Aposel 25
25
Pol Rom King na kotna prabiwe dugwa
1Ana yagl ta kagie Festus we digwa, ye Feliks agaimo yugwa i, ede provins Judia udre, ede dumo Sisaria ogwa. Ye pi Sisaria ege 3-pela de mogl, aglke ede Jerusalem ogwa. 2Ede pi Jerusalem ogo, tawa teigwa yoba bitno meglkwa i yeigo, Juda yoba kade bogl ye Gavana Festus moglmara u ye di te, Yagl Pol i, ye aglau kane kane erume digwa. Didre, ye ka giglede di te, yegl digwa, 3Ene Pol agre i ede Jerusalem udre, kotmo pratniwe di, yegl digwa. Ye ka yegl digwa i, Festus ye Pol agre yunan, yoba tau konbo bage teke pai mogl, Pol si goraiglkwa pre ka yegl digwa. 4Yegl eraiglkwa pre digwa ba Festus ye di ikne ede te, yegl dugwa, Pol ye Sisaria kane pai moglmiwe dugwa. Te, na ama ege olto ta moglkraglka. Ege sugunagle keme magigl i mogl, aglke ede ikne Sisaria enaluwe dugwa. 5Yegl pre yagl Pol i ye aglau ta erumedi pribi, ene yoba kade tau magigl meglkwa i bogl, nono akie ede pi Sisaria omun, ene ye kot ere tenaiglmiwe di, yegl dugwa.
6Ana yagl Festus ye pi Jerusalem 8-pela de mo 10-pela de mere ki yegl ta moglsre, aglke ede ikne Sisaria ogwa. Pi paugo, tagugo i, ye kot pragledi ame di mogl, yoba tau pi Pol auro yunaiglmedi dedugo, eigwa. 7Ye pi Pol agre yuigo, Juda yoba kade wagle ikra ye Jerusalem mogl, Pol kot ere tenamnedi wigwa i, ye Pol moglmara mogl winabo di, ye Yagl Pol i aglau podo kane kane yegl erumiwe di, yegl digwa. Yegl digwa ba ye digwa i, mogo wakai ta paikrukwa. 8Juda yoba kade wagle ka kane kane yegl digo, Pol yene kamo mina yegl dugwa, Na Juda yoba lono ta si biglke dikrie dugwa. Te, tawa teigwa yugu ere kide erekre, te Rom King ama aglau ta ere tekriwe, di, Pol yegl dugwa.
9Ana Pol ka yegl dugwa ba Festus ye Juda yoba na gun yei naraiglmedi ye Pol di pre, yegl dugwa, Ene aglau kane kane etne dimara i, na Jerusalem mogl, ene kotnen praglka i, pra we di pitno? dugwa. 10-11Yegl dugo, Pol ye di ikne ede te, yegl dugwa, Yugu erme makai sumnara magigl i, Rom King ye yugu i kot yugu yenabe dugwa pre ene magigl i na kotna pratnga i, pra we dugwa. Yoba magigl i, na aglau kane kane etniwe digwa ba na Juda yoba ta ere kide ere tekrika. Ye ka kibi digwa i, enene pre kan etniwe dugwa. Ene na si goratnga mere yegl ta aglau eribo, na goraglka i ta mane dikraglka, pra we dinaluwe dugwa. Ba yagl wagle magigl digwa i ka kibi digwa pre ene na i pi Juda yoba ogono wagle yenatnga i, kuno ta erekrumiwe dugwa. Yegl pre na Rom King kotna prabedi di priwe di, Pol yegl dugwa. 12Yegl dugo, Festus ye nomane teigwa yoba meglkwa i bogl ka di priko, Festus ye Pol di te, yegl dugwa, Ene Rom King ene kotnen prabiwe dinga pre ene Rom King moglmara en, ye ene kotnen prabiwe dugwa.
Festus ye King Agripa di te, ene Pol kamo pratniwe dugwa
13Ana Festus ka yegl di, Pol togo, ege tau ede ogo, King ta kagie Agripa we digwa i ye abauglo Bernaisi bogl ede u Festus dumo Sisaria moglmara udre, di wakai yei tenabugledi ubrika. 14Ye u ege tau mere pai miurko, Festus ye ege swara ta ere mogl, Pol kamo di, King Agripa te, yegl dugwa, Feliks okna gavana moglkwa igne i ye yagl ta si kane sugwa, erme kane yugu pai moglmiwe dugwa. 15Na u ege sugunagle ta igle mogl, ede Jerusalem eiga ege i, tawa teigwa yoba bitno meglkwa i ya Juda yoba kade meglkwa i na moglmara u di nare, Yagl Pol i aglau kane kane erume didre, na ye kotmo pre yubu sidre, aglau kaima erume dinatne di, ka yegl dime dugwa. 16Ye yegl digwa ba na ye di te, yegl diga, No Rom yoba munga i, mabunono pere ta pame diga. No yoba ta kotno prikre, ere sinamga i, aglau pame diga. Yegl didre, na ye ama yegl di teiga, Yoba ere mogl, yoba ta kot ere tebi, yoba ta aglau erume digwa yoba i, ye yene ama mogl, prisre, ka tau di ikne edenan, no pre wakai ere, ere sinamga kuno erumiwe di, na ka yegl di teiwe dugwa.
17Ana Gavana Festus ka yegl di King Agripa ikra tedre, ka tau ama yegl dugwa, Ana Juda yoba ikra ye u makai sigo, na kandre, na sugl ta moglkrika. Tagugo i, tabre pi, kotno pragledi ame di moglsre, yoba tau ye pi yagl ikra agre yunaiglmedi dedigo, ye pi agre yuigwa. 18Ye agre yuigo, Juda yoba kade wagle ikra adigl mogl, ka digo, na pre moglka i, yagl i lo podo ta si biglke dumiwe dinaiglmedi prika i, ta dikrikwa. 19Ye Juda yoba siragl mere pre mediglmere i pre aglau ere dumiwe didre, te yagl ta Jisas we digwa, ye goglkwa ba adigl u kor omiwe di, yagl Pol i yegl dugwa i pre aglau ere dume di, yegl dimiwe dugwa.
20Ana Festus ka yegl didre, ama yegl dugwa, Juda yoba i ye yagl Pol pre ka yegl digo, na mabunomo kaima siragl mere paugwa i doko kanaglka kuno erekrumedi prika pre na yagl Pol i di pre, yegl diga, Ene aglau kane kane etne dimara i, nono ede dumo Jerusalem omun, ene kotnen praglka i, pra we di pitno? di yegl diga 21ba yagl Pol i mane didre, Na kane yugu pai moglbo, Rom King na kotnana okuo prabiwe di, yegl dugwa. Yegl dugwa pre na pra ye dumere ere, kane yugu pai moran, okuo na ye Rom King moglmara enabedi dedenagle di, yegl di padiluwe di, Festus yegl dugwa. 22Ana Festus ka yegl di kodugo, King Agripa ikra prisre, ye di te, yegl dugwa, Ana yagl Pol i, ye u kamo i tau dinan, na pragledi priwe di, yegl dugwa. Yegl dugo, Ye tagna u dinan, ene pratniwe di, Gavana Festus yegl dugwa.
23Ana Festus yegl dugwa pre tagugo i, King Agripa ye abauglo Bernaisi bogl eken wakai kaima gagl, yoba kade mabunono paugo, ere eimere yegl ere, ye ede pi yoba yugu ta makai si, si erimara i yugugl ebrika. Ye ede yugugl ebriko, soldia bitno yoba tau ya dumo Sisaria yoba kade meglkwa i ama akie ede yugugl eigwa. Ede yugugl eigo, Festus ye yoba tau pi Pol agre yunaiglmedi dedugo, ye pi agre yuigwa.
24Ana Pol ye agre yu yoba kade wagle ikra meglmara edigo, Gavana Festus yegl dugwa, King Agripa ya ene yoba mudu magigl meglkwa i, ene yagl Pol i kanimiwe dugwa. Yagl Pol i, Juda yoba Jerusalem meglkwa i yeigo, te Juda yoba dumo magigl i ta meglkwa i ama yeigo, ye mudu yagl Pol i aglau podo ta erumiwe didre, ka podo di, na ye si gorabedi na di primiwe dugwa. 25Yegl digwa ba na doko kaniga i, ye aglau podo ta eran, na ye si goraglka i, kuno ta erekrume dugwa. Ba yagl i yene na di narsre, Na Rom King kotna prabiwe dugwa pre na ye dumere ere, ye okuo dedenagle diga. 26-27Yegl diga ba na ye dedibo, ye pi yaglna kade Rom King moglmara enan, ye kotmo prabuka i, na aglau siragl mere erukwa i pre pogl sikrika pre na ye aglau yegl erumedi pepa mina bogl tenaglka i, ta pre kan erekrie dugwa. I siragl pre na prika i, na kane yoba ta dedibo, pi Rom King moglmara enabuka i, na ye aglau siragl mere erukwa i pepa mina ta bogl tebo, kuno erabuka. Ta manan, kuno erekrabuka. Yegl pre King Agripa na yagl Pol i agre i ede u ene motnara ya te, ene mudu magigl meglkwa i meglmara ediga i, yene dinan, nono kamo prisre, kira wakai ere pun, na pepa siragl mere Rom King bogl tenaglka i pre pogl sidre, bogl tenaluwe di, Festus ka yegl dugwa.
Currently Selected:
Aposel 25: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
