1 Timoti 5
5
Timoti ye pre mediglkwa yoba i, bormai swara meglmedi kanabuka
1Ana ene pre mediglkwa yoba meglmara suna i, yagl kidagl ta moraiglkwa i, ene ka muglkudi di tekro. Ye nomane inaiglmedi ka ta di tenatnga panan, na ninama meglmedi kandre, ye ka kiede di to. Te, yagl kulu mo kumugl gak ta suna moraiglkwa i, ye na agrama meglmedi kandre, 2abu kidagl moraiglkwa i na manama meglmedi kanatnga. Te, abai mor ta suna moraiglkwa i, na abarama meglmedi kandre, ege swara ta ye bogl mabuno kide eramnedi, nomane yegl ta ikro.
Pol abu werai pre dugwa
3Ana abu werai ta ene meglmara suna moraiglkwa i we, ye werai medugl meglbi, ene ye pre mitna edidre, ake ple di to. 4Ba abu werai ta ye gagiglma mo gawama ta meglbi, ye gagiglma ya gawama i God kamo duglo boglsre, kan ikne ede, mano i ake ple di tenaiglkwa paugwa. I siragl pre yoba ye yene bormai swara meglkwa i ye sugl meglbi, God mabuno i wakai kanabuka.
5Ana na ene abu werai medugl ake ple dinaiglme diga i, na abu ta yoba bormai swara ye sugl moraiglkwa ta moglkrikwa pre ye God swara ake ple di narabedi pre moglsre, etne ya eduer God di pre, kamage ere moglkwa, abu yegl ta moran, ene ake ple di tenaiglkwa pre diga. 6Ba abu werai ta mabuno gua gua ere, erme makandigle gun yenabuka i keme prukwa i, ye kor moglkwa ba ye gogl kodugwa mere yegl paugwa.
7Na abu werai ya yoba ye bogl bormai swara meglkwa pre ene ka tau di teiga i, ene ye ama beke te moglo. Beke te motn, ye prisre, duglo beglbi, yoba ye gagno ka ta sikraiglkwa. 8Ba yoba ta ere mogl, yoba ta ye bogl bormai swara meglkwa i sugl moglkran, i kide panabuka. I kide panabuka ba ye nem mo mam mo agigle abauglo kaima ta morabuka i sugl moglkran, i kide kaima panabuka. Pre meduglkwa yoba yegl ta eran, ye mabuno kide kaima erukwa. Yoba pre mediglkrikwa i mabuno kide yegl ta erekriko, ye mabuno kide kaima erukwa pre ye ka pre medunga i kide kodugwa mere yegl erukwa.
9Ana ene abu werai tau ake ple di tenamnedi kagno bogl atne edenaiglkwa i, abu okna yagl bage bage pikre, yagl swara keme ebie moglsre, te erme abumo i bugla yugu 60 mere ne ede mitna enabuka i, kagie beglbi, kuno erabuka. 10Te, abumo i ama yoba mabuno wakai erume dibi, te ye gagiglma ama bakagl i kade edugwa ta moran, ene ye kagie boraiglkwa. Te, ye yoba yogugl wigwa i ere wakai ere tedre, mogl atne ede, pre mediglkwa yoba niglno kogono ere tedre, te yoba yubuno paugwa igne ama ake ple di tedre, ege ege mabuno wakai kane kane yegl eragledi erukwa abu ta morabuka i, ene ye kagie bogl atne edidre, ake ple di tenaiglkwa i kuno erukwa.
11-12Ba abu kulu tau werai moraiglkwa i, ene ake ple di tenamnedi kagno bogl atne edekrio. I siragl pre ye komono kana abu werai mogl pai moglsre, Krais kogonmo keme eramniwe di padraiglkwa, ba okuo nomane kor ta pogglau boran, ye ede yagl kor ebi, ye ka okna dimara i adigl moglkre, Krais mokono teigwa mere yegl panabuka pre yoba ye kenaglno sinaiglkwa. 13Te, ene abu kulu werai meglkwa i ta ake ple di tebi, kide panabuka i, i siragl pre ye yoko keme wan moraiglkwa mabuno i beke kandre, yoba pere pere kipaimara ki yoko wan moglsre te, ye ama wan moraiglmara i, ka gua gua didre, yoba mokono ka didre, yegl ere mogl dinaiglkwa i pre diga.
14Ana yegl pre na prika i, abu kulu werai moraiglkwa i, ene ake ple di tekribi, ye ede yagl kor ebi, i wakai panabuka. Ye ede yagl kor pidre, gak kuglsre, yuguno toglno sugl moraiglkwa paugwa. Yegl eribi, yoba nono kudano ikne mere yegl meglkwa i ta mabunono kandre, kenaglno sinaiglkwa i ta kuno erekrabuka. 15Na ka tau abu kulu werai meglkwa pre diga i, i siragl pre ye tau na dimere mere yegl ede meda mere yegl pidre, Satan duglo bogl, mabuno kide ere kodigwa pre okuo tau ama yegl ere dinaiglkwa pre diga.
16Ana pre meduglkwa abu swara ta moran, yene bormaimo swara ama abu werai ta moran, pre meduglkwa abu i ye yene abu werai i sugl morabuka paugwa. Yegl eran, God yugobunomo mudu meglkwa i, ye abu werai swara i we di prikre, abu werai tau yoba ye ake ple di tenaiglkwa ta moglkrikwa i, ake ple di tenaiglkwa pre diga.
Pre mediglkwa suglno yoba ake ple di tenaiglkwa paugwa
17Pre mediglkwa suglno yoba kogon dimede erikwa i, ye pre mitna edidre, mige moni mina ake ple di tenaiglkwa paugwa. Te suglno yoba God kamo ege ege beke teigwa i, komono kana inaiglkwa. 18God kamo mina ka swara ta okna ibo yegl beglkwa paugwa, Kau ta wit mogo egran, ugla porabedi ene kane koraiglkwa i, ye dra si kegl dikre, kanige erio! Kau i egre porabara i, wit mogo tau ama i nenabiwe#5.18 Lo 25.4 di, yegl beglkwa paugwa. Ka i, kau ye wit i nenabuka kuno erukwa pre didre, te ka ebrie mere yegl, God kogonmo yoba ye kogon eraiglmara topo inaiglkwa pre ama dugwa. Te, God kamo bage ta ama dugwa i, Kogon yoba ta morabuka i, ye topomo inabuka kuno erume#5.18 Luk 10.7 dugwa. Yegl dugwa pre, pre mediglkwa yoba ye suglno yoba mige moni mina ake ple di tenaiglkwa kuno kaima erukwa.
19Te, pre mediglkwa suglno yoba ta morabuka i, yoba swara keme ta ene motnara udre, suglno yoba i aglau yegl yegl erume dinabuka i, ene prikro. Yoba suo mo suota u dibi, ene pratnga. 20Te, ye u dibi, suglno yoba i ta kaima tadaglme erukwa panan, pre mediglkwa yoba mudu gumuglno mina Ene aglau etniwe di, nogugl di to. Di ten, yoba mudu ama kandre, God kuduglmo gogl, mabuno kide erumere yegl ta eraiglkwa.
21God gumuglo mina ya Krais Jisas gumuglo mina ya te God angeloma gumuglno mina na ene ka gigledi di teiwa. Na pre mediglkwa suglno yoba pre ene ka magigl di teimara yegl, ene adigl mogl, yegl keme ero! Ene yoba tau mabuno wakai ere tedre, tau mabuno kide ere tedre, yegl ta erekre, mabuno kuno keme ere to. 22Te, ene tabre ogon i pi yoba ta edekro. Te, yoba tadaglme eraiglmara suna moglkro. Te, ene ama tadaglme mina mogl eglke ede moglo.
23Ana Timoti yo, ene nigl kor keme ne motnga i kodo, nigl wain kuri ta ama akie no. Nen, ene den biglko mina kide ta magigl magigl inga i, tau aragan erabedi prika. 24Yoba tau tadaglme erikwa i, nogugl paugwa ba yoba tau teke atne keme erikwa. Tadaglme nogugl eriko, nono kamga i, God ama okuo kan yubu sinabuka ba yoba tau tadaglme teke atne erikwa i, nono erme ta kankrumga ba God okuo yoba mabunono kan yubu sinabuka igne i keme u nogugl enabuka. 25Te, yoba mabuno wakai erikwa i, ama kuno yegl mere paugwa. Yoba tau mabuno wakai erikwa i, erme nogugl eriko, kamga ba tau erme ta kankrumga. Yoba tau mabuno wakai eriko, kankrumga i, okuo God yoba mabunono kan yubu sinabuka igne, ama u nogugl enan, kanamga.
Currently Selected:
1 Timoti 5: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission