Aposel 2
2
God Murubuglo Ugwa
1 Ana ege kade Pentikos#2.1 Ka Grik mina ka Pentikos mabuno paugwa, 50-pela De. I siragl pre Israel yoba ye Pasova nedre, wakan 7-pela mo 50-pela de mogl, kaya mokna podo i ama neigwa.yogo, Jisas pre mediglkwa yoba mudu yugu swara ta yugugl makai si meglkwa. 2Makai si meglko, ir waga podo kide ta mu dumere mere yegl, mu ta heven ibo di ede atne ugwa. Ede atne u ye yugugl ame didre, makai si meglmara i mu podo kaima dugo, ye mudu prikwa. 3Prisre, ye kanigwa i, taragl ta doga drabie mere yegl, udre, ede pere pere pi, ye swara swarade meglmara pi tebe de paigwa. 4De paigo, God Murubuglo ye mudu si kau si tedre, ere edugo, yene kano dikre, ka pere pere digwa.
5Ana ege kade yogwa pre Juda yoba tau God kuduglmo geglkwa Jerusalem mogl pai meglkwa. Yoba i, kantri pere pere uglo koglo koglo kipai meglkwa i ede Jerusalem wigwa. 6Pai meglko, mu podo ikra dugo, yob mere kide prisre, ede wigwa. Wigo, Jisas pre mediglkwa yoba ikra ye drano yake togo, ka pere pere di meglko, yoba wigwa ikra prisre, ye prikwa i, yoba ta ye yoba tau wigwa i, kano pamere i dugo, te yoba ta ye yoba tau wigwa i, kano pamere i dugo, yoba ye kantri pere pere aglo mogl wigwa i, kano pamere i digo, prikwa. Ye swarade yoba kano pere pere pamere i digo, ye no kano pere pere pamere i dimedi prisre, nagino podo keglkwa. 7Ye nagino podo kogl, yene di ikne ikne ede, yegl digwa, Yoba i, ye mudu distrik Galili nem mam meglkwa ba 8siragl eruko, ye nono kano pere pere pamere i dime? digwa.
9 Yoba ye u ka digo pre meglkwa i, tau dumo makan Partia ya Midia ya Elam kipai mogl, wigo, te tau dumo makan Mesopotemia ya distrik Judia kipai mogl wigo, tau provins Kapadosia ya Pontus ya Esia ama kipai mogl, wigwa. 10Te, tau dumo makan Frigia ya Pamfilia kipai mogl, wigo, tau kantri Isip kipai mogl, wigo, te tau dumo makan Libia we dimara suna, taun ta Sairini yomara i magigl kipai mogl wigwa. Te, tau ama dumo Rom mogl, okna kana ede u Jerusalem ege sugunagle ta moramnedi wigwa. Ye tau Juda yoba meglko, tau Juda yoba moglkrikwa ba ye Juda yoba mabunono duglo bogl, ye pra, Juda yoba mere yegl meglkwa. 11Te, tau dumo makan ta mudi nigl suna yogwa, Krit we digwa i, kipai mogl wigo, tau dumo makan Arebia ama kipai mogl, wigwa. Yoba mudu makai sigwa i ere mogl, yegl digwa, Yoba i, ye God yobuglo ere, taragl kane kane erukwa i ye nono kano pere pere pamere i mina ka digo, prumne digwa. 12Yegl didre, ye wai kugl, nagino koglsre, yene di ikne ikne ede pre, yegl digwa, Aya, taragl podo plau dugwa i, mabuno siragl mere pame? di, yegl digwa. 13Ba yoba tau ere mogl, pre mediglkwa yoba kenaglno si, Ye wain nuglo mere kide nedre, spak erime di, yegl digwa.
Pita yoba ka mabuno di togwa
14Ana yoba tau yegl digo, Pita ere mogl, Jisas dedugwa yoba 11-pela ikra bogl akie adigl meglko, Pita ka podo didre, ye yoba mere kide makai si meglkwa ikra yegl di togwa, Ene Juda yoba meglkwa ya te, ene yoba mudu dumo Jerusalem kipai meglkwa i, ene prio! dugwa. Taragl ta plau dugo, ene kanigwa i, mabunomo ene di tebo, praiglmiwe dugwa. 15Yagl i, ene tau ye spak erimedi prikwa i, ye spak ta erekrikwa. Siragl pre erme i, 9 klok tagna mogl yogwa pre tagna mogl i wain nuglo nenaiglkwa i ta kuno erekrumiwe dugwa.
16Taragl ta plau dugo, ene kanigwa i, God kamo kep yoba ta kagie Joel we digwa i, ka ta okna boglkwa i pai yumiwe dugwa. Ye ka yegl di boglkwa,
17God yegl dugwa, Ege okuo, taragl mudu dudinagledi erabuka igne,
Na ere mogl, Murubuglona yoba mudu meglmara dedenagle dugwa.
Na dedibo, yoba mudu meglmara enan, ene wanoma ya abroma na kana kep ere dinaiglkwa.
