2 Timoti 1
1
1Timoti yo, na Pol, pepa magigl i, ene bogl teiga. Na moglka i, God yene wakai prumere na Jisas dedugwa yoba ta moratnedi na kere idre, te, Krais Jisas pre mediglbi, ka kaima aimadi kamin kor moraiglme dugwa i, yoba di tenatnedi na kere yugwa. 2Timoti yo, ene na wana mere yegl moglsre, dena muduna suna motnga. Na prika i, Neno Kade God ya nono Yaglno Kade Krais Jisas, ye ene mitn goglsre, ene yoko kaima ere wakai ere tedre, den mudn wida di padigl tenabredi prika.
Timoti kudugl goglkre, God kogonmo ere pai morabuka
3Ana na God kogonmo ere moglmara i, na etne ya eduer, ene pre ege ege poglo di prisre, God di wakai yei te, kamage ere moglka. Na kowanoma awanoma okna ibo God kogonmo ersre, aglau ta erekrumnedi primere mere yegl, na ama God kogonmo erika i, aglau ta erekriedi prika. 4Ene okna kai etnga i, na poglo di prisre, ene pre kamage ere, ene ka kaima kanagledi prika. Na prika i, na ene kanibo, gun podo yenagledi prika. 5Te, ene siragl mere God kamo kaima pre mediglnga i, poglo di prika igne, na kaima ene kanagledi prika. Te, na pre gi diga i, ene abu awan Lois ya ene man Yunis komono kana pre mediurko, ye pre mediurere yegl, ene ama yegl pre mediglnedi prika.
6Yegl pre na ene di tebo, ene kor poglo di pratnedi prika i, okna na ogona bitn mina yeigo, God ere mogl kogon ta eratnedi ye yobuglo bogl togwa i, ye yobuglomo i u podo enabedi ero. 7Te, ene God kogonmo eratnga i, kudugl goglkro! I siragl pre God ye Murubuglomo norukwa suna moglkwa i, nono kudugl goraiglmedi erekrukwa. Ye erukwa i, yobuglo norsre, nono deno muduno ikne ikne tenaiglmedi ersre, nomane wakai norukwa.
8Yegl erukwa pre ene kudugl goratnga i, kuno ta erekrukwa. Ene Yaglno Kade kamo di nogugl edinatnga i, agai goglkro! Te, na Yagl Kade pre kane paiga i, ama againa goglkro! Ene agai ta goglkratnga ba ene God yobuglomo idre, Jisas kamo wakai i pre na yubun imere yegl, ene ama yubun yegl inatnga paugwa.
9Ana God moglkwa i, ye nono ere idre, nono ye yobama kaima moraiglmedi agle dugo, ede suna umga. Ye nono ere yugwa i, nono kogon wakai ta erumga pre nono ere ikrukwa ba yene wakai prisre, ere wakai ere noragledi prumere nono ere yugwa. God ye nono yegl mere ere wakai ere norukwa i, ye okna ibo, taragl swara ta ere yeikrukwa igne, Krais Jisas mina ere wakai ere noragledi di padigl kodugwa. 10Okna ibo di padigl kodugwa ba nono Ere Yugwa Yagle Jisas Krais umara i mina God ye siragl mere nono ere wakai ere norukwa i, ede nogugl ugwa. Jisas ye yene geglkwa mabuno si dudidre, te, kor meglkwa mabuno ya yoba aimadi kamin wakai moraiglkwa i, ye kamo wakai i mina i nogugl edugwa.
11Te, na moglka i, na Jisas kamo wakai i, yoba di nogugl ede tenatnedi God kogon narsre, Jisas dedugwa yoba ta ama moratnedi kere yugwa. Ye kogon yegl narsre, ye kamo yoba beke tenatnedi kogon narukwa.
12Ana God kogon yegl narukwa pre na yubun tau mere iga, ba na agai ta goglkrika. I siragl pre na yoba swara ta pre mediglka i, pre kan ere kodiga. Te, na pre gi diga i, na taragl ta ye ogo mina yeiga i, ye wakai ere sugl mogl enan, na okuo ye kanaglka igne, inaglka kuno erumedi prika.
13Na okna God kamo pamere ene beke teiga i, ene pre moglsre, na ene beke teimere kuno yegl, ene yoba beke tenatnga paugwa. Te, ene yoba ka beke tenatnga igne, ene den mudn Krais Jisas tedre, ye pre medigl moglsre, ye kamo yoba beke tenatnedi prika. 14God kamo wakai kaima yogwa i, ene sugl wakai moratnedi togwa pre Mudu Murubuglo ene yobuglo bogl tenan, ene sugl wakai moglo. 15Ana ene pitnga, yoba mudu provins Esia suna meglkwa i, na kide kodigwa. Ye mudu na kide kodigo, te yagl suo Figelus ya Hermogenes ye ama na kide kodibrika.
16Yoba mudu i, na kide kodigwa ba na prika i, yagl Onesiforus yobama bogl meglkwa i, God ye mitno goglsre, ere wakai ere tenabedi prika. I siragl pre Onesiforus ye ege mere na dena muduna si gigledi narukwa. Ye na kane paiga i pre againa goglkrukwa. 17Ye ede Rom ugwa igne i ye yobuglo ere, na doko pi, kane paimara na kanugwa. 18Yegl pre na Yagl Kade agle di prika i, okuo ye gumuglo mina adigl moramga igne i Yagl Kade ye Onesiforus mirie goglsre, ere wakai ere tenabedi ye agle di prika. Okna, na dumo Efesus moglka igne, Onesiforus ama kogon kane kane ersre, na ake ple di narukwa i, enene pitnga.
Currently Selected:
2 Timoti 1: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission