Aposel 24
24
Juda yoba kade ye Pol kot ere teigwa
1Ana ege 5-pela de Pol kane yugu pai moglko, tawa teigwa yoba bitno moglkwa yagl kagie Ananaias we digwa ikra yogo, te Juda yoba kade tau yeigo, te lo pre pogl sigwa yoba kagno loya we digwa, yagl swara ta kogon yegl erukwa kagie Tertulus we digwa ye akie ede u Gavana Feliks moglmara udre, ye gumamugl adigl, Pol kot ere tenamnedi wigwa. 2Wigo, gavana ere mogl, soldia tau pi Pol kane yugu pai moglmara agre yunaiglmedi dedugo, eigwa. Pi agre yuigwa, moglko, loya Tertulus ye Pol kot ere tenagledi ugwa ikra ye ka ta gavana di te, yegl dugwa, Yagl kade gavana yo, no ene motnara atne kra munga pre ege olto kuda ta paikruko, wakai munga. Te, no kantrino okna u kide ogwa ba erme u wakai ogwa i, ene nomanen olto pai, wakai paugwa, ene no bitno motnga pre u wakai ogwa. 3Yegl pre no ege ege aglo mere wan munga i, ene no bitno motnga i no wakai prisre ene wakai pre tomga. 4Ana na erme ka olto ta dikraglka ba na ene erme di praglka i, ene no wakai kan, ene egenen sugunagle ta no yagl Pol kot ere tenamnedi umga i norsre, ene no kotno pratnedi priwe dugwa.
5Ana loya Tertulus ikra ka yegl di tedre, ama ye Pol siragl mere erukwa i ye gavana di tedre, yegl dugwa, No kamga i, yagl Pol i ye kuda koglkwa yagl ta moglmiwe dugwa. Juda yoba ye dumo aglo mere ta meglmara i ye pidre, yene ikne ikne kuda boraiglmedi erumiwe dugwa. Te, Pol ye yugobuno pere ta ye yagl ta dumo Nasaret nem ta duglo beglkwa yoba meglmara suna i, ye yaglno kade ta moglkwa. 6-8Te, ye ama no tawa tomga yuguno ere kide eragledi erukwa pre no ye si kane sumga. Ye aglau yegl erukwa i, ye yene di pitn, no kaima dimedi pratniwe di, yegl dugwa. 9Yegl dugo, Juda yoba tau ye bogl akie wigwa i ye kamo ake ple di, ye kaima dumiwe digwa.
Pol ye Feliks gumamugl ka di togwa
10Ana Juda yoba ikra ka yegl di kodigo, Gavana Feliks kan Pol moglmara ede, Pol ka dinabedi bre gima dugo, Pol ye di te, yegl dugwa, Yagl kade Feliks yo, na erme kana didre, aglau ta erekrie dinaglka i, na jas pere ta di tekre, ene di tenaglka i, na wakai prika, i siragl pre ene bugla yugu tau mere no kantrino jas motnga pre ene no ebrie mabunono pre pogl singa i, na pre kan eriwe dugwa. 11Ege 12-pela de mere yegl ede ogo, na ede pi Jerusalem suna pidre, God kagie kade tenagledi eiwe dugwa. Na ka kaima diga i, nogugl paugwa. Ene yoba tau di pitn, ye ama nogugl ene di tenaiglmiwe dugwa. 12Na ede Jerusalem eiga i, na tawa teigwa yugu yomara mo taun suna mo ka mabuno yugu taun suna bage bage kei yeimara i, na ta yoba nonga didre, kuda boraiglmedi erekrika. Yoba magigl digwa i ta na aglau eriko, kandre, u dikrime dugwa. 13Na aglau kaima ta eribo, ye gumuglno mina ta kandre, u ene di nogugl ede tebi, ene ye ka kaima na erumere dimedi pratniwe dugwa.
14Ana Pol ka yegl didre, ka ta ama yegl dugwa, Na taragl swara ta ka kaima erimere ene di tenaglka i, no kowano awano Godno na kagie kade teiga i, Jisas konbauna sumara i mina kagie kade teiwe dugwa. Na mabuno yegl erimara i mina yoba i na yugobuno pere ta moglmiwe di, yegl digwa. Yegl digwa ba God lomo okna ibo beglkwa i ya te God kamo kep yoba okna ka beglkwa, Juda yoba pre mediglkwa i, na ama ka mudu i pre mediluwe dugwa. 15Ana okuo yoba God gumuglo mina du meglkwa ya ye gumuglo mina kide meglkwa i, mudu adigl u kor enaiglmedi erabuka ka i, na ye kaima erabedi priko, te nokanma wagle magigl di meglkwa i, ye ama God yegl erabedi primiwe dugwa. 16God yoba mudu adigl u kor enaiglmedi erabuka pre na ege ege God gumuglo mina ya yoba gumuglno mina mogl pai erika i, mabuno ta ere, agai goraglka mere yegl ta erekragledi eriwe dugwa.
17Na bugla yugu tau mere bage bage wan mogl, aglke kor ede ikne u Juda yoba tau goduglme meglkwa i, ake ple di tenagledi mige moni tau idre, te tawa ama gagl tenagledi wiwe dugwa. 18Na udre, no Juda yoba mabunono pamere God gumuglo mina deglbi yekragledi mabuno tau eraglka paugwa i na ersre, ede pi tawa teigwa yugu yomara togl suna pi, tawa gagl te moglka igne, Juda yoba tau provins Esia mogl wigwa i u na kanigwa. Na tawa tomga yugu togl suna moglmara i yoba mere ta moglkrumga. Te, yoba kuda ta bogl meglko, kankrime dugwa. 19Yegl pre Juda yoba tau u na kanigwa i, na aglau ta erumedi kanima, ye yene u ene motnara di nogugl ede teima, kuno eruko we dugwa. 20Mo, na tagl sedi Kaunsil wagle gumuglno mina adigl mogl, ka diga igne, aglau ta eribo, yagl magigl di meglkwa i, ye yene na aglau yegl erumedi ene di tebi, pratniwe dugwa. 21Na ye meglmara ka swara ta diga pre ye deno boglkwa pamiwe dugwa. Na ye meglmara suna moglsre, ka podo di, yegl diga, Na yoba geglkwa i adigl ede u kor enaiglmedi primara i pre ene kot ere narimiwe diga. Na yegl diga i pre ye kide prikwa pamiwe di, Pol yegl dugwa.
22Ana Gavana Feliks i, ye Jisas konbaunamo duglo beglkwa yoba siragl mere pre mediglkwa i ye pre kan erukwa yagl ta moglkwa. Yegl pre ye Pol kotmo prukwa i pre yubu sinabuka kuno erukwa ba Pol ka di kodugo, ye ka digwa i pre yubu sikre, yegl dugwa, Soldia bitno yagl Lisias, Jerusalem moglkwa i u ka tau dinan, na prisre, ene kotno prika i, pre yubu sinaluwe di, yegl dugwa. Yegl didre, yoba yugugl meglkwa i di meda edugwa. 23Di meda edidre, ye soldia 100 suglno moglkwa yagl ta di te, Pol i pi kane yugu edo dugwa. I pi kane yugu edinatnga ba ye kane yugu suna i yoko wan morabedi kanige ersre, te ye kabaglema tau u ye ake ple di tenamnedi eraiglkwa i ama kanige ero dugwa.
Pol bugla yugu suo kane yugu pai moglkwa
24Ana ege tau ede ogo, Feliks ye ebie Drusila, ye Juda abu ta moglkwa ye ebie i bogl ede yugugl ebriko, Feliks ye Pol ka tau dinan prabugledi agle dugo, ugwa. Pol udre, yoba Jisas, God Kere Yugwa Yagl pre mediglkwa i, mabuno siragl mere paugwa i di togo, pribrika. 25Pre miurko, Pol ere mogl, mabuno du pamara eraiglkwa i pre didre, yoba mabuno gua gua eraiglkwa i mane dinaiglkwa paugwa pre di tedre, te God yoba okuo ka tage tenabuka pre di togo, Feliks ka dugwa i pre, kudugl gogl, Pol yegl di togwa, Pra dingo, priwa. Ege ta na yoko moglbo, na ene agle dibo, ene aglke kor u ka di noratniwe di, yegl dugwa. Yegl didre, Pol dedugwa. 26Dedugo, ede ogwa ba yagl Feliks prukwa i, Pol ogo atne kogl, mige moni mo ki ta na kuduno erabedi prisre, sugl moglkwa. Yegl prukwa pre ye ege tau mere Pol bogl ka dinabugledi agle dugo, ugwa. 27Ye ege tau mere Pol agle dugo, Pol ugo, ye ka denbi dibrika ba ye mige tau ogo atne kogl, na kuduno erabedi sugl mogl ede ogo, bugla yugu suo mere ede ogwa. Bugla yugu suo mere ede ogo, yagl ta kagie Porsius Festus we digwa i u Feliks agaimo yugo, Feliks ede ogwa. Feliks ede ogwa ba ye ede enagledi erukwa igne i ye Pol kotmo yubu sikrukwa ba ye Juda yoba wakai praiglmedi Pol kane yugu pai morabiwe dugwa.
Currently Selected:
Aposel 24: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