Dibi, te ene yagl kulu meglkwa i, gumuglnomugl eran, kanibi, te, ene yagl kidagl meglkwa i ugl kubu kane kane kanaiglmiwe#2.17 Joel 2.28-32
di, God yegl dume dugwa. 18Yegl didre, ama God yegl dume dugwa,
Igne i, na ere mogl, na Murubuglona dedibo, na niglna kogona yoba mudu meglmara ka kaima enabuka. Dedibo, na niglna kogona yagl ya abu meglmara enan, ye na kana kep ere, yoba di tenaiglmiwa. 19Te, na ama diu tau kamun mitna ibo ya dumo makan mina eraglka. Eribo, yoba ye bormai ya doga ya te, ede inge podo kide kaima plau dinan, kanaiglkwa. 20Te, ade mim eran, ba ake bormai ede, ede u gogl enabuka. Yegl eran, okuo i na Yagl Kade moglka i, egena podo kide kaima, na yoba ka tage tenaglka ege i, unabuka. 21Ana yoba ta ere mogl, na Yagl Kade moglka i, ye na ere inabedi agle ta dinan, na ye ere inaluwe#2.21 Joel 2.28-32
di, God yegl di togo, yagl Joel ikra boglmiwe di, Pita yegl dugwa.
22Ana Pita ka yegl didre, ye ka ta ama yegl dugwa, Ene Israel yoba meglkwa i, na ka ta dinaglka i, ene prio! dugwa. Na Jisas, ye dumo Nasaret nem moglkwa i pre dinaglka. God ye Jisas yobuglo togo, Jisas okna ene meglmara suna kimagl ya diu kane kane eruko, enene pre kan erikwa. Ye kimagl ya diu kane kane erukwa i, ene God ye dedugo, umedi kan pogl sinaiglkwa pre kimagl yegl erume dugwa.
23Ana Jisas goglkwa i, God yene oknayene ibo pre kan ersre, siragl eragledi di paduglmere i, ye ersre, Jisas ene ogono mina yogwa. Ene ogono mina yogo, ene Jisas si goraiglmedi ye i pi Rom yoba, ye God lomo pre kan erekrikwa meglmara teigo, ye ogo kagle ede prak mina padigl, nil sidre, si geglmiwe dugwa. 24Ye Jisas si geglkwa i, ye giugl podo kide prisre, goglkwa ba ye aimadi gorabuka ka kaima ta kuno erekrukwa. Yegl pre God ye ere i kor edugo, adigl u kor omiwe di, Pita yegl dugwa.
25Pita yegl didre, ka ta ama yegl dugwa, King Devit i, okna ibo Jisas ka dinabere ye dra idre, ka ta yegl boglme dugwa,
Yagl Kade ege ege na moglmara magigl moglko, na kanie dugwa. Ye na moglmara mogl narukwa pre na yoba mo taragl kane kane ta kudugl gogl tekragle dugwa. 26Te, ye na moglmara mogl narukwa pre na dena muduna mina gun yei tedre, ye di wakai yei teiwe dugwa. Ye ama na ogona nagna mina ere wakai ere narabuka i, pre gi die dugwa. 27Yegl didre, ye ama agle di, yegl dugwa, God yo, na pre gi diga i, mabuno yegl pamiwe dugwa. Na ene kogonen eraglka pre ene na i pere edingo, moglka i, na goraglka ba ene na ta kanige etn, na kiana yoba geglkwa pai meglmara aimadi ta pai moglkrabuka. Te, na ogona gagna maugl sinaiglkwa ba maugl sinaiglmara i ta buglkrabiwe dugwa. 28Na goglbo, ene na ere i kor edinatnga i, ene obuno di nare kodinga pre na adigl u kor pidre, ene bogl akie morabuglka i, gun podo yenaluwe#2.28 Giglage 16.8-11
di, Devit ye Jisas dinabere dra idre, okna ibo yegl boglme dugwa.
29Ana Pita ka tau yegl didre, ye ka ta ama yegl dugwa, Na agrama wagle, na ene ka kaima di teiwe dugwa. Nono kowano awano Devit ka yegl bogl atne edugwa i, ye yene pre dikrukwa i nogugl paugo, nono kamniwe dugwa. Devit goglko, yoba okna ye maugl sigwa i, ye giglmo pene erme yogo, kamniwe dugwa. 30Yegl pre Devit ye God kamo kep yoba ta moglkwa pre ye ka boglkwa i yene pre boglkrukwa ba ye gawamo ta unabuka i pre boglkwa. God ye Devit di te padigl, Devit gawamo ta okuo ye king moglmere yegl, king morabedi ka giglede di te paduglkwa i, Devit pre kan ersre, ka yegl boglkwa. 31Ye boglkwa i, taragl okuo plau dinabuka i pre kan ersre, God Kere Yugwa Yagl goglsre, adigl u kor enabuka i pre dugwa. Jisas gorabuka ba God ye kiamo yoba geglkwa pai meglmara aimadi pai morabedi kanige erekrabuka i, ya te, ye ogo nagie buglkrabuka i pre Devit okna yegl boglme dugwa.
