Aposel 23
23
1Ana soldia bitno yagl i ye Pol auro i pi Juda yoba Kaunsilno meglmara gumanomugl edugwa. Edugo, Pol ye kan Kaunsil meglmara edidre, yegl dugwa, Na agrama wagle, na okna ebrie mabuno siragl mere boglka ya erme ebrie mabuno siragl mere boglka i, God gumuglo mina ta agai goglkriwe di, Pol yegl dugwa. 2Yegl dugo, tawa teigwa yoba bitno moglkwa, ye kagie Ananaias we digwa i ye yoba tau Pol moglmara magigl adigl meglkwa i di te, Yagl ka dugwa i dra mina sio! dugo, sigwa. 3Sigo, Pol ye yagl Ananaias i di tedre, yegl dugwa, God ene sinabiwe dugwa. Yoba ene nagin tebe kanigwa, ene yagl wakai ta motnedi kanigwa ba den mudn mina u kide kaima pi kodinga. Ene ame di moglsre, lo mina kot ere naragledi ersre, aglke lo mane dumara i yoba di te, yoba na sinaiglmedi di tenga i, kuno erekrumiwe di, Pol yegl dugwa.
4Pol yegl dugo, yoba tau Pol moglmara magigl adigl meglkwa i Pol kira pogl pre, yegl digwa, Ene tawa teigwa yoba bitno i, God ye nono bitno morabedi dedugo, moglkwa i, siragl pre di kide yei tene? di, yegl digwa. 5Yegl digo, Pol ye di ikne ede te, Agrama wagle, na aglau eriwe dugwa. Tawa teigwa yoba bitno moglkwa i, na pre kan erekriwe dugwa. Siragl pre God kamo mina beglkwa, Yoba ene bitno ta moraiglkwa i, di kide yei tekrio#23.5 Isip Kide Kodigwa 22.28 di, yegl beglme dugwa.
6Ana Pol ye pre kan erukwa i, Kaunsil mudu makai si meglkwa i, ye tau Sadyusi yoba meglko, tau Farisi yoba meglkwa. Yoba yegl makai si meglko, kandre, ye ka podo di, yegl dugwa, Na agrama wagle, na ninama okna Farisi yoba meglko, erme na moglka, ama Farisi yoba ta moluwe dugwa. Na erme kot ere narikwa i, yoba goglsre, adigl u kor enaiglkwa i na pre mediglsre, sugl moglka. Ka i pre mediglmara i pre ye na kot ere narimiwe dugwa. 7Yegl dugo, Kaunsil wagle u makai si meglkwa i, ye aglke si buno di ede u suo eigwa. Suo pidre, ye yene ikne ikne ka drano didre, nonga digwa. I siragl pre tau Sadyusi meglko, tau Farisi meglko, yegl erikwa. 8Sadyusi yoba pre mediglkwa i, yoba goglsre, adigl u kor pikraiglmedi prisre, te angelo ya murubuglo ki ta moglkrimedi, yegl di prikwa ba Farisi yoba ye yoba goglsre, adigl u kor enaiglmedi prisre, te angelo ya murubuglo ki meglmedi prikwa pre ye yene ikne ikne nonga digwa. 9Ana Kaunsil wagle ye nonga podo digo, God lomo beke teigwa yagl tau ye Farisi yoba mina suna meglkwa i adigl mogl, ka podo di, yegl digwa, Yagl wagle ene prio! digwa. No yagl i aglau ta erekrumedi prumga. Ye ka dugwa i, murubuglo mo angelo ta di tebi, dinan, nono pre pogl sikramga di, yegl digwa. 10Yegl digo, yoba i nonga podo digo, soldia bitno yagl i kanugwa i, ye nonga di, Pol ake paka di ede pere pere enaiglkwa mere yegl kandre, kudugl goglsre, ye soldiamo di togo, ye ede suna pi, Pol ake i pi soldia paimara yugu i enaiglmedi di togo, ye dumere ere, i ede eigwa.
11Ana soldia ye Pol agre i ede ikne pi soldia paimara yugugl i edigo, moglko, eduer Yagl Kade ye Pol moglmara u magigl adigl mogl, yegl di togwa, Ene kudugl goglkro. Ene na kana yoba Jerusalem magigl i di tenere, kuno yegl ene ede pi dumo Rom pidre, na kana yoba di tenatnga pamiwe di, yegl dugwa.
Juda yoba Pol si goramnedi ka di keglkwa
12Ana tagugo i, Juda yoba tau ye Pol si goramnedi pre, ka di kogl kodo, ka giglede ta ama di padigl yegl digwa, Nono nigl ya kaya mokna nekre, mawagl ere ede pi yagl Pol i si goglsre, okuo nigl ya kaya mokna nenamniwe di, yegl digwa. 13Ana yagl ka yegl di padiglkwa i, ye 40-pela mere yegl mogl ede mina eigwa. 14Ye ka yegl di koglsre, ye ede pi tawa teigwa yoba bitno meglkwa i ya Juda yoba kade meglkwa i meglmara pidre, ye di te, yegl digwa, No erme ka giglede ta di padunga i, yegl dumniwe digwa, no nigl ya kaya mokna ta nekre, mogl ede pi yagl Pol i si goglsre, okuo nigl ya kaya mokna nenamnedi di paduniwe digwa. 15Yegl didre, ama ye di te, yegl digwa, ene ya te, Kaunsil mudu ene pi Rom soldia bitno yagl i moglmara pidre, bakagl tedre, yegl dio digwa, Ene Pol agre yun, no ye kotmo prumga i, aglke kor ka tau ama kira pogl pramnedi prumniwe dibi, no konbo bage teke pai mun, ye agre yunan, no yagl Pol i si goramniwe di, yegl digwa.
16Ana yagl wagle i ka yegl di keglkwa ba Pol abauglo wam yoba tau digo, prisre, Pol abauglo wam i, ye u Pol soldia yuguno wagle yugugl pai moglmara udre, ye Pol di togwa. 17Ye di togo, Pol ye ere mogl, soldia 100 sugl moglkwa yagl ta agle dugo, ugwa. Ugo, Pol ye di tedre, yegl dugwa, Ene kumugl i agre i pi yagl kade Rom soldia mudu bitno moglmara i en, kumugl magigl moglkwa i ka ta prukwa ye yagl kade i di tenabiwe dugwa. 18Dugo, soldia 100 bitno moglkwa yagl i ye Pol abauglo wam agre i pi yagl kade, Rom soldia mudu bitno yagl i moglmara pidre, ye di te, yegl dugwa, Yagl Pol, nono si kane sumgo, nono yuguno pai moglkwa i, ye na dede, kumugl i agre i en, ka ta prukwa ene di tenabedi di naruko, na ye agre i wiwe di, yegl dugwa.
19Ana soldia 100 bitno moglkwa yagl i ye kumugl i agre i pi yagl kade Rom soldia bitno yagl i moglmara pidre, ka yegl di togo, ana yagl kade Rom soldia bitno moglkwa i ye Pol abauglo wam ikra ogo ake i pi bina ta ogo, ye mudu miurko, ye kira pogl prukwa, Ene siragl ka pitnga na di naragledi une? di, yegl dugwa. 20Yegl dugo, Pol abauglo wam i ye di te, yegl dugwa, Juda yoba kade ye ka di kogl, tagna ene motnara u ene bakagl tenamne digwa. Ye ene bakagl tedre, yegl dinamne digwa, Ene Pol agre yu no Kaunsil munara un, ye ka tau kira pogl pramniwe di yegl dinamnedi ka di keglmiwe dugwa. 21Ye yegl dibi, ene pra we didre, Pol agre i bage un, yagl tau 40-pela mere yegl mogl ede mina eigwa ye u konbo bage teke pai mogl, yagl Pol i si goramnedi ka di keglmiwe dugwa. Te, ye ka giglede ta ama di padiglkwa i, ye nigl ya kaya mokna nekre, mogl ede pi yagl Pol si goglsre, okuo nigl ya kaya mokna nenamnedi ka giglede di padiglkwa. Yegl pre ye u ene ka di tenaiglkwa i, ene prikratnga pre na diwe di, Pol abauglo wam yegl dugwa. 22Yegl dugo, soldia bitno moglkwa yagl kade i ye di te, yegl dugwa, Ene erme u ka na di natnga i, yoba swara ta di tekro! didre, ye dedugo, Pol abauglo wam i, ede ogwa.
Ye Pol agre i pi Gavana Feliks moglmara eigwa
23Ana yagl kade Rom soldia bitno moglkwa i ye yagl suo, soldia 100-di pere pere sugl miurka agle dugo, ubrika. Ubriko, ye di tedre, yegl dugwa, Ene erme pi soldia tau bainet akidre, enaiglkwa i 200 idre, te soldia tau hos au sidre enaiglkwa i 70-pela idre, ama soldia kuglage akenaiglkwa i 200 idre, ye erme 9 klok eduer ede pi Sisaria, Gavana Feliks moglmara enaiglkwa pre ene ake kun eriro! di, yegl dugwa. 24Yegl didre, ye yagl suo i ama yegl di togwa, Ene ama hos tau yagl Pol ye au sidre ede enabuka pre tedre, ye suglmo wakai mogl, agre i pi Gavana Feliks moglmara ede enabriwe di, yegl dugwa.
25Ana soldia bitno yagl i ka yegl didre, ye ama pepa ta bogl, Gavana Feliks tedre, yegl dugwa, 26Yagl Kade Gavana Feliks yo, na Klodius Lisias pepa i ene bogl tedre, ene di wakai yei teiga. 27Na soldiana erme dediga, yagl ta agre yuigwa i, okna Juda yoba ye si ake gi di mogl, ye si goramnedi erikwa. Ye yegl erikwa ba yoba ta na di nare, Yagl i ye Rom yoba ta moglme digwa pre na soldia tau idre, ye ere simara pi, yagl i ere iga. 28Ere idre, Juda yoba ye aglau siragl mere erume digwa i doko kanagledi yagl i agre i pi Juda yoba Kaunsilno wagle meglmara ediga. 29Edidre, na doko kaniga i, ye yene Juda yoba lono pre didre, yagl i aglau erume digwa ba kaima mabuno kide ta eran, nono ye si goramga mo si kane sinamga i ta kuno erekrukwa. 30Te, Juda yoba tau yagl i si goramnedi ka di keglko, yoba ta u na di narukwa pre na yagl i tabre soldiana tedre, ye agre i pi ene motnga enaiglmedi dediga. Ye dedidre, te yoba ye kot ere tenamne digwa i, ye na di tedre, ye ene moratnara pi, kot ere tenaiglmedi di teiwe di, yagl kade Rom soldia bitno moglkwa i pepa mina yegl boglkwa.
31Ana eduer i, soldia ye yaglno kade dumere ere, Pol agre i pi taun ta konbo bage yogwa, Antipatris we dimara eigwa. 32Eigo, tagna mogl soldia makandigle eigwa i ede ikne Jerusalem udre, ede pi yugu ta paimara i eigwa ba soldia tau hos au sidre eigwa i ye Pol kubu swara agre i pi taun Sisaria eigwa. 33Pidre, ye yaglno kade pepa ta boglkwa ikra i pi gavana tedre, Pol ama i pi gavana moglmara gumamugl edigwa. 34Edigo, gavana ye pepa ikra kere kan kodidre, Pol kira pogl pre, yegl dugwa, Ene provins aglo nem motne? dugo, Pol ye di te, Na provins Silisia nem ta moluwe di, yegl dugwa. Yegl dugo, gavana prisre, 35ye Pol di te, yegl dugwa, Yoba tau ene kot ere tenamne digwa i wibi, na ene kotnen praluwe didre, ye soldia tau dedidre, ye Pol agre i pi kane yugu King Herot yugu ta okna kegwa yomara i, si kane sinaiglmedi dedugo, ye Pol i pi kane yugu edigo, moglkwa.
Currently Selected:
Aposel 23: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
