Aposel 6
6
Jisas pre mediglkwa yoba ere mogl, yagl 7-pela Jisas dedugwa yoba ake ple dinaiglmedi kere igwa
1Ana igne i yoba kor tau mere Jisas pre mediglko, Jisas gagiglma i, u mere kide eigwa. U mere kide pi meglko, kigl nonga ta ye meglmara suna i plau dugwa. Kigl nonga ta plau dugwa i, yegl mere paugwa, Jisas pre mediglkwa yoba i, tau yene Israel yoba kano pamere ka Aram digo, tau ka Grik digwa. Ana tau ka Grik digwa i ye ere mogl, kide prisre, yoba ka Aram digwa i ka te, yegl digwa, Ene ege ege kaya mokna yubu si, abu werai teigwa i, abu werai ka Grik digwa i, ene kaya mokna mere tekre, abu werai ka Aram digwa i keme kaya mokna mere temiwe di, yegl digwa. 2Yegl digwa pre Jisas dedugwa yoba 12-pela i ye ere mogl, Jisas gagiglma i mudu agle digo, wigwa. Wigo, ye di te, yegl digwa, No God kamo yoba di tomga i kide kodo, kaya mokna yubu si tenamga i, kuno erekrume digwa. 3Yegl pre ene agroma wagle, enene meglmara suna i, yagl 7-pela kere inaiglmiwe digwa. Ene yagl kere inaiglkwa i, yoba ye wakai kanigo, God Murubuglo ye meglmara kau si moglko, ye nomano wakai panabuka yoba i, kere inaiglkwa. Ene yagl 7-pela yegl ta moraiglkwa i kere ibi, ye kaya mokna yubu sinaiglkwa kogon i, no ye ogono mina yenamga. 4Yegl ersre, no ege ege kamage ere, God kamo yoba di te moramniwe di, yegl digwa.
5Ana Jisas dedugwa yoba i ka yegl digo, yoba mudu ye makai si meglkwa i, wakai prikwa. Wakai prisre, ye dimere yegl ere, yagl 7-pela kere igwa. Ye yagl 7-pela kere imara i, yagl ta kagie Stiven we digwa. Yagl Stiven i, ye God kamo pre meduglkwa gigle dugo, God Murubuglo ye moglmara kau si moglkwa. Te, ye ama Filip ya Prokorus ya Nikanor ya Timon ya Parmenas ya Nikolas kere igwa. Yagl Nikolas i, ye dumo Antiok nem ta moglkwa. Ye Juda yoba ta moglkrukwa, ba okna ye Juda yoba mabunono i duglo boglsre, ye u Juda yoba paugwa. 6Ye yagl i kere idre, ye mudu yu Jisas dedugwa yoba meglmara gumanomugl edigo, Jisas dedugwa yoba i ye kamage ere tedre, kogon eraiglkwa i nogugl ede, ogono i pi ye akigwa.
7Ana Jisas dedugwa yoba ye yegl ere kodigo, God kamo Jerusalem suna i pare wai dugwa. Pare wai dugo, yoba mere kide Jisas pre medigl, u ye gagiglma meglkwa. Ana yoba Jisas pre mediglkwa i, u mere kide eigo, tawa teigwa yoba i, tau mere kide ama Jisas kamo prisre, pre mediglkwa.
Juda yoba yagl Stiven kot ere teigwa
8Ana igne i yagl Stiven ikra God ere wakai kaima ere tedre, yobuglo podo togwa. Yobuglo togo, ye kimagl podo yoba gumuglnomugl erukwa. 9Yegl erukwa pre Juda yagl tau ye ere mogl, Stiven ka tau dugwa i, ka kibi dumedi ka teigo, ye ka drano digwa. Juda yagl tau ye Stiven ka teigwa i, yene ka mabuno yugu pere ta makai sigwa yagl meglkwa. Yagl i, ye kowano awano okna kane padre, ede meda wigwa pre ye ka mabuno yugu makai simara i, kagie Kane pai, ede meda wigwa yugu we di, yegl digwa. Ana yagl i, ye dumo pere pere nem meglkwa ba mudu Juda yagl meglkwa. Tau dumo Sairini ya Aleksandria nem meglko, tau provins Silisia ya Esia nem meglko, erukwa. 10Yagl i ye Stiven bogl ka drano digwa ba God Murubuglo ere mogl, Stiven nomane togo, ye ka wakai keme dugwa pre yagl i ere mogl, Stiven ka kibi dume dinaiglkwa i, kuno erekrukwa. 11Kuno erekrukwa pre yagl wagle i, ye pi atne teke mogl, yoba tau kinano si, ka kibi dinaiglmedi di teigwa. Ye ka kibi dinaiglmedi di te, ene yegl dinaiglmiwe digwa, Yagl Stiven, ye ka dumara God ya Moses akie kagno ere kide ere togo, prumniwe di, yegl dio digwa. 12Yegl digo, yoba ikra ye dinaiglmedi kinano simere ikra, pi, yoba di te wan meglko, ka i mudu wai dugo, Juda yoba kade meglkwa i ya God lomo beke teigwa yoba ya te, Juda yoba yoko meglkwa i pra, ka i prisre, deno kubro Stiven teigwa. Ye deno kubro tedre, Stiven si kane si yu Kaunsil meglmara edigwa. 13Edidre, yoba tau ka kibi dinaiglmedi beke teigo, di wan meglkwa ikra auro yuigo, ye Kaunsil wagle di te, yegl digwa, Yagl i, ye ege ege ka dumara i, tawa tomga yugu ya God lomo i, di kide keme yei tomiwe digwa. 14Ye ka ta dugo, no prumga i, Jisas, dumo Nasaret nem moglkwa i, tawa tomga yugu si kide ersre, te Moses nono mabuno eraiglmedi di norukwa, mabuno i kide kodo, mabuno kor, pere ta eraiglmedi, Jisas norabiwe di, Stiven yegl dume digwa. 15Yegl digo, yoba mudu Kaunsil yuguno yugugl meglkwa i, kan Stiven moglmara edidre, nagino keglkwa. Stiven guma dra angelo guma dra mere yegl pogl di yogwa pre ye toro kan moglsre, nagino keglkwa.
Currently Selected:
Aposel 6: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