32Pita ka yegl di kodidre, ama yegl dugwa, Ana yagl Jisas i, God ye ere i kor edugo, no mudu kadre, ene di tomniwe dugwa. 33God ye ere i kor edidre, agre i ede heven ibo ogwa. Agre i pidre, kagie kade te, ye ogo wo kra ame di morabedi dedugwa. Dedidre, ye okna ka kaima di te paduglmere i ere mogl, God Murubuglo yoba tenabedi Jisas tome dugwa. Togo, Jisas ere mogl, God Murubuglo no munara si kau si norabedi noruko, taragl mudu erme ene kanigwa ya prikwa i, God Murubuglo taragl i erumiwe dugwa.
34Yegl didre, Pita ama yegl dugwa, God Devit ta agre i ede heven ibo pikrukwa ba Devit ka ta okna boglkwa i, Jisas pre yegl boglkwa,
Neno Kade ere mogl, na Yaglna Kade yegl di togwa,
Ene ogona wo kra ame di moglo.
35Na ene kudanen ikne yobuglo ere tedre,
kagln mina atne edinaluwe#2.35 Giglage 110.1
di, God ye Jisas pre yegl dugo, Devit ye God dumere bogl atne edumiwe dugwa.
36Pita ka yegl didre, ka di pi dudumara i yegl dugwa, Yegl pre ene ya Israel yoba mudu pre pogl sinaiglmiwe dugwa. Yagl Jisas, ene ede prak mina si geglkwa i, God ye Kere Yugwa Yagle moglsre, nono Yaglno Kade morabedi kagie kade tomiwe di, Pita yegl dugwa.
Yoba mere kide Jisas pre mediglkwa
37Ana Pita ka yegl di kodugo, yoba makai si mogl, ye kamo prikwa ikra, ye deno muduno mina boglko, ye kide pre, nomane podo sidre, ye Pita ya Jisas dedugwa yoba mudu ikra di pre, yegl digwa, Agroma wagle, no siragl eramne? digwa. 38Yegl digo, Pita di ikne ede te, Ene swara swarade God ene tadaglmeno gugl ede norabedi nomano yake teo. Jisas kaima God Kere Yugwa Yagl moglmedi nomano tedre, nigl biglbi, God ye Murubuglomo yoko kaima tenabiwe dugwa. 39Yagl Kade, nono Godno moglkwa i, ye Murubuglomo yoba tenagledi ka kaima di te paduglkwa i, yoba mudu ira ta God agle dinabuka, pre, unabuka i, ye Murubuglomo tenabuka pre dumiwe dugwa. Na erme diga i, ene ya ene gawanoma ya te, yoba mudu dumo eglke pere pere kipai meglkwa, i pre diwe di, Pita yegl dugwa.
40Ana Pita ka yegl di kodidre, ye ka kidine tau mere ama didre, yoba makai si meglkwa i ka giglede di te, Ene kan kun erio! dugwa. Juda yoba yugobuno erme meglkwa i, mabuno kide kaima boglsre, u kide pi kodigwa. God ye ka tage tenabara i, ene ama akie ka tage te dinabiwa! Ene teke ede eglke wio dugwa. 41Pita yegl di togo, yoba mere kide ye kamo i prisre, pre mediglkwa. Pre mediglsre, nigl biglkwa. Yegl erikwa pre ege swara i mina yoba 3,000 mere yegl, Jisas pre mediglkwa yoba yugobuno meglmara i ede suna wigwa.
Jisas pre mediglkwa yoba i, deno muduno swara yei, meglkwa
42Ana Jisas pre mediglkwa yoba i, ege ege Jisas dedugwa yoba ka mabuno di teigwa i prisre, akie makai sidre, Jisas goglkwa poglo di pramnedi bret akie buko di nedre, akie kamage ere mogl, erikwa. 43Yegl eriko, Jisas dedugwa yoba ikra ama God yobuglomo mina kimagl ya diu kane kane ere meglkwa pre yoba mudu Jerusalem kipai meglkwa i, God kuduglmo geglkwa. 44Te, yoba Jisas pre mediglkwa i, deno muduno swara yedre, mudu akie makai si meglkwa. Yegl ersre, ye ama ye yene ake ple di ikne ikne ede, taragl ere neigwa i, te ikne ikne ede, erikwa. 45Yegl ersre, te ye meglmara suna i, yoba tau kaya mokna mo taragl ta ye meglmara yeikrukwa igne i yoba tau ye ere mogl, makano ya bonaganano ki mige boglsre, mige i pi yoba i ta idre, ere nenaiglkwa pamere yegl teigwa. 46Yegl ersre, ye ege ege tawa teigwa yugu yomara i makai sidre, te yoba kipai meglmara i ama makai si mogl, Jisas goglkwa poglo di pramnedi bret buko di neigwa. Yegl ersre, kaya mokna ki ama swara mogl nedre, gun yei, deno muduno swara yedre, erikwa. 47Ye yegl ersre, ye ege ege God kagie kade te meglko, Juda yoba mudu ye wakai kanigwa. Te, yoba kor ege ege Jisas pre mediglko, Yagl Kade ye ere idre, ye Jisas yugobunomo meglmara i, i suna edugo, meglkwa.
Currently Selected:
Aposel 2: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
