Aposel 10
10
Angelo ta yagl Kornilius moglmara plau dugwa
1Ana yagl ta taun Sisaria we dimara moglkwa, kagie Kornilius we digwa. Yagl Kornilius i, ye Rom soldia 1,000 mere yegl meglmara suna i moglkwa. Soldia 1,000 mere meglkwa i, kagno Itali nem we di, yegl digwa. Ye soldia meglmara suna i moglsre, soldia ama 100 ye suglno moglkwa. 2Ana yagl Kornilius i nem agiglema bogl God kuduglmo goglsre, God we di pre wan meglkwa. Te, Kornilius ama goduglme yoba ki ege ege ake ple di tedre, ege ege God kamage ere tedre, erukwa.
3 Ana aglke ta poko dugo, 3 klok mere yegl yogo, Kornilius ye gumuglomugl eruko kanugwa i, God angelomo ta ye moglmara ugo, ye gumuglo mina kaima kanugwa. Angelo i ye moglmara udre, ye kagie dagl, Kornilius yo! dugwa. 4Yegl dugo, Kornilius ere mogl, angelo i toro kan moglsre, kudugl podo gogl, Yagl kade yo, ene do dugwa. Yegl dugo, angelo i ye di te, yegl dugwa, Ene God kamage ere tedre, yoba goduglme ki ake ple di te, ere motnga i, God kan moglmiwe dugwa. 5Yegl erukwa pre ene erme yagl tau dedin, ye ede pi taun Jopa pidre, yagl ta kagie Saimon Pita we digwa i agre yu ene motnga unaiglmiwe dugwa. 6Saimon Pita ye yagl ta mudi nigl bina kipamara i, akie pai miurka. Yagl i, ye agl bugla nagino kugl yauro, ere wakai erukwa yagl ta moglkwa. Yagl i kagie ama Saimon we dimiwe di, angelo yegl dugwa. 7Ana angelo i ka yegl di kodidre, ede ogo, Kornilius ere mogl, ye niglmo kogonmo yagl suo agle dugo, ubrika. Te, ye ama soldia swara ta ege ege Kornilius kogonmo ere tedre, ama God we di pre, wan moglkwa i agle dugo, ugwa. 8Ye yagl suota i agle dugo, wigo, ye taragl mudu plau dugwa i wakai ere boglo si tedre, ede dumo Jopa ikra enaiglmedi dedugo, ye ede eigwa.
Pita gumuglomugl eruko, kanugwa
9Ana tagugo i, yagl suota ikra konbauna wan pi meglko, belo mere yegl ede dumo Jopa magigl eigwa. Ana igne i Pita ye yugu ta pamara ikra ede kuglo ibo pi, kuglo ibo mogl, kamage eragledi ede ogwa. 10Ye pi kamage ere moglsre, ye kidan gogl, kaya mokna nenagledi prukwa. Yegl prukwa ba yoba kaya mokna gaiglkwa i dekruko, Pita sugl moglko, ye gumuglomugl eruko, kanugwa. 11Ye kanugwa i, kamun mitna ibo ede u koglo koglo ogo, lap podo ta yoba lap puduo 4-pela i mudu kan kogl ake mogl, lap i ede atne makan mina edigwa mere yegl kanugwa. 12Ana lap podo yomara atne i, agl bugla ya dua kabu kane kane ya te, gur toki kane kane ya kua kane kane ama meglko, Pita kanugwa. 13Taragl yegl atne meglko, Pita kan moglko, God ka ta dugo, Pita prukwa. God ka ta dugwa i, yegl dugwa, Pita yo, ene adigl, taragl kanga i si kei no! dugwa. 14Yegl dugo, Pita ye di ikne ede te, yegl dugwa, Yagl Kade yo, na yegl ta erekragle dugwa. Na ege swara ta taragl ta nenaglka mawagl pamara i, ta ne kankrie dugwa. 15Yegl dugo, God ye aglke kor di te, Na taragl ta erme mawagl paikrume diga i, ene mawagl pame dikro! dugwa. 16Yegl dugo, ana Pita ya God ye ka dibrika i, Pita ye dumere di pai moglko, God ama dumere dugo, ye ege suota ka dibrere yegl di pai miurka. Ege suota dibriko, lap podo ikra tabre kana ede ikne kamun mitna ibo ogo, Pita aglke kor ta kankrukwa.
17Ana Pita ye gumuglomugl eruko, taragl ta kanugwa i, mabuno siragl mere paugwa i pragledi kina gudu moglkwa. Kina gudu pre moglko, yagl suota Kornilius dedugo, wigwa ikra, tabre kana u togl dra mina adigl meglkwa. Ye yoba kira pogl pre, yagl Saimon ikra aglo mere kipame digo, yoba ye di teigo, prisre, wigwa. 18Ye u togl dra mina adigl moglsre, yoba yugugl meglkwa i agle di pre, Yagl ta kagie Saimon Pita we digwa i, magigl i pai moglmo? digwa. 19Ana Pita ye gumuglomugl eruko, taragl ta kanugwa ikra mabuno siragl mere paugwa i pragledi kina gudu moglko, God Murubuglo ye di te, yegl dugwa, Ene pro. Yagl suota ene pre doko wimiwe dugwa. 20Ene adigl, ede atne en, yagl suota i bogl akie ede pio dugwa. Siragl pre na nana ere mogl, ye dediga pre ene ye bogl akie enaiglkwa i, kinan suo suo yekran, ede en, akie enaiglmiwe di, yegl dugwa.
21Ana God Murubuglo yegl dugwa pre Pita yugu kuglo ibo moglkwa i kide kodo, ede atne u yagl suota togl dra mina adigl meglmara i pidre, ye di te, yegl dugwa, Yagl wagle, ene yagl ta dokigwa i, na moliwe dugwa. Yegl didre, ye kira pogl, Ene siragl pre wime? di, yegl dugwa. 22Yegl dugo, ye di ikne ede te, yegl digwa, Yagl ta kagie Kornilius we digwa i, no dedugo, ene motnara umniwe digwa. Yagl Kornilius i, ye Rom soldia meglkwa i, ye 100 mere yegl ye suglno moglkwa. Te, ye yagl du kaima mogl, God kuduglmo goglko, Israel yoba mudu ye wakai kanime digwa. Ege swara ta God angelomo ye moglmara pi di te, ye ene agle dinan, ene pi ye ka ta di tenatnga pre God angelomo ye di togo, no dedugo, umniwe digwa. 23Yegl digo, Pita ere mogl, yagl suota i akie panamnedi Ede yugugl wio dugo, ye ede yugugl pi Pita yugu ta pamara ikra akie paigwa. Ye padre, taganamogl akie ede ikne enamnedi eigwa. Ede eigo, Jisas pre mediglkwa yoba tau ama dumo Jopa kipaigwa i ama ye bogl akie ede eigwa.
Pita ede pi Kornilius kipamara ogwa
24Ana Pita ye yoba i bogl akie konbauna pi mogl, ege swara ta konbauna bage pai, ege ta mina pi dumo Sisaria plau digwa. Ana yagl Kornilius ye Pita agre yunaiglmedi kie ere moglkwa. Yegl ersre, ye okna kana nem agiglema ya ye kabaglema i nogwa ta meglkwa i agle dugo, ye ama u makai si meglkwa. 25Ana Pita ye yoba tau bogl akie eigwa ikra pi dumo Sisaria plau digo, Pita ye Kornilius kipamara ede yugugl ogwa. Ye ede yugugl ogo, Kornilius u Pita moglmara udre, yage kagle mina kobragai padre, kagie kade tenagledi erukwa. 26Yegl erukwa ba Pita ye ogo ake adiglsre, ye di te, Adiglo! dugwa. Didre, Na ene yoba meglmere yegl wiwe di, yegl dugwa. 27Yegl dugo, yagl Kornilius i aduglko, ye Pita bogl ka kuri ta di pribriko, okuo Pita ye yoba tau bogl akie wigwa ikra mudu ede yugugl eigo, yoba tau mere yugugl makai si meglko, Pita ye pi kanugwa.
28Ana Pita ede yugugl pi mogl, yoba mere makai si meglkwa i kandre, ye ere mogl, yegl di togwa, Yagl abu wagle, no Juda yoba munga i, no yoba ta Juda yoba moglkrikwa i bogl wandre, yugugl akie moramga i, mawagl paugwa i, enene pre kan erime dugwa. Yegl paugwa ba God na obuno di narukwa i, na yoba swara ta bogl akie moramga i, mawagl ta paikrume di, na yegl obuno di narukwa. 29God mabuno yegl mere obuno di narukwa i pre ene na agle digo, na mane dikre, pra ede wiga. Yegl pre erme ene siragl pre na agle digwa i, ene dibi, na praluwe di, Pita yegl dugwa.
30Ana Pita ka yegl di kodugo, Kornilius ye di te, yegl dugwa, Ege suota ede ogwa i, taragl ta na moglmara plau dumiwe dugwa. Nono erme ade kwia 3 klok munere yegl mere na kamage ere moglko, yagl ta kuguglmo gaglmo pogl di yogwa u na gumuglna mina adigl moglsre, 31kagna dagl, yegl dume dugwa. Kornilius yo, ene kamage etnga i, God prisre, te, ene yoba goduglme meglkwa ake ple di te motnga i, God kandre, pre moglmiwe dugwa. 32Yegl pre ene yoba tau dedin, ye ede dumo Jopa pi yagl ta kagie Saimon Pita we digwa i agre yunaiglmiwe dugwa. Yagl Saimon Pita i, ye yagl ta mudi nigl bina kipamara pai moglkwa. Yagl i, ye agl bugla nagino kugl yauro, ere wakai erukwa yagle moglme dugwa. Te, yagl i ye kagie ama Saimon we dimiwe di, angelo yegl dume dugwa. 33Angelo i yegl dugwa pre na oglade yoba ta ene agre yunaiglmedi dedie dugwa. Na ye dedigo, ye pi ene di teigo, ene unga i, wakai etniwe dugwa. Yegl pre ana erme no God gumuglo mina makai si moglsre, Yagl Kade ene ka siragl mere no di noratnga pre dugo, unga i, no pramnedi sugl muniwe di, yagl Kornilius i yegl dugwa.
Pita ere mogl, Kornilius yobama Jisas kamo di togwa
34Ana Kornilius yegl di kodugo, Pita ere mogl, yoba makai si meglkwa i yegl di togwa, Na erme prika i, God ka kaima yoba mudu mabuno swara ere tomiwe dugwa. 35Yoba yugobuno pere pere mudu meglmara suna i, yoba ta God kuduglmo gogl, ye yoba eraiglmedi prumere erabuka i, God ye wakai kanabuka. 36Ana God kamo ye no Israel yoba praiglmedi di norukwa i, ene yoba yugobuno pere magigl meglkwa i ama tau pre kan erime dugwa. Ye kamo i mina yegl di norume dugwa, Jisas, ye yoba mudu Yaglno Kade moglkwa i, yoba ta Jisas pre mediglbi, ye God bogl deno muduno swara yenaiglmiwe di, God ye kamo mina no yegl di norumiwe dugwa.
37Te, taragl podo mere kide, distrik Judia suna plau dugwa i, ene ama pre kan erikwa. Yagl Jon i ye komono kana u yoba ake nigl atne ede, nigl bugl tenagle didre, kogonmo dumere yegl erukwa. Ana Jon kogon eruko, mokomugl i taragl podo tau distrik Galili suna i plau dugo, te distrik Judia suna bage bage ama plau dugo, ene pre kan erimiwe dugwa. 38Na ka diga i, Jisas, dumo Nasaret nem moglkwa i, taragl kane kane erukwa pre diga. God ere mogl, Jisas kere i pere ede, ye Murubuglomo tedre, yobuglo togwa. Tedre, ye moglmara ama mogl tedre, eruko, Jisas wan ede bage bage pidre, yoba ere wakai ere tedre, te, Satan yoba tau ake gi di moglsre, ere kide ere togwa i, ye ake wakai ere tomiwe di, yegl dugwa.
39No tau Jisas duglo bunga yoba munga i, no ye taragl kane kane dumo Jerusalem ya te, Juda yoba dumono mudu suna erukwa i, no kadre, yoba di te wan muniwe dugwa. Ana Juda yoba ere mogl, Jisas ede prak mina si geglko, 40ege suota atne pai moglko, God ye ere i kor edugo, aduglkwa. Ye aduglko, God ama yoba tau ye kanaiglmedi erukwa. 41Yoba mudu ye kankrikwa, ba no yoba tau God no okna kana ye kandre, kamo i pi yoba di tenaiglmedi kere i pere edugwa i, no ye kamga. Ye goglsre, adigl u kor ogo, no ege tau ye bogl akie moglsre, kaya mokna ki akie nomga.
42Te, Jisas ama no yoba di tedre, yoba yegl di teo dugwa. God ere mogl, Jisas swara yoba Jasno morabedi dedugwa. Yoba kor meglkwa ya te, yoba geglkwa i, ye swara Jasno morabedi dedumiwe di, yegl di teo di, di norukwa. 43Te, God kamo kep yoba okna meglkwa i, ye mudu Jisas pre didre, yegl digwa, Yoba ta Jisas pre medran, God ye Jisas kogon erumara i mina tadaglmemo gugl ede tenabiwe di, ka kep yoba okna yegl dimiwe di, Pita yegl dugwa.
Yoba tau Juda yoba moglkrikwa i, God Murubuglo igwa
44Ana Pita ka yegl didre, ka tau ama di pai moglko, Mudu Murubuglo ede atne u yoba ye Pita ka dugwa pre meglkwa ikra, meglmara ugwa. 45-46Mudu Murubuglo ede atne u yoba i meglmara ugo, yoba i ka pere pere didre, God kagie kade teigo, Juda yoba tau Jisas pre mediglkwa, ye Pita bogl akie wigwa ikra prisre, nagino kogl, yegl di prikwa, God yoba yugobuno pere ta ye Juda yoba moglkrikwa i ye Mudu Murubuglo yoko kaima tomiwedi prisre, nagino keglkwa. Nagino keglko, Pita ye ere mogl, Juda yoba akie wigwa ikra yegl di togwa, 47Yoba i nono Mudu Murubuglo yumnere mere yegl ama igwa pre ye nigl buraiglkwa i, nono mane ta dikramniwe dugwa. 48Pita ka yegl didre, ye Kornilius yobama bogl di te, yegl dugwa, Ene Jisas, God Kere Yugwa Yagle pre mediglkwa i, i nogugl edinamnedi nigl buraiglmiwe dugwa. Pita yegl dugo, yoba ikra nigl buglsre, ye Pita di te, yegl digwa, Nono kuri ta pai mun, ene okuo ede ikne enaiglmiwe di, yegl digwa. Yegl digo, Pita pra we dugo, ye ege tau akie meglkwa.
Currently Selected:
Aposel 10: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
