2 Timoti 2
2
Timoti adigl gigledi morabuka
1Wana yo, Krais Jisas nono yoko kaima ere wakai ere norumara i mina ene yobuglo idre, adigl gigledi moratnga paugwa. 2Ene adigl gigledi moglsre, na okna dumo tau yoba mere kide gumuglnomugl na ka siragl mere yoba beke teigo, ene pitnga ka ikra ene pitnga pre ene motnara yagl tau adigl gigledi moraiglkwa i, ka i beke ten, ye yoba tau mere ama beke tenaiglkwa.
3Ana ene kogonen yegl paugwa pre ene Jisas Krais kogonmo eratnga i, soldia erimere mere yegl ersre, yubun tau ama inatnga paugwa. 4Soldia meglkwa i, kuda ta paugwa igne, ye kuda swara i we di prikwa. Ye yene ame wakai dinaiglkwa i pre yene kogono ama ta eribi, wagamage panabuka ba ye yegl ta erekrikwa. I siragl pre ye soldia moraiglmedi ye i suna edugwa yagl i, wakai prabedi prikwa pre soldia kogon swara i erikwa.
5Te, yoba resis erikwa i, ene ama pro! Resis i, lomo ama paugwa. Ye lo i ta duglo boglkribi, prais ta ikraiglkwa ba ye resis lomo duglo boglsre keme prais inaiglkwa.
6Te, yoba ta kogon podo ersre, kaya mokna ere yagl, sugl ere, erikwa i, ye kogon podo erikwa pre ye kaya mokna ere yaiglmara i, yene komono kana si nenaiglkwa paugwa. Ye si nebi, yoba tau okuo nenaiglkwa mere yegl paugwa. 7Na kogon pre ka magigl diga i, ene kinan gudu pro. Kinan gudu pitn, Yagl Kade ene ka mudu i, pre pogl sinatnedi erabuka.
8Ana na ka wakai yoba di te wan moglka igne, na Jisas Krais, Devit gawamo moglkwa i, goglsre, adigl u kor omiwe di, yoba yegl di te wan moglka. Ka i, ene pre moglo. 9Na ka wakai yegl di wan moglka i pre yoba na kide erumedi kandre, yubun nare, ama sen mina na si kane sigwa. Ye na si kane sigwa ba God kamo i ta si kane sikrikwa. 10Yegl pre God yobama, ye kere i pere edugwa i, na ake ple di tenagledi yubun kane kane iga. I siragl pre na prika i, na ye ake ple di tebo, Krais Jisas ye wakai moraiglmedi ere inan, ye abuglagemo mina aimadi kamin wakai kaima moraiglmedi prika.
11Na ka ta borarika magigl i, ka kaima paugwa pre nono pre medramga paugwa. Ka i yegl paugwa,
Nono Krais bogl akie gunga pre ye bogl akie ama kor moramga.
12Te, nono yubun idre, adigl gigledi mun, nono ye bogl akie king moramga.
Ba nono ye mokono tomun, ye ama moko norabuka.
13Nono pre medigl moglkrumun, ye ka dumara adigl mogl pai morabuka.
I siragl pre ye yene ka dumara adigl moglkrabuka i, kuno ta erekrukwa.
Timoti ye God kogonmo yoba wakai ta morabuka paugwa
14Timoti yo, ka magigl i ene yobanma poglo di praiglmedi ero. Ersre, God gumuglo mina ye ama ka gigledi di te, ka kebra kebra mina ka drano dikrio do. I siragl pre ka kebra mina ka drano dibi, ene ake ple di tekrabuka ba yoba pre meglkwa i, ere kide ere tenabuka.
15Timoti yo, ene kogon eratnara i, God wakai kanabedi ye kamo wakai ere bekenatnga! Ene yegl etn, ene God kamo, kaima paugwa i, kuno ere yoba di tedre, agai ta goglkratnga paugwa. 16-17Ba yoba tau God mokono tedre, ka mem wakai ta paikrumara dinaiglkwa i, ene ye dinaiglmara suna moglkro. I siragl pre ye ka digwa i, num kide ta de ede u podo omere mere yegl, ye ka dimara i ede u podo enabuka.
Ana na yoba tau ka mem wakai ta paikrukwa dime diga i, yagl suo Himeneus ya Filetus ama ka yegl mere dibrika. 18Yagl suo i ye ka kaima paugwa i kide kodidre, yoba adigl u kor enaiglkwa igne i plau di kodume dibrika. Ye yegl dibrara i mina pre mediglkwa yoba tau prisre, kinano suo yogo, ye kaima dibredi prikwa. 19Mabuno yegl paugwa ba God ye yugu ta kenagledi kobuglo ta makandigle bogl paduglkwa mere yegl paugwa. Kobuglo i mina ye ka ta yegl bogl paduglkwa, Yoba ira ta ye Yagl Kade yobama meglkwa i, Yagl Kade yene pre kan erumiwe di, yegl boglkwa. Te, ye ka ta ama boglkwa i, yegl paugwa, Yoba ta ye Yagl Kade yobamo ta mole dinabuka i, ye mabuno kide moko tenabuka pamiwe di, kobuglo i mina ka yegl ama boglkwa mere yegl paugwa.
20Ana yoba kade ta yugumo yomara yugugl i, sin ya dis kwi mere yogwa. Tau gol ya silva mina bekigwa yogo, tau ama makan koglwa ya ede mina bekigwa yogwa. Ana dis tau, kogon wakai pre yogo, tau kogon kide pre yogwa. 21Yegl pre ene pro. Yoba ta mabuno kide ere dinagledi erabuka i, ye dis ta kogonmo wakai paugwa mere yegl morabuka. Yagl Kade ye na kogona erabedi i pere edenan, ye kogon wakai kane kane erabuka i, kuno erabuka.
22Ana mabuno kide tau gakamugl deno muduno mina pogglau boglkwa i, ene ere dinagledi teke ede eglke po. Ba ene mabuno du ya God kamo pre mediglnga mabuno i ya, yoba pere den mudn tenatnga mabuno i ya te, yoba pere bogl akie wakai moraiglkwa mabuno i, ene eragledi ero. Te, na ene swara mabuno wakai yegl eratnga i pre ta dikrika ba yoba ira ta ye deno muduno bogl God agle dinaiglkwa yobamo ta moraiglkwa i, ene ye bogl akie mabuno wakai eramnedi eraiglkwa pre diga.
23Ene mabuno wakai yegl eragledi eratnga ba yoba ka kane kane, mem wakai ta paikrukwa dinaiglmara i, kigl nonga plau dinabuka pre ene ye bogl akie ka dikrio. 24Yagl Kade niglmo kogonmo yoba ta moraiglkwa i, ye yoba pere bogl kigl nonga dikraiglkwa paugwa. Te, yoba ta ye ere kide ere tebi, ye deno tabre kubro tekraiglkwa paugwa ba ye yoba mudu ere wakai ere tedre, God kamo siragl mere yoba beke tenaiglkwa i yene pre pogl sidre, beke tenaiglkwa paugwa.
25Te, ye mogl atne edidre, yoba ta ye kudano ikne mere yegl moraiglkwa i, ka beke tenaiglkwa paugwa. I siragl pre God yoba i agai tenan, ye nomano yake tedre, ka kaima paugwa i pre pogl sinaiglmo mo sikraiglmo mo i, nono ta prikrumga pre God kogonmo yoba ye yoba i ka beke tenaiglkwa paugwa. 26Yoba ta kudano ikne mere yegl meglkwa i, yagl kide kigln koglmara sigo, yagl kide prumere eraiglmedi ye si kane sugwa ba yoba i nomane idre, aglau erumiwedi pre, teke ede meda enaiglkwa i, wakai panabuka.
Currently Selected:
2 Timoti 2: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission