2 Korin 3
3
God ka kor di paduglkwa i, ye kogonmo yoba di wan meglkwa
1Na ka erme bogl wiga i, ene siragl we di prime? God kogonmo yoba meglkwa i, Pol aglke kor kagno ake mitna edumedi, ene yegl primo? Ta manugwa. Na yegl ta dikrika. Ba ene tau praiglkwa kagno panan, no munga i pre yoba tau ene kogon pepa, referens mere yegl bogl tebi, ene kere kandre, no kogon wakai erimedi praiglkwa i ta pamo? Mo, ene kogon pepa yegl mere bogl noribi, no ake i pi yoba pere obuno di tenamga i ta pamo? Ta manugwa. 2-3No ka kaima deno muduno mina prumga i, ene meglkwa i, no pepano mere yegl mogl, no mabunono siragl mere paugwa i, ene i nogugl edigwa. Ene no pepano mere yegl meglme diga i, yoba ta ink idre, kobuglo paglkane mina ka bogl atne edimere mere yegl pre ta dikrika ba no ene meglmara kogon erumnara i mina Krais ye ene deno muduno mina pepa boglko, yoba kandre, no kogon wakai erimedi prikwa pre diga. Krais ye ene deno muduno mina kogon erukwa i, God kor aimadi moglkwa i Murubuglomo mina kogon erukwa pre diga.
4Ana Krais erumara i, God no munara kogon eruko, no kogon wakai erumnedi pre gi dumga. 5No nono yobuglno mina taragl swara ta eramga i, kuno ta erekrumga ba God swara no kogon i kuno ere ersre, pamere eraiglmedi ake ple di noruko, no kogon i erumga.
6Te, God yene no kogon eraiglmedi yobuglo bogl norukwa i, ye ka kor ta di noro paduglkwa i, no yoba di tedre, ka kor i mina no kogon eraiglmedi erukwa. God ye ka kor di noro paduglkwa i, okna ye lomo yoba bogl atne edigwa pamere yegl ta paikrukwa. Ka kor i, God Murubuglomo kogon erabuka pre dugwa. Te, ene prio! God lomo i, yoba si goglkwa taragl yogwa ba ye Murubuglomo kogon erukwa i, yoba kor moramga i, norukwa.
7Ana ene prio! God lomo, ye okna kobuglo mina bogl atne edugwa i, kogonmo paugwa. Kogonmo ta paugwa i, geglkwa i nogugl edenabuka pre paugwa. God lomo geglkwa i nogugl edugwa ba ye lomo ugwa igne, God abuglagemo kaima nogugl paugo, Moses kanugwa pre Moses guma dra pogl dugo, Israel yoba ye guma dra kanaiglkwa i, kuno ta erekrukwa. Okuo ye guma dra pogl dugwa i, ede atne ogo, ye kanigwa ba komono kana ta kankrikwa. 8Ana God lomo, geglkwa i nogugl edugwa i, abuglage bogl ugwa pre ene siragl we di prime? Ka kor, God Murubuglomo kogon erabuka pre dugwa i, wakaimo podo pai, ye lomo egre tenabo mo tekrabe? Kaima egre tenabuka pre ka kor i, abuglagemo podo kaima panabuka.
9God ka kor di paduglkwa norukwa i, yoba ye gumuglo mina du moraiglkwa pre dugwa. Ka i, wakaimo podo kaima pai, ye lomo egre atne edumedi pramga paugwa. God lomo yoba ka tage togwa paugwa i, wakaimo tau paugwa ba ka kor win si tekrukwa. 10Ka kaima nono ka kor i prisre, wakaimo podo kide kaima pamedi pramga pre God lomo okna paugwa i, wakaimo kebra pamedi pramga mere yegl paugwa. 11Ana God lomo abuglagemo okna podo paugwa ba erme ede atne omedi kanumga pre nono pre kan eramga i, ka kor aimadi kamin panabuka i, abuglagemo podo kaima pai lo egre atne edumedi pramga.
12Ana no pre gi dumga i, ka kor i, wakai kaima pai, aimadi kamin panabedi prumga pre no kudugl goglkre, yoba ka nogugl di te wan munga. 13No Moses okna erumere yegl ta erekrumga. Okna Moses guma dra abuglage sugwa i, Israel yoba kan meglbi, ede atne pi dinabedi laplap ta idre, guma dra si kegl dumere yegl, no yegl ta erekunga. No taragl swara ta teke yeikre, ka nogugl keme di wan munga.
14-15 Israel yoba okna meglkwa i, ye nomano gigle dugwa pre nomane ikrikwa. Te, Israel yoba erme meglkwa i ama pra, God ka okna di te paduglkwa i, yoba kere teigo, prikwa igne, ye nomano ama gigle dugwa. Ka ebrie mere yegl ta dinaglka i, Moses okna laplap ta idre, guma dra si kegl dugwa laplap ikra, Israel yoba nomano mina si kegl di pai moglko, nomane ikrikwa mere yegl paugwa. Kaima laplap i nomano mina pai moglko, Moses ka boglkwa i yoba kerikwa igne, Israel yoba prisre, nomane ta ikrikwa. Laplap i, yoba ta i eglke edekrikwa ba Israel yoba Krais mina wibi keme, God laplap i, i eglke edenabuka. 16Laplap i, kaima erme pai moglkwa ba yoba ta nomane kor idre, ede Yagl Kade moglmara wigwa igne i God laplap i, i eglke edugwa.
17-18Ana Moses ye Yagl Kade bogl ka dinabugledi ye moglmara ogwa igne, laplap i eglke edugwa. Moses laplap i eglke edumere mere yegl, nono Mudu Murubuglo bogl akie munga pre gumano drano ta were kegl dikrumga. I siragl pre nono yoba ta God Murubuglomo bogl munga i, kane paikre, yoko munga. Te, Moses guma dra pogl dumere mere yegl, Yagl Kade abuglagemo nono gumano drano mina pogl dugo, yoba pere kanigwa. Abuglagemo glas pogl dumere mere pogl dugwa pre diga. Te, Moses guma dra pogl dugwa i, ede atne ogwa ba nono Yagl Kade abuglagemo i nogugl edumga i, ede u kade kade ogwa. I siragl pre Yagl Kade Murubuglomo i, ye nono ere i kor kor edugo, nono u Yagl Kade moglmere mere yegl pi munga.
Currently Selected:
2 Korin 3: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission