2 Timoti 3
3
Okuo kaima ime, siragl taragl plau dinabuka
1Te, ene ama pre pogl sinatnga i, okuo ibor ege kide ta unabuka. 2Ege i unan, yoba ye yene wakai kandre, mige moni ama wakai kandre, ye yene pre i mitna ede, kagno ake mitna edenaiglkwa. Yoba yegl mere ersre, te, ye yoba pere ka kide di tedre, neno mano kano prikre, yoba ye wakai ere tenaiglkwa i di wakai yei tekre, ama God mokono tenaiglkwa. 3Yoba okuo yegl mere ersre, ama ye yoba pere deno muduno tekre, yoba ye aglau ere tenaiglkwa i kide kodokre, yoba pere kenaglno sinaiglkwa. Ye yegl ersre, te mabuno kide ye deno muduno mina pogglau borabuka i mane dikre, yoba ere sidre, mabuno wakai kide yomedi kanaiglkwa. 4Yoba mabuno yegl ersre, te ye ama yoba pere i pi kudano ikne ogono mina yedre, mabuno gua gua tabre ersre, mogl mitna kaima edumnedi praiglkwa. Te, ye ama God wakai kanaiglkwa i kankre, ye erme gun yenaiglkwa i keme wakai praiglkwa. 5Ye ka mabuno prumnedi eraiglkwa ba God ye meglmara kogon yobuglo erabuka i, ye mane dinaiglkwa. Yoba yegl mere ta moraiglmara i, ene mogl eglke edo!
6Ana yoba tau mabuno kide yegl ere meglkwa i, ye yoba kipaimara teke konbo ede suna udre, abu tau nomano gigle dikrukwa meglkwa i, bakagl tedre, si kane sigwa mere yegl paugwa. Ana abu wagle i, nomano gigle dikrukwa. Nomano gigle dikruko, tadaglme ye meglmara kau sugo, taragl kane kane ye deno muduno mina pogglau boglkwa i ye ama duglo beglkwa. 7Te, ye ege ege ka bekenamnedi erikwa ba ka kaima paugwa i, ye pre pogl sinaiglkwa i, kuno ta erekrukwa.
8 Okna ibo, yagl suo kagno Janes ya Jambres ye Moses kudamo ikne moglsre, Moses kogonmo si kegl dinabugledi eribrere mere yegl, yoba kide tau erme meglkwa i, God kamo kaima paugwa i ama si kegl dinamnedi erikwa. Yoba i, ye nomano u kide ogo, ye God kamo wakai yogwa i mina ede eglke pi kodigwa. 9Ba ene pro! Yoba ka mabuno kibi didre, yoba bakagl teigwa i, ye kogono ede eglke pikrabuka. I siragl pre yagl suo Janes ya Jambres okna yegl eribriko, yoba ye du eribredi kanimere yegl, yoba erme ka mabuno kibi digwa i, ama yoba mudu ye du erimedi kanaiglkwa pre ye kogono ede eglke pikrabuka.
Timoti God kamo ake gi di morabuka paugwa
10Ba na mabuno siragl mere erika i, ene pre kan etnga. Na God kogonmo kaima eragledi prika ya te, ye kamo yoba siragl mere beke teiga i ene kandre, siragl mere mogl pai erika i, ene ama kanga. Te, na God kamo pre medigl moglsre, oglka erekre, dena muduna yoba tedre, yubun ugwa igne adigl gigledi moglka i, ene ama pre kan etnga. 11Te, na God kogonmo erimara i, yoba yubun nariko, na giugl prika i, ene ama pre kan etnga. Okna dumo Antiok ya dumo Aikoniam ya dumo Listra moglka igne, yoba yubun nariko, na giugl prika i pre diga. Ba yubun kane kane ugwa igne, Yagl Kade ege ege na ere yugwa.
12Ana ene pro, yoba ta Krais Jisas yobama moglsre, God mabunomo duglo boramnedi praiglkwa yobamo i, yoba kide ye ere kide ere tenamnedi eribi, yubun inaiglkwa. 13Ba yoba kide ya yoba bakagl teigwa yobamo i, ye mabunono u kide kaima enabuka paugwa. Ye yoba pere bakagl te meglbi, yoba pere i, ama ye bakagl tenaiglkwa.
14Yoba tau yegl eraiglkwa ba ene ka tau bekidre, kaima pamedi pre pogl singa i, duglo bogl pai moratnga paugwa. I siragl pre no yoba tau God kamo ene beke tomgo, ene pitnga i, ene no kaima dimedi kan pogl singa. 15Te, ene ama pitnga, ene gak kebra mogl, yakinga igne, ene God kamo bogl atne edigwa i prisre, yake ede unga. God kamo i, ene nomane togo, ene Krais Jisas pre mediglngo, ye ene ere yugwa i, kuno erukwa.
16God kamo ta bogl atne edigwa paugwa i, God yene yoba nomane togo, ye ka mudu i bogl atne edigwa. Te, God kamo mudu i, nono ka beke norabuka kuno kaima erukwa. God kamo i, nono ka beke norsre, aglau ta erumga i di pogl norsre, te, mabunono kugl dugwa i ake du ede norsre, nono mabuno du eraiglmedi di norukwa pre wakai kaima paugwa. 17Te, God kogonmo yoba nomane wakai idre, kogon wakai mudu eramnedi ake kun eraiglkwa i, God kamo i mina eraiglkwa kuno erukwa.
Currently Selected:
2 Timoti 3: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission