Aposel 17
17
Pol ya Sailas ede dumo Tesalonaika ebrika
1Ana Pol ya Sailas ye Filipai kide kodidre, konbauna wan ede pi taun ta Amfipolis we dimara pidre, dumo i kide kodo, wan ede pi taun ta Apolonia we dimara ebrika. Pidre, aglke kor dumo i kide kodo, ede pi taun ta Tesalonaika we dimara ebrika. Tesalonaika i, Juda yoba ka mabuno yugu ta kei yeigwa yogwa. 2Ana ye ede Tesalonaika ebriko, okna Pol dumo bage bage pidre, wakan kade yogwa igne ye Juda yoba ka mabuno yugu kei yeimara pi, yoba ka mabuno beke te, te erumere i ere, wakan kade suota ye Tesalonaika ka mabuno yugu kei yeimara i pidre, ye yoba makai si meglkwa i God kamo di tedre, mabunomo di pogl togwa.
3Ana Pol ye Tesalonaika yoba ka mabuno di togwa i, yegl mere di togwa, ye God kamo tau bage mere God Kere Yugwa Yagl i gagie giugl prisre, gogl, aglke adigl u kor enabuka paugwa pre dugwa i didre, mabunomo di pogl togwa. Di pogl tedre, ama yegl dugwa, Na ka erme diga i, Jisas ye God Kere Yugwa Yagl i moglkwa pre diwe dugwa. 4Ana Pol ka yegl di kodugo, Juda yoba makai si meglkwa i tau ye kaima dumedi prisre, Pol ya Sailas bogl u swara eigwa. Te, Grik yoba ye God kuduglmo geglkwa i tau mere yeigo, abu kade tau mere dumo Tesalonaika meglkwa i ama pre mediglsre, Pol ya Sailas bogl u swara pi, akie meglkwa.
5Ana dumo Tesalonaika i, yoba tau mere Jisas pre mediglko, ye Pol ya Sailas bogl u swara pi meglkwa ba Juda yoba tau ere mogl, yagl suo i kide kandre, deno kubro te, ye pi maket dumo, yoba makai si, si erimara pidre, yoba kide maket suna winabo di wan meglkwa i di makai sidre, te yoba tau mere taun suna meglkwa i di makai sigwa. Di makai sidre, Juda yoba i ka kane kane di, yoba i kinano sidre, deno buglo yeigwa. Deno buglo yeigo, yoba makai si meglkwa i deno kubruko, ye muku di ede pi yagl ta kagie Jeson we digwa i kipamara eigwa. Yagl Jeson kipamara i, ye Pol ya Sailas akie pai, pai erikwa pre ye yagl suo i gudu yu yoba mere meglmara gumuglnomugl unamnedi pi, dua sada bogl, ede yugugl pi kanigwa 6ba yagl suo i yugugl moglkribrika. Yugugl moglkribriko, ye kanigwa, pre mediglkwa yagl tau ye yugu nem Jeson ikra bogl meglko, ye yagl wagle i yugu nem bogl gudu yu taun yobano kade tau meglmara wigwa. Udre, ye ka podo di, yegl digwa, Yagl suo ye dumo uglo koglo koglo pidre, yoba ere kide ere tebrika i, erme ede u nono dumono ama ubriwe digwa. 7Ubriko, yagl Jeson magigl i, ye yagl suo i ye yugumo mina panabredi i yugugl edumiwe digwa. Te, yoba mudu gudu yumga i, ya te yagl suo i ye akie nono Rom yoba kingno lo norukwa pamere i duglo boglkre, ye kingno pere ta moglkwa, kagie Jisas we di yegl dime digwa. 8Yegl digo, taun yobano kade ya yoba makai si mogl, kano prikwa i, mudu deno kubrisre, ka kane kane digwa. 9Yegl eriko, yagl kade wagle i, ye Jeson ya pre mediglkwa yagl tau i ka tage te, ye topo podo ersre, ede meda enaiglmiwe di, yegl digwa. Didre, ye di te, No kan mun, ene okuo mabuno yegl aglke ta erekribi, pra topo i okuo enene ikne edinaiglmiwe di, yegl digwa. Yegl digwa pre ye dimere ere, topo podo tedre, ede meda eigwa.
Pol ya Sailas ede dumo Beria ebrika
10Ana Jeson ye pre mediglkwa yagl i bogl ede meda u meglkwa. Meglko, ege swara i mina eduer Jisas pre mediglkwa yoba mudu u makai sidre, Pol ya Sailas oglade dede, ede taun ta Beria we dimara enabredi dedigwa. Dedigo, Pol ya Sailas ede dumo i pidre, ede pi wakan kade igne Juda yoba ka mabuno yugu kei yeimara yugugl pidre, yoba makai si meglkwa i Jisas kamo di tebrika. 11Ana Juda yoba dumo Beria meglkwa i, ye mabunono tau wakai pai, Tesalonaika yoba togwa. I siragl pre Pol ya Sailas ye Jisas kamo di tebriko, ye ka kaima pramnedi prisre, ka dibrika i kuno pamere di noribro mo di, ege ege God kamo tau yene kere kan, pre pogl sinamnedi erikwa. 12Ye mabuno yegl erikwa pre ye tau mere Jisas kamo pre mediglko, te Grik abu kade tau mere ya Grik yagl tau mere ama pre mediglkwa.
13Ana Beria yoba tau mere Jisas pre mediglkwa ba Pol ye dumo Beria i mogl, God kamo di moglkwa i, yoba tau kandre, ede Tesalonaika pi Juda yoba dumo Tesalonaika meglkwa ikra di teigo, prikwa. Prisre, ye ede u dumo Beria udre, yoba mere meglmara ye kinano si, bagl nu sigwa. Yegl eriko, Beria yoba ye deno kubro Pol teigwa. 14Yegl erikwa pre Jisas pre mediglkwa yoba i ere mogl, Pol ere kide ere te dinaiglmedi Pol tabre ede mudi nigl bina enabedi dedigo, yoba tau ye agre i ede eigwa. Ye agre i ede eigwa ba Sailas ya Timoti ye dumo Beria mogl pai miurka. 15Ana yoba tau Pol agre i ede mudi nigl bina pidre, ede pi taun kade ta Atens we dimara eigo, Pol ye yoba agre yeigwa i, di ikne edidre, ye yegl di togwa, Ene ede ikne pidre, yagl suo Sailas ya Timoti dedibi, tabre u na kan inabriwa di teo dugo, yagl tau Pol agre yeigwa i aglke ede ikne eigwa.
Pol dumo Atens moglkwa
16Ana Pol ye dumo Atens mogl pai mogl, yagl suo Sailas ya Timoti pre sugl moglkwa. Ye yagl suo pre sugl mogl, ye kanugwa i, Atens yoba ye god kibi mere kide beke yeigo, kanugwa. Kandre, Atens yoba ye God kaima moglkwa i pre pogl sikrimedi prisre, kide pre, dem muduo yubun dogwa. 17Dem muduo yubun dogo, ye ede pi Juda yoba ka mabuno yugu kei yeimara yugugl pidre, ye God kamo tau didre, mabunomo di pogl, Juda yoba ya Grik yoba tau ye God kuduglmo geglkwa yugugl makai si meglkwa i, di pogl togwa. Yegl ersre, te, ye ege ege ede pi maket dumo, yoba wan meglmara i pidre, yoba ta suna wan meglkwa i ama God kamo tau di togwa.
18Ana Pol yoba maket erimara wan mogl, yoba ka mabuno di te moglko, yoba yugobuno suo meglkwa, ye bitno podo paugwa u Pol moglmara wigo, ye ka tau di ikne ikne ede, ka drano digwa. Yugobuno ta i kagno Epikurian we digo, te yugobuno ta meglkwa i, kagno Stoik we digwa.#17.18 Epikurian ya Stoik yoba i, ye suo akie god kane kane meglmedi prikwa ba ye pre mediglsre, yoba ka beke teigwa i, pere pere paugwa. Epikurian yoba ye yoba ka beke te meglkwa i, Erme wakai mogl pai ersre, gun yenamga swara i podo pamiwe di, yegl digwa. Te, Stoik yoba ye yoba ka beke te meglkwa i, Nono mabuno wakai boglsre, kogono kane kane ta panabuka i wakai eun, swara i wakai panabiwe di, yegl digwa. Ye wigo, Pol bogl ka drano digo, ye tau ere mogl, yegl digwa, Yagl ka gua gua dugwa i, ye erme siragl ka dinagledi ere moglme? digwa. Digo, te, yoba tau ere mogl, Ye dumo pere ta godno pre di da dumiwe digwa. I siragl pre ye Jisas pre didre, yoba goglsre, adigl u kor enaiglkwa i pre dugwa pre yoba i ka yegl ta prikrikwa pre ye yegl digwa. 19Yegl digo, yugobuno suo bitno podo paugwa ikra ere mogl, Pol auro i pi muglo ta Kaunsil makai si, si erimara, kagie Areopagus we dimara i pidre, ye di pre, yegl digwa, Ene ka kor yoba di te wan motnga i, mabunomo siragl mere paugwa ene no di notn, pramniwe digwa. 20I siragl pre no ka ta okna prikrumnere dinga pre no mabunomo i, pramnedi prumniwe di, yegl digwa. 21Yegl digwa i, i siragl pre yoba dumo Atens makan nem meglkwa i ya te, yoba dumo bage bage mogl, ede Atens wigwa i, mabunono yegl paugwa, ye kogon ta ta erekre, ege ege ka kor yoba di tedre, te yoba kor ta ede suna u ka kor di teigwa i prisre, yegl keme erikwa.
22Ana Pol ye kaunsil muglo Areopagus makai si meglmara ye suna adigl mogl, yegl dugwa, Yagl wagle, ene Atens yoba meglkwa i, ene god pere pere kagno kade te, kamage ere teigwa i, giglede eriko, kaniga. 23Na ka yegl diga i, i siragl pre na taun suna koglo koglo wan mogl, ene godno kane kane bekigwa i kan wan moglsre, kobuglo bogl ta agl bugla si gogl, gagl tenamnedi kiglkwa i ama kaniga. Kobuglo bogl i mina ka yegl beglme dugwa, Kobuglo bogl i, God ta kagie pre kan erekunga pre yomiwe di, yegl beglko, kaniwe dugwa. Yegl pre na ene ka erme di tenaglka i, God ene kagie pre kan erekrikwa ba kagie kade tenamnedi erikwa i, erme ye kamo ene di tenaluwe di, Pol yegl dugwa.
24Pol yegl didre, ama yegl dugwa, Na God ta pre diga i, ye dumo makan ere yedre, taragl mudu dumo makan mina meglkwa ya paigwa i, ere yogwa. Te, ye kamun mitna ya atne nem yagl moglkwa pre yoba yugu kei yeimara ye atne ta mogl pai erekrume dugwa. 25Te, God moglkwa i, yene ere mogl, nono yoba mudu kor munga i norsre, taragl mudu yumga ya nomga i ama norukwa. Yoba taragl swara ta ye tenaiglkwa i, kuno erekrukwa. I siragl pre ye taragl swara ta inabuka paikrumiwe di, yegl dugwa.
26God oknayene ibo yagl swara ta ere yogwa. Ana nono yoba yugobuno pere pere, uglo koglo koglo munga i, yagl swara i gawama mogl, yugobuno pere pere moraiglmedi, God yene i nogugl edumiwe dugwa. Yugobuno swarade dumo aglo mere mogl pai eraiglkwa i ye ere padiglsre, te, ege aunake yugobuno ira ede okna enaiglkwa i, ya yugobuno ira ede okuo unaiglkwa i, komono kana ere padiglsre, okuo ye i nogugl edumiwe di, Pol yegl dugwa.
27Ana Pol yegl didre, ama yegl dugwa, God prukwa i, ye kogon kane kane erukwa i yoba kandre, ye doko pi God ye siragl mere moglkwa i pre kan pogl sinaiglmedi prukwa. God yegl prisre, kogon kane kane ere, taragl wakai kane kane norukwa. God yoba na dokinaiglmedi prukwa ba ye dumo eglke ta moran, nono ta dokokramga. Ye ka kaima nono swarade munara i, magigl moglmiwe dugwa. 28Nono God yegl mere moglmedi pramga i, nogugl paugwa. I siragl pre Grik yagl swara ta okna yegl boglkwa, Nono ye swara erumara i mina kor mogl, wan u ikne ikne omniwe di, yegl boglmiwe dugwa.
Te, God siragl mere moglkwa pre diga i, ene Grik yoba ka beglkwa yoba meglmara suna i, swara ta okna ibo yegl boglme dugwa, Ye nono ere yogwa, muniwe di, yegl boglme dugwa. 29Ana God nono ere yogo, munga pre God siragl mere moglkwa i nogugl panabuka. Yoba gol mo silva mo kobuglo idre, god ta yene primere ogono mina bekigwa i, God kaima yegl mere ta moglmedi prikramniwe dugwa. 30Okna yoba ye God pre kan erekrikwa igne i God ye kanige erukwa. Yegl erukwa ba erme God yoba mudu uglo koglo koglo meglkwa i nomane kor inaiglmedi ka giglede di togwa. 31Ye yoba mudu nomane kor inaiglmedi di togwa i, i siragl pre ye ege ta padiglsre, Yagl swara ta mabuno du keme ersre, yoba mudu kotno prabedi kere i pere edume dugwa. Yagl ta yoba mudu kotno prabuka pre diga i, ye okna golko, yagl i ira moglkwa i, yoba kan pogl sinaiglmedi God ye ere i kor edumiwe di, Pol yegl dugwa.
32Ana Pol ka yegl di kodugo, yoba tau ye yagl ta gogl, adigl u kor omiwe dugwa i ye prisre, gauglmo ere, ka boglo erikwa. Yoba tau yegl erikwa ba yoba tau ama Pol di te, Ka dinga i, barma kor u din, pramniwe digwa. 33Yegl digo, Pol ye meglmara kide kodo, ede meda ogwa 34ba yoba ama tau ye Pol ka dugwa pre medigl, Pol omara sika si eigwa. Yagl swara ta pre meduglkwa i, ye kagie Dionisius we digwa. Yagl i ama Kaunsil meglmara suna i moglkwa. Te, abu ta kagie Damaris ama pre meduglko, yoba tau ama pre mediglkwa.
Currently Selected:
Aposel 17: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
