Aposel 1
1
Jisas ere mogl, God Murubuglo unabedi ka kaima di te paduglkwa
1-2Agra Teofilus yo, na buk ta erme boglka i, ene bogl teiga. Na buk ta ama okna boglka i mina yegl pre boglka, Jisas kogon siragl mere mabuno bogl erukwa i, ya te, yoba ka siragl mere beke tedre, taragl kane kane ere kodugo, okuo God ye agre i ede heven ibo ogwa i pre boglka. Jisas ede heven ibo ogwa i, okuo ogwa ba okna kana God Murubuglo ye nomane togo, Jisas ye yagl tau kere idre, dedugwa ikra ka kidine tau di togwa. Di te kodugo, okuo God ye agre i ede heven ibo ogwa. 3Jisas giugl podo prisre, gogl, adigl u kor pidre, ye ege 40-pela de makandigle moglkwa. Moglsre, ege tau mere ye dedugwa yoba i meglmara plau didre, ye ka kaima u kor omedi kanaiglkwa pre taragl tau mere obuno di tedre, God yoba kingno mogl, ye suglno morabuka i pre ye ka tau ama di togwa.
4Ana aglke ta Jisas ye dedugwa yoba bogl akie meglko, Jisas ye ka giglede di te, yegl dugwa, Ene dumo Jerusalem kide kodokre, na Nina ene taragl wakai ta tenagledi ka kaima di te paduglkwa ikra pre sugl molo! dugwa. Na ye siragl taragl ene tenabuka i, ene di te kodiga. 5Jon yoba ake nigl atne ede, nigl bugl togwa ba na Nina kuri ta mogl, kogon ere ta ede Mudu Murubuglo ene tenabuka pre sugl molo di, Jisas yegl dugwa.
6Ana ege ta Jisas ye dedugwa yoba i bogl akie meglko, yagl wagle i ere mogl, Jisas kira pogl, yegl di prikwa, Yagl Kade, erme ene Rom yoba no Israel yoba bitno meglkwa i sedidre, okna Israel yoba keme ye no bitno meglmere yegl, ene no Israel yoba munga i, kingno moratno? digwa. 7Yegl di priko, Jisas ye di ikne ede te, yegl dugwa, Ene na king moratne digwa i, na kaima king moraglka ba na king moraglka ege i, Nina yene taragl mudu bitno moglsre, ege ta ere paduglkwa pre ye moglmara swara i pame dugwa. Ye ege ta ere paduglkwa i, ene praiglkwa ta kuno erekrume dugwa. 8Yegl paugwa ba ene prio! dugwa. God Murubuglo i ene meglmara udre, yobuglo tenan, ene na kana i pi yoba di tenaiglkwa. Ene yoba Jerusalem meglkwa i ya distrik Judia mudu suna meglkwa i di tedre, te yoba distrik Samaria we dimara meglkwa i ya te, yoba bage bage uglo koglo koglo meglkwa i, di tenaiglmiwe di, Jisas yegl dugwa.
Jisas ede ikne heven ibo ogwa
9 Ana Jisas ka yegl di kodugo, God ye agre i ede heven ibo ogwa. God ye agre i ede heven ibo ogo, ye dedugwa yoba ikra kan meglkwa. Kan meglko, ye ede kamun kua mina ede atne ogo, kamun kua si torua eruko, ye ta kankrikwa. 10Ana ye Jisas kanamnedi ye omara i toro kan mina ibo ede meglko, yagl suo kugugl gagl kruo eribrika tabre u, ye meglmara plau dibriko, ye kandre, nagino keglkwa. Kandre, nagino keglko, yagl suo i adigl moglsre, 11ye yegl di pribrika, Yagl wagle, ene distrik Galili nem meglkwa i, ene siragl pre adigl mogl, kan mina ibo ede meglme? dibrika. God ye Jisas agre i ede heven ibo ogo, ene kan meglkwa. Ege swara ta ye omere kuno yegl mere, Jisas aglke kor ikne unabiwe di, yegl dibrika.
Yagl ta Judas agaimo inabedi kere igwa
12Ana angelo suo ye Jisas dedugwa yoba yegl di te kodibriko, Jisas dedugwa yoba i, ye muglo Oliv we dimara meglkwa i kide kodo, aglke ede ikne u dumo Jerusalem wigwa. Muglo i, Jerusalem yomara magigl, 1 kilomita mere yegl yogwa. 13Ye aglke ede ikne pi Jerusalem suna pidre, ye ede yugu ta yomara yugugl pidre, bogl mitna ibo kiule ta ye pai pai erimara i, eigwa. Yagl meglkwa i, kagno Pita ya Jon ya Jems ya Andru ya Filip ya Tomas ya Bartolomyu ya Matyu ya Jems, ye Alfius wam moglkwa i, ya te, Saimon, ye Selot yoba ta moglkwa i#1.13 Juda yoba tau ye yugobono ta i nogugl ede, ye kagno Selot we digwa yoba i ye Juda yoba mogl pere edinamndi pre, Rom yoba kuda bogl tenamnedi prikwa yoba meglkwa. Saimon i ye okna yugobono i mina suna moglkwa ba erme ye Jisas dedugwa yoba ta moglkwa. ya te, Judas, ye yagl ta Jems we digwa wam moglkwa. 14Yagl i mudu deno muduno swara yedre, ege ege makai si mogl, kamage ere meglkwa. Yagl i yeigo, abu tau ama yeigo, Jisas mam Maria ya Jisas agiglema ama yeigo, ye ege ege makai si, yegl kede erikwa.
