2 Timoti 4
4
Timoti God kamo yoba di te pai morabuka paugwa
1God ya Krais Jisas gumuglnomugl ene ta eratnedi ka gigledi di tenaglka i, Krais Jisas ye yoba kor meglkwa ya geglkwa jasno mogl, okuo ede nogugl udre, king morabuka paugwa pre 2ene ege ege, God kamo di nogugl ede te pai moglo. Ege wakai mo ege kide yenabuka i, di pai moglsre, yoba aglau eraiglkwa i, ene ka tedre, mabunono ake du ede tedre, adigl gigledi moraiglmedi God kamo kuno ere beke to. Te, tabre pre ikribi, ene oglka erekro.
3I siragl pre ege ta unabuka i, yoba ta ka mabuno pamere dinaiglkwa i, yoba prakiure, yene ka siragl mere pramnedi primere mere, yoba ka yegl mere beke noraiglmedi i makai sinaiglkwa. 4Ye ka kaima paugwa i, kide kodidre, ka gua gua, kubu kaman mere yegl panabuka i, di tebi, praiglkwa. 5Yoba tau yegl eraiglkwa ba ene ta eratnga paugwa i, ene nomanen mina taragl kane kane pre pogl sidre, te, yubun unan, adigl gigledi pai moratnga paugwa. Te, ene God kamo wakai yogwa i, yoba di te moglsre, God ene kogon togwa i, ere kodinatnga paugwa.
Pol goraglka magigl erumedi prie dugwa
6Ene pro! Yoba nigl wain i pi toide ede, God teimere mere yegl, yoba na bormaina toide edibi, na goglsre, ede God moglmara enaglka i, ede magigl u kodugwa. 7God kuda wakai ta eratne dugwa i, na ersre, resis ta ama eratne dugwa i, ere kodidre, God kamo pre medigl mogl pai moglka. 8Yegl pre erme Yagl Kade prais ta inatnedi yei narukwa i, bitno gagl mabuno du ersre inaiglkwa i, yei narukwa. Prais yegl mere i, nono Yaglno Kade ye jas du moglkwa i, egemo unan, bitno gagl i narabuka pre diga. Ba prais i, na swara ta ikraglka ba yoba ira ta ye unabedi kwie ere meglkwa i bogl akie inamga.
Timoti Pol moglmara tabre wo dugwa
9Ana erme we, ene na moglmara tabre unagledi ero. 10I siragl pre yagl Demas ye erme makandigle wakai morabuka i we di prisre, na kide kodo, ede dumo Tesalonaika ogwa. Te, Kresens ye ede provins Galesia ogo, Taitus ama ede distrik Dalmesia ogwa. 11-12Te, yagl Tikikus, ye ede dumo Efesus enabedi na dedigo, ede ogwa. Luk swara na moglmara mogl pai moglkwa. Te, ene unatnga igne, yagl Mak auro idre wo. I siragl pre ye kogon mina ake ple di narabuka moglkwa.
13Ene unatnga igne, na ir gaglna ta dumo Troas, yagl Karpus moglmara ediga i, idre, wo. Te, na bukna tau yogwa i ama idre, unatnga. Bukna mudu idre unatnga, ba buk tau agl bugla nagino mina beglkwa yogwa i, na ka kaima inagledi prika pre ene buk i idre, unatnga paugwa.
14Yagl Aleksander, ye taragl bras mina bekidre, topo bogl nogwa yagle moglkwa i, na ere kide ere narukwa pre Yagl Kade ye na mabuno ere narumere mere yegl, ere te ikne edenabuka. 15Yagl i, ye okna nono God kamo dumga i, si kegl dinagledi kogon podo erukwa yagle kra. Erme ene ama ye pre kan kun ero.
16Ana kere moknayene na kot mina adigl, kana diga igne, yoba swara ta adigl mogl, na kana dikrikwa. Ye pra pra na kide kodo, teke ede eigwa. Ye erikwa i, kide erikwa ba na God agle di prika i, ye mabuno kide erikwa i, kide kodo tenabedi pre agle di prika. 17Na kot mina adiglka igne, yoba ta na kana dikrikwa ba Yagl Kade yene na moglmara mogl narsre, yobuglo bogl nare, laion na kaglsre, na ere si dinabedi na ere yugwa mere yegl paugwa. I siragl pre ye prukwa i, na ye kamo diga i, ede eglke pi kodinan, yoba yugobuno pere pere, Juda yoba ta moglkrikwa i, mudu praiglmedi prukwa. 18Te, yoba mabuno kide kane kane ere naramnedi eraiglkwa i, Yagl Kade ama na ere i pai moglsre, na suglna wakai mogl enan, okuo ye heven ibo king morabara i, na i suna edenabuka. Ye kagie kade aimadi kamin inabuka paugwa. Kaima.
19Ana ene Prisila ya Akwila di tedre, Pol wakai we di tomiwe do. Te, Onesiforus nem agiglema bogl ama yegl di to. 20Erastus ye dumo Korin mogl pai moglkwa. Te, Trofimus, ye kide sugwa pre na ye dumo Miletus morabedi kide kodo, ede wiga. 21Ir erabuka igne i okuo yenabiwa, ene tabre ede na moglka unagledi ero.
Yubulus ya Pudens ya Linus ya Klodia ye agroma mudu ta meglkwa i bogl, ene wakai we di teigwa.
22Yagl Kade ene kian mina motnara mogl tedre, ene ere wakai ere te pai morabedi prika.
Currently Selected:
2 Timoti 4: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission