Aposel 7
7
Stiven Kaunsil ka di togwa
1Ana tawa teigwa yoba bitno moglkwa i ere mogl, Stiven di pre, yegl dugwa, Yagl wagle i ene tawa teigwa yugu ya God lomo di kide yei teniwe digwa i, kaima dimo? dugwa. 2Yegl di pruko, Stiven di ikne ede, yegl dugwa, Nina agrama wagle, ene prio! dugwa. Nono kowano awano Abraham ye terke ede dumo Haran pikre, ye Mesopotemia mogl pai moglkwa igne, God, ye i ta ede moglkwa i, Abraham moglmara plau didre, 3yegl di togwa, Ene dumonen i ya yobanma meglkwa i kide kodo, ede dumo kor ta na pogl si, ene i nogugl ede tenaglmara i, po!#7.3 Okanayene Ibo 12.1 di, God yegl di tomiwe di, Stiven yegl dugwa. 4Ana God yegl dugo, Abraham ye Mesopotemia moglmara, Kaldia yoba dumono i kide kodo, terke ede pi dumo Haran kipai moglkwa. Ye dumo Haran kipai moglko, nem kidagl goglkwa. Goglko, God ye Abraham aglke kor di te, ye terke ede u dumo magigl, nono erme suna kipai munara i, unabedi dedugo, ugwa. 5Ye ede magigl i ugwa ba God ere mogl, dumo magigl i swara ta, mo makan bage kebra kide kaima ta Abraham makanmo yenabedi ta tekrukwa. Tekrukwa ba Abraham okna gak kuglkrukwa igne i God ye ka kaima di te padigl, Na dumo makan magigl i, ene ya ene gawanma okuo moraiglkwa i, makano aimadi yenabuka pre tenaluwe di, God yegl di te paduglme di, Stiven yegl dugwa. 6Te, God ka ta ama Abraham di te, yegl dugwa, Ene gawanma okuo ede kantri ta yoba pere makano mina pi moraiglkwa. Meglbi, makan nem ere mogl, ene gawanma i, ye niglno kogono eraiglmedi si kane sidre, bugla yugu 400 mere yubun te, mabuno kide ere tenaiglkwa. 7Yegl ere tenaiglkwa ba nana ere mogl, makan nem ye si kane sinaiglkwa i yubun podo tenaluwe dugwa. God yegl didre, ama yegl dugwa, Mokomugl i, Israel yoba ye dumo i kide kodo, ede meda u dumo magigl igle mogl, na kagna kade naraiglmiwe#7.7 Oknayene Ibo 15.13-14 dugwa. 8God ka yegl didre, Abraham ka kaima ta ama di te padigl, yegl dugwa, Ene yobanen yagl ta moraiglkwa i, gagno puduo gagie boraiglmiwe dugwa. Ye dugwa i, ye ka kaima di te paduglkwa i mina atne meglkwa i, i nogugl edinaiglmedi gagno puduo gagie boraiglmedi di togwa. Yegl dugwa pre Abraham okuo Aisak kuglkwa, 8-pela de moglko, Abraham ye gagie puduo gagie bogl togwa. Ana okuo Aisak ere mogl, Jekop kuglko, Jekop ama ere mogl, yagl 12-pela, nono kowano awano ikra, kuglmiwe di, yoba mudu meglkwa i, Stiven yegl di togwa.
9Ana Stiven ka yegl di kodidre, ye ka ta ama yegl di togwa, Nono kowano awano 12-pela Jekop kuglkwa ikra tau ere mogl, ye agro Josep kide kandre, ye ede dumo Isip pi nigl kogon yoba morabedi topo beglkwa. Ye mabuno yegl erikwa ba God ye Josep moglmara mogl tedre, 10yoba ye yubun kane kane teigwa i, ere wakai ere togwa. Ye ere wakai ere tedre, ama Isip king gumuglomugl moglkwa igne i ama nomane wakai tedre, Isip king ye wakai kanabedi ere edugwa. Yegl erukwa pre king ere mogl, Josep dumo Isip mudu sugl morabedi dedidre, ye yugumo toglmo ya taraglmo i mudu ama sugl morabedi dedumiwe di, Stiven ka yegl di, yoba mudu meglkwa i togwa.
