Kolosi 4
4
1Te, ene tau bitno yoba meglko, yoba ta ene boino pai teigwa i, ene boinoma mabuno wakai ere tedre, taragl tau ere tenaiglkwa pamere i, ere teo. I siragl pre ene bitno yagl ta ama heven ibo moglsre, ene mabuno siragl mere erikwa i, kan moglkwa.
Nono yoba God kamo praiglmedi kamage eramga
2Ene ege ege God di wakai yei tedre, ye kamage ere teo. Te, ene kamage siragl mere eraiglkwa i, wakai ere kinano gudu prisre, kamage erio. 3Te, ene kamage eraiglmara i, no pre ama kamage ere norio. Ene no pre kamage ere noraiglkwa i, God konbauna ta yauro noran, no ye kamo yoba di tedre, Krais kamo okna teke paugwa i, no yoba di te pai moraiglmedi kamage erio. Krais kamo okna teke paugwa i, na di wan moglka pre na si kane sigo, kane yugu pai moglka. 4Ba na kane yugu pai moglmara i, God na Krais kamo di tenatnedi prumere mere yegl di te pai moragledi prika pre ene kamage ere nario.
5Ene God nomanemo idre, yoba pre mediglkrikwa meglmara mabuno wakai boglsre, God kamo di tenamnedi konbauna ege ege dokio. 6Mudi kaya mokna dogon erabedi erumere mere ene ka dinaiglmara i, dogon erabedi ersre, yoba mudu ka panabere kuno ere, di ikne ede tenaiglkwa.
Pol ye yagl suo, Tikikus ya Onesimus dedenagle dugwa
7Ana na moglmara taragl tau plau dugo, na siragl mere moglmere agro Tikikus ene meglmara udre, ka mudu i, ene di tenabuka. Tikikus moglkwa i, no ye deno muduno tomga. Ye wakai ere, ege ege na ake ple di naruko, no akie Yagl Kade niglmo kogonmo yoba muglka. 8Ana na erme Tikikus ene meglmara unabedi dediga i, no munara taragl tau plau dugwa i, ene mudu boglo kugl tedre, ene deno muduno ama si gigle di tenabedi pre dediga. 9Te, Onesimus ama ye bogl akie unabredi na dediga. Onesimus moglkwa i, ye no agro ta Jisas kamo duglo boglkwa yagl ta moglko, no ye deno muduno tomga. Te, ye ama ene dumono Kolosi nem ta moglkwa. Yagl suo i ene meglmara udre, no munara siragl taragl plau dugwa i, mudu ene di tenabrika.
Ka dudumara
10Ana Aristarkus, no akie kane pai muglka i, ene wakai we di togwa. Te, yagl Mak, ye Barnabas yoguglo ta moglkwa i, ene ama wakai we di togwa. Na Mak pre ene okna di teigo, ene prikwa i, ye ene meglmara unan, ene ye kogl kare di io diga. 11Te, yagl ta kagie Jisas Jastus ene ama wakai we di togwa. Yoba tau na bogl kogon akie ersre, God yoba kingno mogl, suglno moglmara ede eglke eglke enabedi erumga ba yagl suota i keme Juda yoba meglkwa. Ye na bogl akie kogon erumnara i mina na dena muduna si gigle di narikwa.
12Ana Epafras, ye ene dumono Kolosi nem ta moglsre, Krais Jisas niglmo kogonmo yoba ta moglkwa i, ye ama ene wakai we di togwa. Epafras moglkwa i, ye ene kaglno mina adiglsre, God ene siragl mere wakai moraiglmedi prukwa i, pre pogl sinaiglmedi ege ege kamage podo kaima ere moglkwa. 13Te, na ene di tebo, praiglmedi prika i, Epafras ye pre mediglkwa yoba dumo Laodisia ya Hierapolis meglkwa i wakai moraiglmedi kogon podo ersre, ene ama wakai moraiglmedi kogon podo erukwa.
14Ana Luk, ye dokta ta moglko, no ye deno muduno tomga i, ye ene wakai we di togo, Demas ama ene wakai we di togwa. 15Nono agroma abaroma dumo Laodisia meglkwa i, Pol ene wakai we di tomiwe di teo. Te, abu Nimfa kipamara God yobama makai sigwa i, Pol ama wakai we di tomiwe di teo.
16Ana na pepa boglka magigl i, yoba ta ene kere tenan, ene pre kodidre, God yobama dumo Laodisia mudu meglkwa i, i pi tebi, ye ama kere praiglkwa. Te, na pepa ta Laodisia yoba bogl teiga i, ye kere kodidre, ene tebi, ene ama kere praiglkwa.
17Ene yagl Arkipus yegl di tenaiglkwa, Yagl Kade ene kogon ta togwa i, ene ere kodinatnga paugwa pre kogon podo ere moglo dio.
18Ana pepa dudumara magigl i, na Pol nana ogona mina ka magigl i boglsre, ene wakai we di teiga. Ene Pol na kane yugu pai moglmiwedi pre moglsre, kamage ere nario. Te, na prika i, God ene yoko kaima ere wakai ere te pai morabedi prika.
Currently Selected:
Kolosi 4: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission