwa i erekre, eratnara i, ye obuno di tenatnga pre diga.
13Na okuo ene motnara unaglka ba erme ene ege ege God kamo yoba kere tedre, mabunomo beke te, God kamo dumere yegl ye duglo boraiglmedi di te pai moglo. 14Okna ka kep yoba ta ene pre didre, God ene yobuglo tenan, ene kogon ta eratne dugo, pre mediglkwa suglno yoba ama ye ogono i pi ene akidre, kogon yegl eratne digwa i, ene kogon i kide kodokre, aimadi ere moglo.
15Ana na kogon tau ene ero diga i, ene ege ege kinan gudu pre, kogon i ere pai moglo. Ene yegl etn, pre mediglkwa yoba mudu ene kandre, ene yakinedi kanaiglkwa. 16Ene ege ege ebrie mabuno siragl mere boratnga i ya te, God kamo siragl mere yoba beke tenatnga i, kan kuno ersre, God kogonmo ere moglo. Ene yegl etn, ene ka mabuno di tenga prikwa yobamo i ya, enene ama ka mabuno kibi ikra prisre, yage si dinaiglmedi ere inga mere yegl panabuka.
Currently Selected:
1 Timoti 4: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission