Aposel 18
18
Pol ede dumo Korin ogwa
1Ana Pol okuo dumo Atens kide kodo, ede pi taun kade ta Korin we dimara ogwa. 2Ede taun Korin we dimara i ogo, Juda yagl ta kagie Akwila we digwa i ugo, tegigl yebrika. Ana yagl Akwila moglkwa i, ye dumo Pontus nem ta moglkwa, ba ye ebie bogl okna dumo Rom, kantri Itali suna yogwa i pi kipabrika. Kipabriko, Rom King ta kagie Klodius we digwa i ye Juda yoba mudu ye Rom moglkraiglmedi mane di, si meda edugo, yagl Akwila i, ebie Prisila bogl edue tagl iga terke u dumo Korin kipabrika. Ana Pol ye Akwila bogl tegigl yebriko, okuo Pol ede pi yagl abu suo i kipabrara ogwa. 3Ogo, ye yugu swara pai, kogon akie erikwa. Pol ye sel yugu si boglkwa yagle moglko, yagl abu suo i ama sel yugu si biurka pre ye akie pai, kogon akie erikwa. 4Pol ye bogl akie paigo, wakan kade ege ege Pol ye ede pi Juda yoba ka mabuno yugu kei yeimara yugugl ogwa. Ogo, ye Juda yoba ya Grik yoba makai si meglkwa i bogl ka drano digo, te Pol ye mudu Jisas kamo pre medraiglmedi ka beke togwa.
5Ana Pol ye dumo Korin mogl, sel yugu si boglsre, te yoba ka mabuno di te, ere moglkwa. Yegl ere moglko, yagl suo Sailas ya Timoti ye provins ta Masedonia we dimara i moglsre, ede pi Pol moglmara ebriko, Pol ye sel yugu si boglkwa i kide kodo, ege ege yoba God kamo di te wan moglkwa. Yegl ersre, ye Juda yoba ka giglede di tedre, Jisas ye God Kere Yugwa Yagl moglmiwe dugwa. 6Yegl dugwa ba Juda yoba ye ka dugwa i, prakiuro, ye kenaglmo sigwa. Yegl eriko, Pol ye Juda yoba mabuno kide erikwa i, i nogugl ede tenagledi ye yoba kugane tama si edimere mere yegl ye kuguglmo gaglmo mina tama bagl, ye yegl di togwa, God ene ka tage tenabuka i, na mabuno ta moglkraglka. Siragl pre na Jisas kamo i ene di teiga ba ene prakiurikwa. Yegl pre na ene Juda yoba kide kodo, yoba ye Juda yoba ta moglkrikwa ba yugobuno pere meda meglmara i, Jisas kamo di tenaluwe di, Pol yegl dugwa.
7Ana Pol ye Juda yoba yegl di tedre, ye Juda ka mabuno yugu kei yeimara yoba ka beke te moglkwa ikra kide kodo, aglke ede pi yagl ta ka mabuno yugu yomara magigl kaima kipamara yoba i makai si, ka mabuno di te moglkwa. Yugu nem yagl i kagie Titius Jastus we digwa. Ye Juda yoba ta moglkrukwa ba ye God kamage ere tedre, kagie kade togwa yagl ta moglkwa. 8Ana Pol ye yagl i kipamara yoba ka mabuno di te moglko, Juda yoba ka mabuno yugu bitno moglkwa yagl, kagie Krispus we digwa i, ama ye yobama bogl mudu Yagl Kade Jisas kamo prisre, pre mediglkwa. Yagl i ye yobama bogl Jisas pre mediglko, te Korin yoba tau mere Jisas kamo prisre, pre medigl, nigl biglkwa.
9Ana aglke ta eduer Pol gumuglomugl eruko, Yagl Kade ye moglmara u yegl di togwa, Ene kudugl goglnga i kide kodo, yoba na kana di te pai moglo dugwa. 10I siragl pre na ene motnara mogl teiga. Te, dumo Korin magigl i, na yobanama mere meglkwa pre yoba swara ta ere mogl, ene si, ere kide ere tekraiglmiwe dugwa. 11Yegl dugo, Pol ye dumo Korin bugla yugu swara ta mogl, ba 6-pela mogl tebe ede, God kamo yoba beke te moglkwa.
12Ana Pol taun Korin moglkwa i, provins ta Akaia we dimara suna i yogwa. Pol mogl ede ogo, okuo yagl ta kagie Galio we digwa i ye provins Akaia i sugl moglkwa igne, Juda yoba ere mogl, nomano swara yei, Pol kot ere tenamnedi ake i pi yagl Galio i moglmara eigwa. 13Agre i pidre, Juda yoba ye Galio di te, yegl digwa, Yagl Pol i ye yoba ka mabuno kor beke tekraiglmedi lo mane dugwa i sede, yoba ka kor beke tedre, ye konbo kor pere ta mina God kagie kade tenaiglmedi di te wan moglmiwe digwa. 14Digo, Pol ye ka di ikne edenagledi erukwa ba yagl Galio i tabre Juda yoba di te, yegl dugwa, Ene Pol aglau podo ta erukwa pre dinaiglmo mo lo kade ta si biglke dugwa pre dibi, na ene Juda yoba kano praglka i kuno erume dugwa. 15Ba ene ere mogl, yoba ka beke teimara pre nonga didre, yoba kagno pre ya te enene Juda yoba lono pre nonga digwa. Yegl pre na kotno ta prikraluwe di, yegl dugwa. Ene enene pi meda ere wakai erio! di, Galio yegl dugwa. 16Yegl didre, ye kotno prikragledi si meda edugwa. 17Si meda edugo, yoba kot eraiglkwa pramnedi makai si meglkwa i ere mogl, Juda yoba ka mabuno yugu bitno yagl, kagie Sostenes we digwa i deno kubro tedre, ake gi di mogl, yagl Galio ikra gumuglomugl ere sigwa. Ye ere sigwa ba Galio kan kor erekre, kanige erukwa.
Pol ede ikne dumo Antiok, provins Siria suna yomara i ogwa
18Ana Pol ege olto dumo Korin moglsre, pre mediglkwa yoba di wakai yei tei, Pai molo didre, ye ede pi dumo ta mudi nigl bina yogwa, Senkria we dimara pidre, sip mina ede provins Siria, ye okna mogl ede omara i, enagledi ogwa. Pidre, ye God ka kaima ta di te paduglkwa i, ere kodugwa pre ye i nogugl edenagledi Juda yoba mabunono pamere ere, ye bre yugo guku edugwa. Bre yugo guku edugo, ye yagl Akwila ikra ebie Prisila bogl akie sip mina ede eigwa 19ba ye pi dumo ta Efesus we dimara plau digo, Pol ye Akwila ebie Prisila bogl dumo Efesus morabredi kide kodo, ye swara ede pi Juda yoba ka mabuno yugu kei yeimara yugugl pidre, Juda yoba ka beke togwa. 20Ka beke togo, Juda yoba ye wakai pre, Pol bogl akie ege tau moramne digwa ba Pol di ikne ede te, 21God ta unatnedi pran, na okuo ikne unaluwe dugwa. Yegl didre, ye Juda yoba dumo Efesus meglkwa i kide kodo, sip mina ede u 22dumo Sisaria plau didre, makandigle wan ede pi Jerusalem ogwa. Pidre, Jisas yugobunomo dumo Jerusalem meglkwa i kandre, di wakai yei te, aglke Jerusalem kide kodo, ede dumo Antiok, ye okna mogl, ede omara ikra ogwa.
23Ana Pol ede Antiok pi ege tau moglsre, ye aglke kor dumo i kide kodo, ede pi distrik Galesia ya Frigia ye okna Jisas kamo di te wan moglmara i wan mogl, Jisas nagiglema meglmara i wan kandre, pre mediglmara si gigle di tenagledi ka di te wan moglkwa.
Yagl Apolos ede Efesus ogwa
24Ana igne i Juda yagl ta kagie Apolos we digwa i ede u dumo Efesus plau dugwa. Ye dumo Aleksandria, kantri Isip nem ta moglkwa. Ye God kamo pre pogl sidre, ka kaugo sugwa yagl ta moglkwa. 25Komno kana yoba Jisas kamo di teigo, prisre, ye ka kaima ka i yoba beke tenagledi prisre, Jisas kamo pamere yoba di te wan moglkwa. Yegl erukwa ba ye ka swara ta di teigo, prikrukwa i, yoba ye Jisas pre mediglsre, nigl biglkwa ka i ta prikrukwa. Jon okna yoba ake nigl atne ede, nigl bugl togwa i keme ye di teigo, prukwa. 26Ana yagl Apolos i ede dumo Efesus pidre, Juda yoba ka mabuno yugu kei yeimara ede yugugl pi, kudugl goglkre, Juda yoba ka beke togwa. Ka beke togo, yagl Akwila ebie Prisila bogl ama yugugl mogl, yoba ka beke togwa i pre miurka. Ana ye yoba ka beke te kodugo, yagl Akwila ebie Prisila bogl ye agre i ede bina pi, God kamo mina nomane tau ama inabedi beke tebriko, prukwa.
27Ana okuo Apolos ede pi provins ta Akaia we dimara i enagledi prukwa. Pruko, pre mediglkwa yoba dumo Efesus meglkwa i ye pra, ede Akaia enabedi di wakai yei te, dedigwa. Dedidre, te, ye pepa ta bogl, Jisas nagiglema provins Akaia meglkwa i tedre, Apolos enan, di wakai yei, kogl kare di inaiglmedi pepa bogl teigwa. Yegl eriko, Apolos ede pi provins Akaia we dimara i ogwa. Ye ede ogo, God ye ake ple di te moglko, Apolos ye kogon podo ere, Jisas pre mediglkwa yoba ake ple di togwa. 28Apolos ye kogon swara ta erukwa i, ye Juda yoba bogl yoba gumuglnomugl ka drano digo, Apolos ye ka giglede dugo, yoba ka di ikne edenaiglkwa manugwa. Apolos ye Juda yoba ka kibi dime didre, ye God kamo pamere di, Jisas ye God Kere Yugwa Yagl moglmiwe di, i nogugl edugwa.
Currently Selected:
Aposel 18: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