15Ana igne i Jisas pre mediglkwa yoba i, 120 mere yegl ege swara ta akie makai si meglkwa. Makai si meglko, Pita ye meglmara suna i adigl moglsre, ka ta yegl dugwa, 16Na agrama wagle, na yagl Judas, ye yoba Jisas si kane sinaiglmedi agre yugwa i pre dinaglka, ene prio! dugwa. God kamo okna Judas pre beglkwa i, pai inabuka keme paugwa. Siragl ta Judas moglmara okuo plau dinabuka i God Murubuglo okna kana ka i Devit di togo, Devit boglkwa, pramga. 17Na Judas pre diga i, no Jisas dedugwa yoba munara suna i, Jisas ye yagl Judas ama kogonmo erabedi ye kere yugo, okna akie muniwe di, Pita yegl dugwa.
18Ana okna yagl Judas mabuno kide ere, topo yugwa i, ye mige i pi dumo makan ta topo sugwa. Ye makan ta topo sumara i pidre, yage si, dane si bla dugo, dem kane ede meda ogwa. 19Ana Judas yegl ere, yage si goglko, ka wai dugo, yoba mudu dumo Jerusalem kipai meglkwa i prisre, yene kano mina dumo i kagie Akeldama we digwa. Ye kano mina Akeldama we digwa i, mabuno yegl mere, bormai dumo we digwa.
20Ana Pita ye Judas pre ka ta ama aglke kor yegl dugwa, Yoba ta okna ibo buk Giglage mina yegl boglme dugwa,
Yagl i yugumo toglmo wau yenan, yoba okuo ta kipaikraiglme#1.20 Giglage 69.25
di, yegl boglkwa. Ana Judas goglmara ka i plau dume dugwa. Te, buk Giglage mina ama ta boglkwa i,
Yagl i kogon ta erukwa i, yoba pere ta ye agaimo idre, erabiwe#1.20 Giglage 109.8
di, yegl boglmiwe dugwa. 21-22Ka yegl bogl atne edugo, paugwa pre nono erme magigl munga i yagl swara ta Judas agaimo inabedi kere inamga pamiwe dugwa. Yagl ta kere inamga i, Yagl Kade Jisas bogl akie mogl pai erumga igne, yagl ta ye ege ege no munara akie mogl pai erumga i ta kan, kere inamniwe dugwa. Okna John ye Jisas ake nigl atne ede, nigl bugl togwa igne, ede u erme God ye Jisas nono munara kide kodo, ede heven ibo enabedi agre i ede ogwa igne pra, suna i ege ege yagl ta akie wan mogl erumga ta morabuka i pre die dugwa. Yoba swara yegl ta morabuka kere yumun, yagl i no yagl tau bogl akie Jisas u kor ogwa i, yoba di tenamga pamiwe di, Pita yegl dugwa.
23Ana Pita yegl dugwa pre ye ere mogl, yagl suo miurka ye swarano ta kere inamnedi di padiglkwa. Yagl ta kagie suota paugwa. Yoba ye kagie Josep we didre, Barsabas we didre, te, Jastus ama we digwa. Te, yagl ta kagie Matias we digwa. 24-25Ye yagl suo i swarano ta kere i suna edinamnedi ye ere mogl, kamage ere, yegl digwa, Yagl Kade yo, yoba mudu ene deno muduno kan pogl si kodinga pre ene yagl swara ta Judas agaimo inabedi kere inga i, i nogugl ede noro digwa. Ene yagl Judas okna kere idre, kogon tenga i, ye kide kodidre, ede pi dumo kide enabara i, pi kodugwa pre dumniwe digwa. 26Ye kamage yegl ersre, Yagl Kade ye ira kere yugwa i kanamnedi ere mogl, kobuglo suo mina mak pere pere ta ere padigl, ede atne edigwa. Ede atne edidre, swara ta i meda ede, kanigwa i, Matias pre mak sigwa ikra paugo, kanigwa. Kanigwa pre yagl Matias i ye Jisas dedugwa yoba 11-pela meglmara suna i dedigo, ye Judas agaimo yugo, kogon akie erikwa.
Currently Selected:
Aposel 1: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