11Stiven ka yegl didre, ye ka ta ama yegl dugwa, Ana Josep pi Isip moglko, okuo dumo Isip ya Kenan akie kidan podo kide yogwa. Igne i yoba yubun podo kide kaima igo, te nono kowano awano ama kaya mokna wan doko i nenaiglkwa ta yeikrukwa. 12Kaya mokna wan doko i nenaiglkwa ta yeikrukwa ba Jekop prukwa i, Isip kugl mogo yome digo, prisre, ye wama tau nono kowano awano ikra dedugo, ye komono kana ta pi topo si idre, ede ikne wigwa. 13Ede ikne u ne meglkwa, dudugo, aglke kor topo sinamnedi ikne eigwa. Ikne pi Isip eigo, Josep ye agro moglkwa i, agiglema kan pogl sinaiglmedi di togwa. Di togo, yoba tau ama ere mogl, Josep agiglema kugl mogo topo sinamnedi wigwa i kandre, pi Isip king di teigo, prukwa. 14Te, Josep ama ere mogl, ye nem ya agiglema ya bormai swara meglkwa i mudu yoba 75-pela meglkwa i ede u ye Isip moglmara unaiglmedi dedugo, 15ye nem kidagl Jekop wama bogl mudu ede dumo Isip eigwa. Nono kowano awano i ede dumo Isip pi, kipai moglsre, geglkwa. 16Geglko, yoba ye i pi dumo ta Sekem we dimara, kobuglo mur ta Abraham okna ibo yagl Hamor wama mige silva tau tedre, topo sumara i, i pi yeimiwe dugwa.
17Ana okuo God ye ka kaima ta Abraham di te paduglkwa ikra plau dinabuka magigl eruko, Israel yoba ye dumo Isip mogl, u mere kide kaima eigwa. 18U mere kide kaima pi meglko, king kor ta dumo Isip sugl moglkwa. King i, Josep okna siragl mere ere, Isip yoba ake ple di togwa i, king i ta pre kan erekrukwa.#7.18 Isip Kide Kodigwa 1.8 19Yegl erukwa pre king i ere mogl, nono kowano awano i ye bakagl te, ere kide ere tedre, ye gak kebra ta kuraiglkwa i, i pi, pia si meda ede, si goraiglmedi, ka giglede yegl dume dugwa. 20Ana igne i Moses ye nem mam kiurko, ye gak wakai kaima ta moglkwa. Ye gak wakai kaima ta moglkwa pre mogl, nem mam ye yugugl teke padigl, ere kugl miurka. Ere kugl miurka, ba suota ede ogo, 21ye i meda edibrika. I meda edibriko, Isip king abuglo ye u kan idre, yene wam morabedi i pi ere kuglkwa. 22Ye ere kuglkwa kade moglko, Isip yoba ere mogl, Moses sule di teigo, Moses ye Isip yoba bitno pamere yegl paugo, ye ka giglede didre, kogon kane kane erukwa ama giglede erumiwe di, Stiven yegl dugwa.
23Stiven ka yegl didre, ama yegl dugwa, Moses bugla yugu 40 nogwa igne, ye ere mogl, yegl di prukwa, Na nina agrama Israel yoba meglmara i, pi kanaluwe di, nomane mina yegl di prisre, 24ye ede ogwa. Ye pidre, kanugwa i, Isip yagl ta ere mogl, Israel yagl ta ere kide ere te, ye ere sugwa. Ere sugo, Moses ye kandre, Israel yagl i kubun ere idre, Isip yagl ikra ye mabuno kide erumara i, ere ikne ede te, si goglkwa. 25Si goglsre, ye prukwa i, God na mina Israel yoba ere inabuka i, Israel yoba pre kan eraiglkwa pamiwe di, yegl prukwa. Yegl prukwa ba Israel yoba ye pre kan erekrime dugwa. 26Ana Moses Isip yagl ikra si goglsre, tagugo i, ye pi kanugwa i, Israel yagl suo yene yene kuda biurko, ye kanugwa. Kandre, ye kubun eragledi ere, yegl dugwa, Yagl suo, ene agigle agigle miurka, siragl pre ene kuda biure? di, yegl dugwa. 27Yegl dugwa ba yagl ta ye agigle ere kide ere togwa i, ye Moses ake nu si eglke ede, yegl dugwa, Ene we, ene ira no bitno moglsre, jasno moratnedi dedume? dugwa. 28Ene eduedi Isip yagl ta si goglnere ikra mere na yegl na si goragledi pitno?#7.28 Isip Kide Kodigwa 2.14 dugwa. 29Yegl dugo, Moses prisre, teke ede pi dumo makan pere ta, Midian we dimara enagledi ede ogwa. Pi dumo i kipai mogl, abu idre, yagl gak suo kuglmiwe di, Stiven yegl dugwa.
30Ana Stiven yegl didre, ama yegl dugwa, Moses bugla yugu 40-pela dumo Midian moglsre, aglke ta dumo wau yomara, muglo Sainai we dimara magigl i ta pi wan moglkwa. Wan moglko, angelo ta Moses moglmara doga bauglo mina suna mogl, u ede kebra pamara ta plau di, bauglo ere pai moglkwa. 31Yegl eruko, Moses ye ede kebra ikra doga dogwa ba de tege erekrumedi kandre, nagie kogl, pi kanagledi ede magigl ogwa. Ye pi kanagledi ede magigl ogo, Yagl Kade ye agle di, yegl di togwa, 32Na ene awanen Abraham ya Aisak ya Jekop i, Godno moluwe#7.32 Isip Kide Kodigwa 3.6 di, yegl dugwa. Yegl dugo, Moses ogo nagie nuglo didre, God kanabuka kudugl podo gogl, kankrukwa. 33Yegl eruko, Yagl Kade ye di te, yegl dugwa, Ene adigl motnara magigl i, na makanana yei kodugwa pre ene kagln towo gugl edo! dugwa. 34Na yobanama dumo Isip meglkwa i, Isip yoba ye ere kide ere teigwa i, na kan kuno ersre, te ye gign akin di, ere meglkwa i, ama prika. Prika pre na erme ye ere inagledi ede atne wiwe dugwa. Yegl pre na ene erme dediga i, ene ede Isip enatnga pre dediwe#7.34 Isip Kide Kodigwa 3.5-10 di, God yegl dume dugwa.
35Ana Stiven ka yegl didre, ama yegl dugwa, God ye yene ere mogl, Moses dede, ye Israel yoba bitno mogl, ye ere inabedi dedidre, te ama angelo ta ege swara ede kebra domara mina Moses moglmara plau dugwa ikra ye Moses ake ple di tenabedi dedugwa. Yegl erukwa ba Israel yoba ye Moses mokono tedre, Ene ira no bitno moglsre, jasno moratnedi dedume? digwa. 36Ana God ye yene Moses dedugo, Moses ere mogl, dumo Isip suna i kimagl ya diu kane kane ersre, Israel yoba agre i ede meda ogwa. Agre i ede meda ogo, mudi nigl Retsi we dimara meglkwa igne i ya dumo wau yomara suna i, bugla yugu 40-pela wan meglkwa igne i, Moses ama kimagl tau mere erumiwe di, yegl dugwa.
37Ana Moses yegl ersre, ye ama ere mogl, Israel yoba di te, yegl dugwa, God ere mogl, Yagl swara ta okuo dedenabe dugwa. Yagl i nono yugobunono mina udre, na ka kep yoba moglmere mere yegl morabiwe#7.37 Lo 18.15 di, Moses yegl dume dugwa. 38Stiven yegl didre, Moses pre ama yegl dugwa, Nono kowano awano Israel yoba i, okna ibo dumo wau yomara wan mogl, makai si meglkwa igne, Moses ye meglmara suna i moglmiwe dugwa. Te, Moses ye ede muglo Sainai kuglo ibo ogwa igne, angelo ta ye ka di togo, Moses ye God kamo aimadi kamin yenabuka i idre, ka kep ere, nono di norukwa, erme yei pai moglmiwe di, Stiven yegl dugwa.
39Stiven yegl didre, ka ta ama yegl dugwa, Okna Moses kogon yegl erukwa, ba nono kowano awano meglkwa i ye kamo prakiure, ye mokono tedre, deno muduno mina ede ikne Isip kane paimara enamnedi prikwa. 40Yegl prisre, te Moses muglo ibo mogl pai moglkwa igne ye Aron di te, yegl digwa, Moses, dumo Isip kide kodinaiglmedi no agre i ede meda ugwa i, ye erme goglmo mo ede bage ta omo mo i, no pre kan erekune digwa. Yegl pre ene no godno tau beke notn, erme nono enamnara i, ede okna enaiglmiwe digwa. 41Ana igne i nono kowano awano ka yegl didre, ye ere mogl, kau kumugl kulu moglmere kia ta ogono mina bekidre, ye taragl bekigwa i gun yei tedre, tawa gagl teigwa. 42Yegl erikwa pre mogl, God nono kowano awano ikra moko togwa. Moko tedre, ye ade ba ya kugl kuri ki kagno kade tedre, kamage ere tenaiglmedi kanige erukwa. God kamo kep yoba ta buk mina bogl atne edugwa i, ama Israel yoba god kibi kamage ere teigwa i pre yegl dugwa, God ene Israel yoba yegl di tome dugwa, Ene bugla yugu 40-pela dumo wau yomara suna wan mogl, taragl si goglsre, tawa gaiglkwa i, ene na ta gagl narekrikwa. Ene god kibi gagl teigwa. 43Tedre, ene godno kibi Molek ye sel yugumo i boglo ersre, te godno kibi ta Refan kiamo kugl kuri mere yegl ta yogwa i ama boglo ere i ede eigwa. God kibi i, ene ye kagno kade tenamnedi kwiano bekigwa. Yegl pre na ene kudano ikne ene kuda bogl tedre, yobuglo eraiglmedi eribo, ye ene si kane si i pi dumo Babilon i yade, dumo ta eglke yomara i pi edinaiglmiwe di, God ye kamo mina yegl dumiwe di, Stiven yegl dugwa.
44Stiven ka yegl didre, ka tau ama yegl dugwa, Nono kowano awano dumo wau yomara suna dumo aglo mere ta wan meglkwa i, God lomo kobuglo mina bogl togwa, ye sel yugu mina yugugl yeigwa i, sel yugu i boglo ere idre, wan meglkwa. Ana sel yugu i, siragl mere yenabuka i God ye Moses di togo, siragl mere obuno di tomere i, Israel yoba bekidre, keigwa. 45Ye yegl ersre, boglo ere i wan mogl, geglko, yugobuno okuo wigwa i ama sel yugu i boglo ere igo, Josua bogl akie ede dumo Kenan suna wigwa. Ye ede suna wigo, God ye ede okna pi, nono kawano awano kudano eruko, ye yugobuno pere pere makan nem ta meglkwa i, yobuglo ere tedre, makano igwa. Nono kowano awano dumo Kenan igwa igne ede u King Devit moglkwa igne i tawa teigwa sel yugu i, yei pai moglkwa. 46Yei pai moglko, King Devit i, God ye wakai kanugo, King Devit ere mogl, nono kowano awano Jekop Godmo i yugu kei tenagledi God di prukwa. 47Di prukwa ba God mane dugwa pre Devit yugu ta kei tekrukwa. Okuo ye wam Solomon ere mogl, tawa teigwa yugu kei tomiwe di, Stiven yegl dugwa.
48Ana Stiven yegl didre, ama ye kot ere teigwa yoba di te, yegl dugwa, Ene na tawa teigwa yugu di kide yei tene digwa ba ene prio! dugwa. God Mogl Mitna Kaima Edugwa i, ye yoba ta yugu keimara atne kipai moglkrukwa. God kamo kep yoba ta okna ka yegl boglkwa, 49Yagl Kade yegl dume dugwa. Kamun mina ibo i, na ame di moglmara siana king mere yegl yogwa. Te, dumo makan i, na katna bolamugl yeimara mere yegl yogwa. Yegl pre ene yugu siragl mere kei naribi, na yugu i mina yugugl kipadre, ir si pragle? dugwa. 50I siragl pre nana taragl mudu ere yeiga yomiwe#7.50 Aisaia 66.1-2 di, God ye kamo mina yegl dumiwe di, Stiven yegl dugwa.
51Ana Stiven ka yegl di kodidre, ka di pi dudumara yegl dugwa, Ene we, ene yoba yugobuno pere, ye God kamo prikrikwa erimere yegl, ene ama yegl ere, God kamo prikre, nomano gigle dumiwe dugwa. Te, ene kowano awano erimere mere yegl ere, ene Mudu Murubuglo ka dugwa i sedigwa. 52Ene kowano awano God kamo kep yoba okna meglkwa i, swara ta ye ere kide ere tekrikwa ta meglmo? dugwa. Ta manugwa. God kamo kep yoba tau okna meglkwa, ye Yagl Du Kaima ta okuo unabiwe digwa i, ene kowano awano ka kep yoba i si geglkwa. Yegl eriko, te ene erme Yagl Du Kaima i ugo, ene ama i pi Rom yoba ogono mina edidre, ye si goraiglmedi erikwa. 53Ene na God lomo di kide yei teniwe digwa ba ene prio! dugwa. God okna ere mogl, angelo tau ye lomo i pi nono kowano awano tenaiglmedi togo, ye teigwa i, erme ene ama igwa. Ene God lomo i, igwa ba ene duglo ta boglkrimiwe di, Stiven yegl dugwa.
Stiven kobuglo sigo, goglkwa
54Ana Stiven ye ka mudu i di kodugo, Kaunsil ye Stiven ka dugwa i prisre, deno podo kaima kubro Stiven tedre, signo gikr erikwa. 55Yegl erikwa ba God Murubuglo ye Stiven moglmara kau si moglko, ye kan heven ibo edidre, God abuglagemo podo kide kaima sugo, kandre, Jisas God ogo wo kra adigl moglko, kanugwa. 56Stiven yegl kandre, ye Kaunsil di tedre, yegl dugwa, Ene prio! Kamun mitna ibo u koglo koglo ogo, Yoba Wam ye God ogo wo kra adigl moglko, na kaniwe di, yegl dugwa.
57Ana Stiven yegl dugo, yoba ye ka dugwa pre meglkwa i prisre, ka podo kide di, ka dugwa i prakiurikwa. Prakiuro, ye kinano ake kegl didre, ye mudu muku di ede u Stiven moglmara u, ye si ake gi di meglkwa. 58Ye si ake gi di moglsre, gudu i pi taun meda edidre, ye si goramnedi kobuglo sigwa. Yoba tau Stiven aglau siragl mere erume digwa i ye ir gaglno gugl i pi yagl kulu ta kagie Sol we digwa moglmara i kagle mina yeidre, kobuglo komono kana Stiven sigo, 59yoba tau ye ama Stiven kobuglo sigo, Stiven ye Jisas agle didre, yegl dugwa, Yagl Kade Jisas yo, na kiana yo! dugwa. 60Yegl didre, yage goglko bodugl, ka podo yegl dugwa, Yagl Kade, ye tadaglme erikwa i, ere te ikne edekro! dugwa. Stiven ka yegl didre, goglkwa.
Currently Selected:
Aposel 7: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
