Aposel 15
15
Jisas pre mediglkwa yoba Jerusalem makai sigwa
1Ana igne i yoba tau distrik Judia meglkwa ye ede pi dumo Antiok pidre, Jisas pre mediglkwa yoba meglmara i di te, yegl digwa, Ene Moses okna beke norumere ere, gagno puduo gagie beglbi keme God ene ere inabiwe digwa. 2Yegl digwa ba Pol ya Barnabas di ikne ede, mabuno yegl ta mane dibriko, ye ka drano podo didre, nonga digwa. Yegl digwa pre Jisas pre mediglkwa yoba dumo Antiok meglkwa i ere mogl, Pol ya Barnabas yagl tau bogl dede, ye ede Jerusalem pidre, Jisas dedugwa yoba ya Jisas pre mediglkwa yoba meglmara yoba tau ye suglno meglkwa i, ye bogl akie makai si, yoba u ka digwa i, di ere wakai eraiglmedi dedigwa.
3Ana yoba Jisas yugobunomo mina meglkwa i ye yagl tau Pol ya Barnabas bogl akie enaiglmedi dedigo, ye ede eigwa. Ye pi distrik Fonisia ya Samaria suna konbauna wan eigo, Pol ya Barnabas pre mediglkwa yoba bage bage meglmara i yegl di te, Yoba meda, Juda yoba moglkrikwa i tau mere Jisas pre mediglmiwe di, di te ede ebriko, ye mudu prisre, gun podo yeigwa.
4Ana ye distrik Fonisia ya Samaria pidre, wan ede pi Jerusalem plau digwa. Jerusalem plau digo, Jisas dedugwa yoba ikra yeigo, yoba tau ye pre mediglkwa yoba suglno meglkwa i yeigo, Jisas yugobunomo mudu bogl akie ye Pol ya Barnabas ye yoba kogl idre, ubrika ikra bogl kogl kare di igwa. Yegl eriko, Pol ya Barnabas ye ka tau di te, God ye miurara kogon siragl mere erukwa i, di tebriko, pre meglkwa. 5Pre meglkwa ba yoba tau okna ye Farisi yoba mogl, erme Jisas pre mediglkwa i, ye meglmara suna i adiglsre, ka yegl digwa, Yoba yugobuno pere, Juda yoba moglkrikwa i, Moses lo okna norukwa i duglo boglsre, ye gagno puduo gagie boraiglkwa pamiwe digwa.
6Ana yoba tau ka yegl digwa pre Jisas dedugwa yoba yeigo, pre mediglkwa yoba suglno meglkwa i bogl, ye ka i di pramnedi pere makai sigwa. 7Makai sidre, ka i drano di, ka olto di meglko, Pita ye meglmara suna i adigl mogl, yoba makai si meglkwa i ka yegl di togwa, Agrama wagle, nono munara suna i, God okna na kere i pere edugwa i, ene pre kan erime dugwa. Ye na kere i pere edugwa i, na yoba yugobuno pere, Juda yoba moglkrikwa i Jisas kamo wakai yogwa i di tebo, ye pre medraiglmedi na kere i pere edume dugwa. 8Na Jisas kamo i, yoba yugobuno pere meglkwa i di teigo, God, ye yoba mudu deno muduno suna kan pogl sugwa i, ye Murubuglomo norumere kuno yegl mere ye ama tomiwe dugwa. Ye Murubuglomo tomara i, ye nono wakai kanumere yegl, yoba i ama wakai kanugwa i, i nogugl edumiwe di, Pita yegl dugwa.
9Ana Pita ka yegl didre, ama yegl dugwa, God nono Juda yoba munga i mabuno pere ta ere norsre, yugobuno pere meglkwa i mabuno pere ta ere te, yegl ta erekrume dugwa. Yoba yugobuno pere meda meglkwa i ye Jisas pre mediglko, God nono ere norumere kuno yegl ye tadaglmeno gugl ede tedre, ye deno muduno pe si yomedi kanugwa. 10Yegl erukwa pre ene Jisas nagiglema meglkwa i, siragl pre lo duglo boraiglkwa pame dime? dugwa. Ene siragl pre ye yubun podo yegl tenamnedi prime? dugwa. Nono kowano awano yeigo, nono erme munga i yomgo, God lomo duglo boramnedi erumga ba kuno ta erekrukwa. God konbo pere ta obuno di noro kodugwa pre ene siragl pre ye konbauna si norukwa i mane didre, God dem kubrabedi erime? dugwa. 11Nono pre medunga i, Yagl Kade Jisas nono yoko kaima ere idre, yoba yugobuno pere meglkwa i ama kuno yegl ere, yoko kaima ere yumiwe di, Pita yegl dugwa.
12Ana Pita ka yegl di kodugo, yoba ka ta di ikne edekrikwa. Yegl eruko, Barnabas ya Pol ere mogl, ye yoba makai si meglkwa i di te, God ye yobuglo togo, ye kimagl ya diu kane kane yoba yugobuno pere pere meglmara eribrika i, di tebriko, yoba i mudu prikwa.
13Ana Barnabas ya Pol ka yegl di kodibriko, yagl ta Jems we digwa i, yegl dugwa, Agrama wagle, na ka ta erme dinaglka i, ene prio! dugwa. 14Saimon Pita nono erme di norukwa i, God yene komono kana ere mogl, yoba yugobuno pere, Juda yoba moglkrikwa i dem muduo tedre, ye meglmara suna i yoba tau ye yobama moraiglmedi ere yugwa i pre di noro kodumiwe dugwa. 15Ana Pita ka dugwa i ya God kamo kep yoba okna ibo ka beglkwa i mudu u swara omiwe dugwa. Ye ka yegl beglkwa,
16Devit yugobunomo, Israel yoba i, ye sel yugu ta kide ere, yage sugwa mere yegl meglme dugwa. Ba nana okuo ede ikne u sel yugu kide erukwa i ere wakai ersre, kor kenaglka. 17Na sel yugu kor kenaglka i, yoba mudu uglo koglo koglo meglkwa i na doko kanaiglkwa pre eraglka. Yoba yugobuno pere pere meda meglmara i na ye yobanama moraiglmedi agle diga i pre diwe di, 18Yagl Kade yegl dugwa. Ye okna kaima ibo, taragl yegl plau dinabedi i nogugl edumiwe#15.18 Amos 9.11-12
di, God kamo kep yoba okna yegl beglme di, Jems yegl dugwa.
19Ana Jems ka yegl didre, ama yegl dugwa, Pita ka dugwa i ya te ka kep yoba okna beglkwa i nogugl paugwa pre na prika i, Yoba yugobuno pere pere moglsre, ede God moglmara wigwa i, nono ye Moses lomo duglo boraiglme didre, yubun ta tekramnedi priwe dugwa. 20Yubun ta tekramga ba nono yegl eramne dugwa, Nono pepa ta bogl yoba i tedre, ye yegl di tenamga, Ye taragl mie ta yoba god kibi tawa teigwa i nekre, bormai nekre, te mie ta bormai dage pai moran, nekraiglkwa pre di tedre, te, yagl abu ta bogl kunogl nekrio! di, yegl di tenamne dugwa. 21I siragl pre okna kaima ibo ede u erme pra, taun mudu bage bage yeimara i, Juda yoba wakan kade igne ege ege ka mabuno yugu makai si, Moses ka boglkwa i kersre, te yoba pere di tedre, eriko, yoba mere prikwa. Yegl pre Jisas pre mediglkwa yoba mabuno ta erekrio diga i, ye ta eribi, Juda yoba ya te, yoba tau ye ka beke teigwa i kandre, kide pre dinaiglkwa pre diwe di, Jems yegl dugwa.
Jerusalem yoba makai sigwa i, pepa ta beglkwa
22Ana Jems ka yegl di kodugo, Jisas dedugwa yoba yeigo, pre mediglkwa yoba suglno tau meglkwa i yeigo, Jisas yugobunomo mudu meglkwa i ama makai si mogl, ye yoba suo ye meglmara suna i kere idre, dedumun, ye Pol ya Barnabas bogl akie ede dumo Antiok enaiglme digwa. Yegl didre, ye meglmara suna i, yagl suo ede okna ebrika i kere idre, dedigwa. Yagl ta kagie Judas we digwa. Te, ye kagie ta ama Barsabas we digwa. Te, yagl ta kere igwa i, kagie Sailas we digwa.
23Ana yoba Jerusalem makai sigwa i ye yagl suo Judas ya Sailas kere idre, ye Pol ya Barnabas bogl akie enaiglmedi dedidre, pepa ta ye i pi tenaiglmedi bogl teigwa. Ye pepa i mina yegl beglkwa, No Jisas dedugwa yoba munga i, ya te pre mediglkwa yoba suglno munga i, no ene agroma munga. No pepa i ene bogl tomga i, No ene yoba yugobuno pere pere moglsre, Jisas pre mediglkwa dumo Antiok ya provins suo Siria ya Silisia meglkwa i, wakai we di tomga.
24No prumga i, yoba tau no munara kide kodo, ede u ene meglmara udre, ka tau didre, ene deno muduno ere kide ere, ene nomano sinaiglmedi ka di teigwa i, prumga. Prumga ba no yoba i ka yegl dinaiglmedi di tekunga. Ye yene primere digwa. 25Yegl pre no makai si mogl, yagl suo kere idre, ye Barnabas ya Pol, no deno muduno suna miurka i, ye bogl akie pi, ene meglmara enaiglmedi dedumga. 26Barnabas ya Pol i, ye nono Yaglno Kade Jisas, God Kere Yugwa Yagl moglkwa i, ye pre gorabrika i pre mitna edekre, kogonmo ere pai miurka. 27Ana no yagl suo Judas ya Sailas dedumga i, ye no ka bunere mere yegl aglke kor drano mina ene di tebr, ene praiglkwa pre dedumga.
28God Murubuglo no obuno di noruko, no prumga i, no ene God lomo duglo boraiglkwa pame dumun, yubunde panabuka ba no yubun yegl tenamga kuno ta erekrukwa. Yubun yegl ta tekramga ba ene taragl suom ta eraiglkwa paugwa i, 29ene mie ta god kibi tawa tenaiglkwa i nekre, bormai ta nekre, te mie ta bormai dage pai moran, nekraiglkwa paugwa, te, yagl abu ta bogl kunogl nekraiglkwa paugwa. Ene mabuno yegl eribi, wakai panabuka. Ana wakai we di tomniwe di, pepa mina yegl beglkwa.
30Ana ye yagl 4-pela pepa beglkwa ikra tedre, dedigo, ye ede eigwa. Ye ede pi dumo Antiok plau didre, Jisas pre mediglkwa yoba ikra mudu digo, u makai sigwa. Mudu makai sigo, ye pepa ikra teigwa. 31Teigo, yoba u makai sigwa i pepa ikra kersre, kere kanigwa i, ye deno muduno wida dinabuka ka yegl di beglko, kere kandre, gun podo yeigwa. 32Kere kan, gun yeigo, yagl suo Judas ya Sailas i, ye ama God kamo kep yoba ta miurka pre ye Jisas pre mediglkwa yoba u makai si meglkwa i ka olto di te, ye deno muduno si gigle di tedre, kiano wagle yobuglo inaiglmedi ka di tebrika. 33-34Yegl esre, ye ege olto dagl dumo Antiok mogl pai miurko, okuo pre mediglkwa yoba ere mogl, ye di wakai yei tedre, dedigo, ye aglke ede ikne pi Jerusalem yoba ye okna dedigwa i meglmara ede ikne ebrika. 35Ede ikne ebriko, Pol ya Barnabas ye dumo Antiok mogl pai mogl, yoba tau mere bogl akie Yagl Kade kamo i yoba di te moglsre, beke tedre, erikwa.
Pol ya Barnabas ede pere pere ebrika
36Ana okuo Pol ere mogl, Barnabas di te, yegl dugwa, Nono erme wan ede pi taun pere pere Yagl Kade kamo okna di tobuglara mudu pidre, nono pre mediglkwa yoba wakai meglmo mo moglkrimo mo i wan kanabugledi priwe dugwa. 37Yegl dugo, Barnabas pra we didre, yagl ta kagie Jon Mak we digwa ikra auro idre, enabugledi prie dugwa. 38Yegl dugwa ba Pol mane di prisre, yegl dugwa, Nono okna kogon akie ere ede pi provins ta Pamfilia we dimara omgo, ye no kodo, ede ikne ugwa. Yegl pre ye bogl akie pikramniwe dugwa. 39Yegl dugo, ye Barnabas bogl ka tau didre, nonga podo dibrika. Nonga podo didre, pra ede pere pere ebrika. Barnabas ye yagl Mak i agre yugo, ye sip mina ede dumo ta mudi nigl suna yogwa, Saiprus we dimara i ebrika. 40Te, Pol ye yagl Sailas ikra ye bogl akie enabugledi kere yugwa. Kere yugo, Jisas pre mediglkwa yoba ere mogl, Yagl Kade yene wakai prumere yagl suo i suglno morabedi kamage ere, Yagl Kade ogo mina yedre, dedigo, ye ede ebrika. 41Ye ede pi provins suo Siria ya Silisia, Pol okna enagledi prie dumara i suna wan ede ebriko, Pol ye Jisas yugobunomo provins suo i suna meglkwa i deno muduno si gigle di tedre, pre mediglkwa si gigle di tedre, erukwa.
Currently Selected:
Aposel 15: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
