2 Korin 2
2
1Ana na ene meglmara u kankrika i, siragl pre na prika, na wibo, ene deno muduno aglke kor ere kide ere tenaglka pai dugo, na prisre, nomane kor idre, ene meglmara u kankrika. 2Na ene meglmara u ka gigledi dibo, ene deno muduno yubun denan, ene aglke kor na dena muduna wida di inatnedi eraiglmo? Ta erekraiglkwa. Nono deno muduno ikne ikne kide eran, yoba ta nono deno muduno ere wakai erabuka i ta moglkrabuka. Na taragl yegl mere plau dinabuka pai dugo, na prisre, ene meglmara aglke kor u kankrika.
3Na prika i, ene na gun yenabedi eraiglkwa paugwa pre na udre, kide pribo, i wakai ta paikrabedi prika. Mem swara i paugwa pre na okna ene meglmara u kankrika ba na unaglmere mere yegl, pepa i mina bogl teiga. Te, na prika i, na okuo unaglka igne kide prikre, gun yebo, ene ama na kandre, gun yenaiglmedi prika. Yegl pre na ene meglmara tabre ukrika ba 4na dena muduna yubun dogo, na kide pre, kai ersre, pepa okna ta ene bogl teiga. Na pepa boglka ikra, ene kide praiglmedi pre boglkrika ba na dena muduna podo ene teiga i, enene kanaiglmedi pre pepa ikra boglka.
Yagl ta okna tadaglme erukwa i, ye aglke kor i suna edinaiglkwa paugwa
5Ana yagl ta tadaglme erukwa ikra ye na swara dena muduna ere kide ere narekrukwa ba nono mudu deno muduno ere kide ere norukwa. Ye tadaglmemo i pre ka mere dibo, kide panabuka. 6Ye yegl erukwa ba ene tau mere ere mogl, yagl i ibun teigwa i, pra dudugwa. 7Yegl pre ene ye tadaglmemo pre moglkraiglkwa ba kide kodo tedre, dem muduo si gigle di tenaiglkwa paugwa. Ta manan, ye kide kaima pre, yage si kodinan, kide panabuka. 8Yegl pre na ene di tenagledi prika i, ene yagl i aglke kor deno muduno tomnedi i nogugl edio.
9Na pepa okna ta bogl teiga ikra, na ene eribi, kanagledi pre boglka. Ene mudu duglo boraiglmo mo i ta eribi kanagledi pre boglka. 10Duglo beglkwa pre yagl ta tadaglme erukwa i ka tage teigwa i, wakai erikwa ba erme ene yagl i tadaglmemo kide kodibi, na ama kide kodinaglka. Na kaima ene yagl i bogl aglke kor akie wakai moraiglkwa pre Krais gumuglo mina ye tadaglmemo kide kodo teiga. Yegl pre ene ama ye tadaglmemo ake moglkre, kide kodo teo. 11Ta manan, Satan nono no si pere pere edidre, ere kide ere noro dinabedi prika. I siragl pre nono ye bakaglmo siragl mere paugwa i, pre pogl sumga.
Pol Taitus dokugwa pre dugwa
12Ana na okna ene pepa ikra bogl tedre, okuo ede dumo Troas eiga igne, God na Krais kamo wakai i, yoba di tenatnedi konbauna yauro narukwa. 13Konbauna yauro narukwa ba na agra Taitus ye ene siragl mere erikwa i kandre, ye ede Troas u na di narabuka paugwa ba ye ukrukwa pre na dena muduna yubun dogo, Troas yoba ka mabuno di tenaglka i kodo, Taitus doko ede provins Masedonia eiga.
Krais kuda yobuglo erumara nono akie win sumga
14Na Taitus doko moglka igne, dena muduna yubun dogwa ba na ege ege God di wakai yei te pai moglka. I siragl pre soldia bitno yagl ta kuda yobuglo ersre, soldiamo auro i ede ikne u yugomugl umere mere yegl, God ege ege no omnara ede okna ogo, no Krais bogl u swara omga pre ye mokomugl sika sidre, yoba Krais kamo prisre, Krais pre pogl sinaiglmedi di wan munga. Ye kamo di wan munga i, yoba ede nuglo demene wakai erukwa i gaiglko, inge ede bage bage omere mere yegl, ye kamo ede bage bage ogwa. 15Te, yoba ede nuglo gaiglkwa igne, ede inge ede mitna omere mere yegl, no Krais kogonmo yoba munga i, ye no i pi God togo, God demene wakai erumedi prukwa mere yegl paugwa.
Ana no Krais kamo dumga igne i ede inge mere yegl ede bage bage ome diga i, yoba tau God ere yugwa meglkwa i, ede inge demene erukwa i priko, yoba tau goraiglkwa meglkwa i ama demene erukwa i, prikwa. 16Yoba goraiglkwa meglkwa i, ka dumga ye prikwa igne, taragl ta goglkwa, kubuno erumere mere yegl, kubuno kide erumedi prikwa. I siragl pre no ye goraiglkwa pre dumga. Ba yoba kor moraiglkwa ta meglkwa i, ka dumga ye prikwa igne, taragl kor ta demene wakai erukwa mere yegl demene erumedi prikwa. I siragl pre no ye God bogl kor moraiglkwa pre dumga. Ba kogon yegl ira erabuka kuno erume?
17Ene prio! Yoba mere God kamo digwa i, mige moni noraiglmedi prikwa. Ba God ye no kan moglmedi prisre, Krais yobuglomo mina God kamo swara i keme yoba di tenamnedi prumga.
Currently Selected:
2 Korin 2: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission