1 Timoti 6
6
Yoba kane pai, nigl kogono erikwa pre dugwa
1Ana pre mediglkwa yoba meglmara suna i, yoba pere boino paigwa i, ye bitno yoba pre i mitna edidre, kano praiglkwa paugwa. Kano ta prikribi, yoba meda meglkwa i kandre, God kagie ya nono ka pre medunga i, di kide yei te dinaiglkwa pre diga.
2Te, yoba boi paigwa i, tau ye bitno yoba ama pre mediglkwa yoba meglkwa. Yoba yegl mere ta meglkwa i, ye ere mogl, bitno yoba i no agro meglma kodo di pre, mogl mitna ede, ye kano ta prikribi, i kide panabuka. Ye praiglkwa i, no pre mediglkwa yoba kogon ere tomga i wakai pamedi prise, ye bitno yoba moraiglkwa i, deno muduno tedre, mogl atne ede, kogon podo ere te pai moraiglkwa paugwa. Ene ka i ye beke tedre, duglo boraiglmedi di to.
Mige moni bununo geglbi, ka mabuno kibi dinaiglkwa
3 Nono Yaglno Kade Jisas Krais ka okna di norukwa i, du kaima paugwa. Ba yoba ta ka mabuno kibi digwa i, ye Jisas Krais kamo i kide kodidre, God mabunomo duglo boramga ka i ama kide kodo, ka mabuno kibi yoba beke teigwa pre ye kide erikwa. 4Yoba yegl ta erabuka i, nono kan pogl sinamga, ye yene pre mitna edidre, God kamo bage swara ta pre pogl sikrukwa pamedi kanamga. Yoba yegl erikwa i, ye nomane kide idre, taragl kebra mina ka drano didre, nonga didre, erikwa. Ana yoba ka mabuno kibi digwa i, ye ka drano didre, nonga didre, yegl erikwa pre yoba ye ka di teigo, prikwa yobamo i, ama ye yene ikne ikne kide pre tedre, si buno di ede pere pere pidre, ka kide di ikne ikne ede, mem ta paikrumara yoba ta meglkwa ido yoba kide meglmedi kandre, erikwa.
5Te, na di kodiga, ka mabuno kibi beke teigwa yobamo i, ye nomano u kide pi kodugo, nonga ege ege digwa. Ka kaima pre pogl sinaiglkwa mabuno i, ye meglmara i ta paikruko, ye prikwa i, ka mabuno yoba beke tomun, mige moni tau mere noribi, i nenamniwedi prisre, yoba ka mabuno kibi beke teigwa. 6Ba nono pramga i, nono God kamo duglo boglsre, ye taragl kane kane noro kodugo, pra imnedi gun yomun, nono ka kaima wakai moramga. 7Mano no kiglkwa igne, nono taragl swara kaima ta idre, ukunga. Kuno yegl mere nono goramga igne, taragl swara kaima ta idre, pikramga. 8Yegl pre erme kaya mokna nenamga i ya te, kugugl gagl edinamga ama ta yenan, nono pra imnedi prisre, gun yenamga paugwa.
9Yoba ta mige moni mere kide idre, bona sinamnedi prikwa i, mabuno kide kane kane ye meglmara pogglau boglko, ye mabuno kide kan, bubuno gogl, nomane kide idre, yagl kide kitn koglmara sigwa. Yegl erikwa pre ye wakai moglkre, u kide kaima pi kodigwa. 10I siragl pre yoba mige moni bubuno geglkwa igne, mabuno kide kane kane plau dugwa. Yoba tau mige moni bubuno geglkwa i pre ye God kamo pre mediglkwa i kide kodo, ede eglke pidre, yubun idre, giugl kane kane prisre, erikwa.
Pol ka las dugwa
11Yegl erikwa ba ene God yobamo motnga pre mabuno yegl eraiglmara i, ene ere dinagledi teke ede eglke pidre, God mabunomo du paugwa i duglo bogl moglo. Ene yegl ersre, God kamo pre medigl moglsre, yoba den mudn te moglo. Te, ene adigl gigledi moglsre, mogl atne ede moglo. 12Nono God kamo pre medunga i, ene yoba beke tedre, God kogonmo eratnga i, yoba kuda yobuglo ere beglmere mere yegl, ene kogon podo yegl eratnga paugwa. God okna ene aimadi kamin kor moratnedi agle dugo, ene ede suna udre, yoba mere gumuglno mina di nogugl ede, God na aimadi kamin kor moraglka i, nare kodume dinga pre erme ene God na aimadi kamin kor moraglka i, narukra we di poglo di pre, erme ya okuo akie God bogl wakai kaima morabugledi ero.
13Ana na erme God ya Krais Jisas gumuglno mina ene ka gigledi di tenaglka. God moglkwa i, ye taragl mudu kor meglkwa i mabuno kama si moglko, te Krais Jisas moglkwa i, ye okna Pontius Pailat gumamugl adigl moglkwa igne, ye ka wakai di nogugl ede togwa. Yegl pre na God Nem ya Krais Jisas suo akie gumuglno mina ene erme ka gigledi di teiga. 14-15Na ene ka gigledi di teiga i, yegl paugwa, na ene God kogonmo siragl mere eratne diga i, ene yage sikre, God gumuglo mina aglau ere dinagledi, na dimere yegl keme ere motn, nono Yaglno Kade Jisas Krais okuo God yene ege ta paduglmere i, unabuka pre diga. God moglkwa i, ye swara kagie kade tenamga paugwa. Ye swara taragl mudu bitno moglsre, king makandigle meglkwa i kingno moglsre, ye ama kade mogl, makandigle yoba kade meglkwa i, egre atne ede tedre, moglkwa. 16Te, God swara i aimadi kamin moglsre, abuglagemo podo kide kaima sumara moglkwa. Ye abuglagemo sumara i, nono yoba ede magigl enamga i kuno ta erekrukwa. Te, God moglkwa i, yoba ege swara ta ye kankriko, nono ama kanamga kuno erekrukwa. Ye swara kagie kade aimadi kamin i pai moglsre, aimadi kamin taragl mudu bitno moglsre, erabuka. Kaima.
17Ana yoba ta erme makandigle mige moni ya bona gana mere kan neigwa i, ene di to. Mige moni ya bona gana i, tabre bugl kide erabuka yogwa pre ye yene pre i mitna edekre, mige moni mina wakai moramnedi prikraiglkwa paugwa. God swara ake ple di noran, wakai moramnedi pribi, i swara kuno erabuka. God moglkwa i, ye nono wakai moglsre, gun yenaiglmedi taragl kane kane norukwa yagle moglkwa.
18Ana yoba mige moni mere kan neigwa i, ene ka yegl mere di tedre, ka ta ama yegl di tenatnga, ye mabuno wakai mere eribi, mige moni ye meglmara kau sumere yegl, mabuno wakai i ye meglmara kau sinabuka paugwa. Te, ye mige moni ya ki ake gi di moglkre, yoba ake ple di tenaiglkwa paugwa. 19Yegl eribi, ye taragl wakai wakai heven ibo bona sigwa mere yegl panabuka. Taragl wakai wakai i, ye okuo idre, God bogl wakai kaima moraiglkwa pre ye mabuno yegl eraiglmedi di to.
20Timoti yo, God ene kogon tedre, ye kamo yoba di tenatnedi dedumere mere yegl, yoba beke te pai moglo. Te, yoba tau yene nomano podo pamedi prisre, ka mabuno kibi, God kamo paikrumere mere gua gua digwa i, ene prikro. 21Ye ka mabuno kibi digwa i, yoba tau ka i kaima dimedi prisre, God kamo kaima pre mediglkwa i kide kodimere ene yegl erekro. Ana na prika i, God ene yoko kaima ere wakai ere te pai morabedi prika.
Currently Selected:
1 Timoti 6: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission