Aposel 14
14
Pol Barnabas bogl dumo Aikoniam Jisas kamo di tebrika
1Ana Pol ya Barnabas ede pi dumo Aikoniam pi mogl, wakan kade igne ye Juda yoba ka mabuno yugu kei yeimara yugugl pidre, yoba God kamo pramnedi makai si meglkwa i, ye God kamo di tebrika. Ye God kamo dibrika i, wakai kaima dibrika pre yoba mere kide, Juda yoba ya yoba pere tau suna mogl, prikwa i pre mediglkwa. 2Yoba mere kide pre mediglkwa ba Juda yoba tau ye Pol ya Barnabas ka dibrika i prisre, pre medrakiurikwa. Pre medrakiuro, ye ede meda pi Aikoniam yoba makan nem meglmara i kinano sidre, pre mediglkwa yoba ta meglkwa i deno kubro tenaiglmedi kinano sigwa. Kinano sigo, ye deno kubro pre mediglkwa yoba teigwa. 3Yegl erikwa ba yagl suo Pol ya Barnabas dumo Aikoniam i ege olto mogl, kudugl goglkre, Yagl Kade yobuglo mina medigl moglsre, yoba ka mabuno di te pai miurka.
Ana Pol ya Barnabas ye Yagl Kade yoba yoko kaima ere yugwa ka i, di te miurko, Yagl Kade ye ka dibrika i, yoba kaima dibredi praiglkwa pre ye kimagl tau erabredi yobuglo togo, eribrika. 4Yegl eribrika ba yoba mudu dumo Aikoniam kipai meglkwa i we, ye nomano pere pere yogwa. Yoba tau Juda yoba ye kinano sigwa ikra prikwa i, Juda yoba i kaima dimedi priko, te yoba tau Jisas dedugwa yoba suo kano prikwa i, ye yagl suo i kaima dibredi priko, yegl erikwa. 5Yegl eriko, Juda yoba ye yoba kinano sigwa ikra yeigo, makan nem yoba tau yeigo, ye yobano kade bogl akie u makai sidre, ka di kogl, yagl suo i ere kide ere tedre, kobuglo si, ye si goramniwe digwa. 6Si goramniwe digwa ba yoba ta prisre, pi Pol ya Barnabas di togo, ye teke ede pi distrik Likonia pidre, ede taun suo Listra ya Derbe yebrara i pidre, ede dumo kebra kebra taun suo i magigl yeimara i, pi wan mogl, 7Jisas kamo wakai i, yoba di te wan miurka.
Pol ya Barnabas ede dumo Listra ebrika
8-9Ana aglke ta Pol ya Barnabas ye wan ede pi taun Listra suna ebriko, Pol ere mogl, yoba ka mabuno di te moglkwa. Ye di te moglko, yagl kagle mawa sugwa ta ama suna i mogl, Pol ka dugwa i pre moglkwa. Yagl i, ye mam kugl edumara kagle mawa sugo, ye ege swara ta konbauna wan kankrukwa. Ye Pol ka dugwa i pre moglko, Pol ye kanugwa. Kandre, yagl i Yagl Kade ye kagle ere wakai erabuka kuno erabedi pre meduglkwa mere kandre, 10ye ka muglkude di, yegl dugwa, Ene adiglo! dugo, ye si puglo di, tabre kaima adiglsre, konbauna ede ogwa.
11Ana Pol ye yagl kagle mawa sugwa i ere wakai ere togo, Likonia yoba i, mere kide kan meglkwa. Likonia yoba i kandre, yene kano pamere ka kade di, yegl digwa, Nono godno erme u yoba mere yegl pidre, ede atne u nono munara ubriwe di, yegl digwa. 12Yegl didre, Barnabas ye god ta Sus we digwa i moglme didre, te Pol ka tau mere dugwa pre ye god ta Hermes we digwa i moglme digwa. 13Ana taun Listra bina i, god Sus i tawa teigwa yugu ta yogwa. Yegl pre yoba i ere mogl, yagl suo i ye godno suo i miuriwe digo, yagl ta god Sus tawa te, te erukwa yagle moglkwa i, ye yoba bogl akie tawa gagl, yagl suo i tenamnedi prikwa. Yegl prikwa pre tawa togwa yagl i, ye pi kau kumugl tau kane kogl idre, eken gagl tenamnedi taragl kwie tau kan mina din edigwa i idre, ede u togl dra yoba ede taun suna pi pi erimara i, ugwa.
14Ana yoba yegl ere, Pol ya Barnabas tawa gagl tenamnedi erikwa ba okuo yagl suo i ye yoba erikwa i pre kan ere, mane didre, ye kide pribrika i nogugl edenabugledi gaglno suna ake argla dibrika. Gaglno suna ake argla didre, yoba makai si meglmara suna i tabre u ikne ikne pi, ka podo di, 15yegl dibrika, Yagl wagle, ene siragl pre yegl erime? Kodio! dibrika. No muglka i, ene yoba meglmere yegl, muluwe dibrika. No ene ka mabuno wakai di tedre, ene god kibi pre mediglkwa i kide kodo, God kaima kor moglkwa i ene pre medraiglkwa pre di tobuglka. God kaima pre dubuglka i, ye kamun mitna ya kamun atne ya mudi nigl ya te, taragl mudu kamun mitna ya atne ya mudi nigl paigwa ya meglkwa i ye ere yomiwe dibrika.
16Ana Pol ya Barnabas ka yegl didre, ama yegl dibrika, Okna yoba yugobuno pere pere ta mogl, siragl mere ta eramnedi prikwa i okna God ye eraiglmedi kanige erukwa. 17Ye kanige erukwa ba igne i, yoba ye God kaima ta moglmedi praiglkwa pre God siragl kane kane te pai moglmiwe dibrika. Ye kamun sinabedi dedidre, kaya mokna yene egeno pere pere mina bogl yenaiglmedi ersre, ene kaya mokna mere ne, gun yenaiglmedi ere te pai moglmiwe di, Pol ya Barnabas ka yegl dibrika. 18Ye ka yegl dibrika ba Listra yoba i nomano gigle dugo, tawa gagl tenamnedi pre pai meglkwa pre Pol ya Barnabas ka tau mere ama didre, ye Tawa gagl norokrio! di mane di pai miurka. Mane di gigle dibrika pre yoba i tawa gagl tekrikwa.
19Ana okuo Juda yoba tau taun suo Antiok ya Aikoniam kide kodo, ede taun Listra suna i udre, yoba ye deno kubro Pol tenaiglmedi yoba kinano sigwa. Ye kinano sigo, Listra yoba Pol deno kubro teigo, ye Juda yoba i bogl Pol kobuglo si, si goramnedi ere sigwa. Ye ere sidre, si gunedi pre, ye gudu i pi taun meda edigwa, pai moglkwa. 20Pai moglkwa ba Jisas nagiglema u Pol pai moglmara mogl winabo di kan meglko, Pol aduglkwa. Ye adiglsre, ede taun suna pi eduer ugl pai, tagugo i ye aduglko, ye Barnabas bogl dumo i kide kodo ede pi dumo Derbe ebrika.
Pol Baranabas bogl wan pi Jisas pre mediglkwa yoba deno muduno si gi di tebrika
21Ana Pol ya Barnabas ye ede dumo Derbe pi moglsre, Jisas kamo wakai i yoba di te miurko, yoba tau mere pre, Jisas pre medigl, u ye nagiglema meglkwa. Meglko, ye aglke dumo i kide kodo, ede ikne pi Listra ya Aikoniam ya Antiok pidre, 22Jisas nagiglema dumo suota meglkwa i ka tau di, ye deno muduno si gigle di tedre, ka wakai prikwa i ake gi di moraiglmedi ka di tebrika. Ka yegl di tedre, ye ama ere mogl, yegl dibrika, Nono we, yubun kane kane i, inamga keme paugwa. Yubun tau yegl idre, okuo ede pi God yoba kingno mogl, ye suglno morabara enamniwe dibrika. 23Ana Pol ya Barnabas ye yoba taun suota meglkwa i ka yegl di tedre, kogon swara ta ama yegl eribrika, ye Jisas yugobunomo dumo swara ta akie makai si meglmara i, yoba tau ye suglno moraiglmedi i nogugl ede tebrika. Yegl ersre, ye kaya mokna mawagl ere, kamage ersre, Jisas pre mediglkwa yoba dumo swara ta meglkwa i, Yagl Kade Jisas ye swara bitno morabedi ogo mina yedre, ede ebrika.
Pol ya Barnabas aglke ede ikne pi, dumo Antiok, ye komono kana miurara i ebrika
24Ana Pol ya Barnabas ede pi distrik Pisidia pidre, wan ede pi provins ta Pamfilia we dimara i ebrika. Pidre, suna i wan 25ede pi taun Perga plau dibrika. Pi plau didre, Jisas kamo i yoba di tedre, wan ede pi mudi nigl bina taun ta Atalia we dimara ebrika. 26Atalia pidre, sip mina ede ikne pi dumo Antiok, ye komono kana miurara i ebrika. Dumo Antiok i, provins Siria suna i yogwa. Okna ye dumo Antiok i miurko, Jisas pre mediglkwa yoba ere mogl, God yene wakai prumere yagl suo i ere wakai ere tenan, ye kogonmo erabredi ye God ogo mina yeigo, yagl suo i ede bage bage pi, God kogonmo i ere kodidre, ede ikne Antiok ubrika.
27Ana Pol ya Barnabas ye ede ikne dumo Antiok udre, ye Jisas yugubonomo di makai sibriko, u makai si meglkwa. Makai si meglko, Pol ya Barnabas ye wanibrara God kogon siragl mere erukwa ya te, ye konbo yauro togo, yugobuno pere pere, Juda yoba moglkrikwa i ama Jisas pre mediglkwa i, ye boglo kugl tebrika. 28Boglo kugl te kodibriko, ye ege olto dumo Antiok, Jisas nagiglema bogl akie meglkwa.
Currently Selected:
Aposel 14: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
