Aposel 9
9
Sol Jisas pre meduglkwa
1Ana Yagl Kade Jisas nagiglema i, yagl Sol ikra ye si goragledi ka giglede di pai mogl, ye ede pi yagl ta tawa teigwa yoba bitno moglkwa i moglmara pidre, 2yagl i ye pepa tau bogl naran, ye idre, ede pi taun Damaskus we dimara i, enagledi kira pogl prukwa. Pepa i, ye i pi Juda ka mabuno yugu sugl meglkwa yoba i tedre, yoba tau Jisas konbaunamo duglo beglkwa ta moraiglkwa i, yagl ya abu pra si kane si yu dumo Jerusalem edenabuka pre kira pogl prukwa. 3Yegl kira pogl pruko, tawa teigwa yoba bitno moglkwa i pepa bogl togwa. Pepa bogl togo, Sol idre, ye yagl tau bogl akie ede dumo Damaskus enamnedi akie ede eigwa. Ye ede pi taun Damaskus magigl eigo, heven ibo abuglage podo ta si pogl di, ede makandigle u, Sol moglmara edugwa. 4Edugo, Sol yage makandigle sidre, prukwa i, yoba ta ka yegl dugo, prukwa, Sol yo, ene siragl pre na ere kide ere nare motne? dugwa. 5Yegl dugo, Sol ye di ikne ede, Yagl Kade yo, ene ira motne? dugwa. Yegl dugo, Yagl Kade ye di te, yegl dugwa, Na Jisas, ene ere kide ere nare motnga i, moglka. 6Ba erme we, ene adigl ede taun suna po! dugwa. Ene taun suna en, yoba ta ere mogl, ene siragl mere eratnga paugwa i, ene di tenan, pratniwe di, yegl dugwa.
7Ana yagl tau Sol bogl akie konbauna eigwa i, ye kudugl gogl, ka ta dikre, adigl kan meglkwa. Ye prikwa i, yoba ta ka dugo, nugu ebrie prikwa ba yoba i ta moglko, kankrikwa. 8Yegl pre ye kan meglko, Sol ye adigl, gumuglo pine dugwa ba ye gumuglo kin yogo, taragl swara ta kankrukwa. Yegl erukwa pre yagl tau ye Sol bogl akie eigwa i ye ogo ake i pi Damaskus suna edigo, 9ye ege suota dumo i pai moglko, gumuglo kin yei pai moglko, ye nigl ya kaya mokna ta nekrukwa.
10Ana dumo Damaskus suna i, Jisas nagigle ta moglkwa, kagie Ananaias we digwa. Yagl Ananaias i gumuglomugl eruko, kanugwa, Yagl Kade ye gumuglomugl erumara i ye agle di, Ananaias yo dugwa. Yegl dugo, Ananaias di ikne ede, Yagl Kade yo, na moglka iwe dugwa. 11Yegl dugo, Yagl Kade ye di te, yegl dugwa, Ene adigl ede pi konbauna ta kagie Konbauna Du we dimara i pidre, yagl ta kagie Judas we digwa kipamara i po! dugwa. Yagl i kipamara pidre, yagl ta dumo Tarsus nem moglkwa, ye kagie Sol we digwa i doko kano! dugwa. Yagl Sol i erme na kamage ere narukwa. 12Ye kamage ere narsre, gumuglomugl eruko, kanugwa i, ene ye moglmara pi gumuglo kin yogwa i, aglke kor kanabedi ogon i pi ye akingo, kanugwa. Yegl pre ene ye gumuglomugl eruko, kanumere yegl pi eratniwe di, yegl dugwa.
13Ana Yagl Kade ka yegl di togo, Ananaias ye di ikne ede te, yegl dugwa, Yagl Kade yo, yoba tau mere yagl Sol i pre digo, prika. Ye ene yobanma dumo Jerusalem meglkwa i ka kaima ere kide ere tome digwa. 14Te, ye ede dumo magigl ugwa i, tawa teigwa yoba bitno meglkwa i, ye dede, yoba ta ene no ere inatnedi agle dinaiglkwa i, ye si kane sinabedi dedigwa, umiwe dugwa. 15Ananaias yegl dugwa ba Yagl Kade ye aglke kor di te, yegl dugwa, Ene ede po dugwa. Na yagl Sol i na kogona erabedi kere iga, moglme dugwa. Ye na kana i pi yugobuno pere pere, ye Israel yoba moglkrikwa i di tedre, te ye kingno di tedre, Israel yoba ama di tenabiwe dugwa. 16Ye na kana i, yoba di tenagledi yubun tau mere inabuka paugwa. Ye yubun siragl mere inabuka i, na ye di tebo, prabiwe di, yegl dugwa.
17Ana Yagl Kade yegl dugwa pre Ananaias ere mogl, ye kipamara kide kodo, ede pi yagl ta kagie Judas we digwa ikra kipamara pidre, Sol yugugl moglmara ogwa. Ye Sol moglmara pidre, ye ogo i pi Sol ake, yegl dugwa, Agra Sol yo, na Yagl Kade Jisas, ene konbauna bage tegigl yei, kanga i, na dedugo, wiwe dugwa. Ye na dede, ene gumugln kin yogwa i, aglke kor kanatnga pre ya te, Mudu Murubuglo ene motnara si kau si tenabuka pre na dedugo, wiwe di, yegl dugwa. 18Yegl dugo, ege swara i mina buglo bagle nagie kidine mere yegl gumuglo mina paugwa yage sugo, ye gumuglo aglke kor u wakai ogo, kanugwa. Ye kandre, adigl, ede pi nigl buglkwa. 19Nigl bugl kodo, ye kaya mokna tau nedre, yobuglo kor dagl yugwa.
Sol dumo Damaskus yoba Jisas kamo di togwa
Ana Sol ege tau Jisas nagiglema dumo Damaskus meglmara i bogl akie pai meglkwa. 20Akie pai meglko, Sol ye Juda yoba ka mabuno yugu pere pere kei yeimara i, tabre pi Jisas kamo di te, Jisas ye God Wam moglmiwe dugwa. 21Yegl dugo, yoba mudu prikwa i, nagino kogl, yene di ikne ikne ede, yegl digwa, Yagl i dumo Jerusalem mogl, yoba ye Jisas pre mediglkwa i ere kide kaima ere te moglkwa ikra moglmiwe digwa. Te, ye ama ede dumo magigl ugwa i, yoba Jisas pre mediglkwa i si kane si i pi tawa teigwa yoba bitno meglmara i tenagledi ugwa ba ye erme Jisas kamo dumiwe di, yegl digwa. 22Ye yegl digwa ba God ye Sol yobuglo te pai moglko, Sol ye Jisas God Kere Yugwa Yagle moglkwa i praiglmedi ka giglede dugwa. Ye ka dugwa i, gigle gigle dinagledi eruko, Juda yoba di ikne ede tedre, ene kibi dine dinaiglkwa mere yegl manga.
Juda yoba tau Sol si goramniwe digo, Sol teke ede ogwa
23Ana Sol ege olto dumo Damaskus mogl pai moglko, Juda yoba dumo Damaskus meglkwa i, tau ye si goramnedi ka di kogl yeigwa. 24Ye ka di kogl yei, ede pi dumo Damaskus i kobuglo togl podo ere winabo dimara togl dra mina ye etne ya eduer akie sugl mogl, Sol unan, ye si goramnedi sugl kan meglkwa. Ye yegl erikwa ba yoba tau prisre, Sol di teigwa. 25Di teigo, Sol kugl nogwa yoba tau ere mogl, Sol eduer agre i ede pi windo ta kobuglo togl i mina yomara pidre, degigl gagl podo ta idre, Sol ede atne ede, kan kogl padigl, ye kobuglo togl windo yomara ikra mina ede atne edigo, ye teke ede meda pi ede ogwa.
Sol ede Jerusalem ogwa
26Ana Sol teke ede meda pidre, aglke ta ede pi Jerusalem ogwa. Ede Jerusalem pidre, ye ede pi Jisas nagiglema meglmara akie makai sinamnedi ogwa. Ogwa ba Jisas nagiglema ye Sol kuduglmo geglkwa. I siragl pre ye prikwa i, yagl Sol i, Jisas nagigle kaima ta moglkrumedi prisre, kuduglmo gogl, akie makai sikrikwa. 27Yegl erikwa ba yagl Barnabas we digwa ikra ye Sol agre i ede pi Jisas degugwa yoba meglmara ogwa. Pidre, ye ka tau yagl Sol ede Damaskus enagledi konbo bage ogo, Yagl Kade Jisas ye moglmara plau didre, ye ka siragl mere di togwa i, Barnabas ye Jisas dedugwa yoba meglkwa i di togwa. Di tedre, ama Sol kudugl goglkre, yoba dumo Damaskus meglkwa ye Jisas kamo di tomiwe di, Barnabas ye Jisas dedugwa yoba ama yegl di togwa. 28Di te kodugo, Jisas dedugwa yoba ye Sol di igo, Sol ye Jisas dedugwa yoba bogl akie Jerusalem suna meglkwa.
Ana Sol ye Jisas dedugwa yoba bogl akie Jerusalem pai meglko, Sol dumo Jerusalem suna i kudugl goglkre, wan u ikne ikne pi Jisas kamo i, yoba di togwa. 29Di tedre, ye ama Juda yoba tau ka Grik digwa i Jisas kamo di togwa ba Juda yoba i Sol ka dugwa i prakiuro, di ikne edigo, Sol bogl ka drano di ikne ikne ede meglkwa. Ka drano digo, Juda yoba i okuo ere mogl, Sol si goramnedi konbo dokigwa. 30Sol si goramnedi konbo dokigwa ba Jisas pre mediglkwa yoba tau i pre kan ersre, yagl Sol agre i ede pi dumo ta mudi nigl bina, kagie Sisaria we dimara pidre, ye sip mina ede pi ye yugomugl dumo Tarsus enabedi dedigo, ye ede ogwa.
31Ana Sol ede yugomugl ogo, yoba distrik Judia ya Galili ya Samaria suna Jisas yugobunomo mina atne meglkwa i, okna kudano ikne ye ere kide ere teigwa i, kide kodigwa pre ye wakai meglkwa. Wakai meglko, God Murubuglo ye ake ple di togo, ye God kuduglmo gogl, kiano mina ama yobuglo idre, erikwa. Yegl eriko, yoba kor tau mere ama Jisas pre mediglsre, ye ede suna Jisas yugobunomo mina wigwa.
Pita yagl Ainias ere wakai ere togwa
32Ana Pita ye ede dumo bage bage pidre, aglke ta ye ede pi taun ta Lida we dimara Jisas yobama tau meglkwa kanagledi ogwa. 33Ye ede dumo Lida pidre, yagl ta ogo kagle mawa sugwa moglko, ye kanugwa. Yagl i kagie Ainias we digwa. Ye bugla yugu 8-pela ogo kagle mawa sugo, bogl mina keme pai moglkwa. 34Ana Pita yagl Ainias i kandre, ye di te, yegl dugwa, Ainias yo, Ene adigl, boglnen ere wakai ero. Jisas, God Kere Yugwa Yagl, ye ene ere wakai ere tomiwe dugwa. Yegl dugo, yagl i oglade adiglsre, 35wan u ikne ikne ogo, yoba mudu dumo Lida meglkwa i ya te, dumo auduno ta magigl yogwa kagie Saron we dimara meglkwa i ye yagl i kandre, nomane kor idre, Yagl Kade Jisas pre mediglkwa.
Pita abu Tabita ere i kor edugwa
36Ana igne i Jisas nagigle ta dumo Jopa moglkwa, kagie Tabita we digwa. Te, ka Grik mina, kagie Dokas we digwa. Ana abu i ege ege yoba ki ere wakai ere tedre, te goduglme yoba meglkwa ki ama ake ple di te, erukwa. 37Ana aglke ta abu i kide sugo, goglkwa. Abu i goglko, yoba ye nigl pai tedre, ogo nagie i pi yugu mitna ta yomara kiule kra yeigwa. 38Yeigo, Jisas nagiglema dumo Jopa meglkwa i ye Pita dumo Lida moglme digo, prisre, yagl suo dede, ye ede pi Lida pidre, Pita agre yunabredi dedigwa. Dumo Jopa mogl ede Lida enaiglkwa i, magigl yogwa pre ye yagl suo i dedigwa. Dedigo, yagl suo i ye ede pi Pita dumo Lida moglmara pidre, kamage yei, Pita di te, Nono akie tabre ede pi Jopa enamga pre umbugliwe di, yegl dibrika.
39Ana yagl suo i ede u Pita yegl di tebrika pre Pita ye yagl suo ikra bogl akie ede eigwa. Ye ede pi dumo Jopa plau digo, yoba ye Pita agre i ede pi abu i ogo nagie yugu mitna ta yogwa yeimara ikra eigwa. Eigo, abu werai tau mere udre, Pita moglmara mogl winabo didre, kai erikwa. Kai ersre, abu Dokas i kor moglkwa igne ir gagl ya kugugl gagl tau ama si bogl, abu werai tau togwa i, Pita kanabedi obuno di teigwa. 40Yegl eriko, Pita yoba i mudu di meda edidre, ye goglko bodugl, kamage ere, God agle di prukwa. Yegl ersre, ye kan ake te, abu ikra pai moglmara kandre, ye di te, yegl dugwa, Abu Tabita yo, ene adiglo dugwa. Yegl dugo, abu ikra gumuglo pine di Pita kandre, adigl bogl mina ame di moglkwa. 41Ame di moglko, Pita u abu i ogo ake adiglsre, abu werai meglkwa ikra ya te, God yobama mudu meglkwa i agle dugo, wigwa. Ye wigo, Pita ye di te, Abu ikra kor moglma, kanio dugwa. 42Yegl eruko, taragl plau dugwa i ka di ede eigo, yoba dumo Jopa meglkwa i mudu prikwa. Mudu priko, yoba tau mere ka i prisre, Yagl Kade Jisas pre mediglkwa. 43Te, Pita ye ege olto yagl ta dumo Jopa kipaugwa, kagie Saimon we digwa i bogl akie pai miurka. Yagl Saimon i, ye agl bugla nagino kugl yauro, ere wakai erukwa yagl ta moglkwa.
Currently Selected:
Aposel 9: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
