Kolosi 3
3
Krais bogl adigl u kor omga
1Ana God ene Krais bogl ere i kor edugo, ene u kor eigwa pre heven ibo siragl mere yogwa i, inamnedi erio. Krais God ogo wo kra ame di moglmara ikra pre diga. 2Ene heven ibo siragl mere yomere pre i mitna edidre, makandigle taragl pre i atne edio. 3I siragl pre ene kwande gogl kodidre, kiano mina Krais bogl akie u kor pidre, God moglmara atne teke mogl kodigwa. 4Atne mogl kodigwa ba Krais ede ikne unabuka igne, ene ye bogl akie abuglagemo mina plau dinaiglkwa. Krais yene kor meglkwa mabuno kama si moglkwa.
5Yegl pre ene deno muduno goglo pogglau borabuka i, si golo! Si gogltre, ene yagl abu ta bogl kunogl nekre, mabuno deglbi ama kide kodio. Te, deno muduno pgglau boran, ake atne edidre, yoba mabuno kide ere tenamnedi prikre, makandigle taragl ama bubuno goglkrio! Yoba bona mere sinamnedi bubuno geglkwa i, ye god kibi kagno kade teimere mere kuno yegl erikwa. 6Yoba mabuno yegl erikwa i, God ye dem kubro tenabuka.
7Ene okna mabunono kuno yegl paugo, yoba bogl ere wan meglkwa 8ba erme mabuno kide yegl mere kide kodinaiglkwa. Ene yoba deno kubro tekre, ere kide ere tekre, kenaglno sikre, ka tewe dikre, 9ama ene meglmara suna ka kibi dikrio. I siragl pre ene okna siragl mere mogl, mabuno siragl mere ta beglkwa i, kide kodigwa. 10Kide kodigwa pre God ene ere i kor edugo, God moglmere pre pogl sidre, kuno yegl moramnedi yake ede ido pi pai meglkwa.
11Ana nono God yobama munga i, u kor omga pre God erme nono kanugwa i, Juda yoba munga mo yugobuno pere ta munere i ta kankrukwa. Te, no nagino puduo nagie bunga mo boglkrumga i ye ta kankrukwa. Te, yugobuno siragl mere munga mo ka siragl mere dumnere i kankrukwa. Te, yoba yoko munga mo yoba pere boino pai tomga i ama kankrukwa. Krais swara mogl mitna kaima edidre, nono mudu deno muduno mina suna moglkwa pre i swara mem kade paugwa.
Nono mogl atne edidre, deno muduno te ikne ikne edinamga paugwa
12God ene kere idre, yoba pere moraiglmedi edidre, ene dem muduo togwa. Yegl erukwa pre ene mabuno tau eraiglkwa paugwa i, yegl mere paugwa, ene kiede mogl, mogl atne edidre, yoba mitno gogl, mabuno wakai ere tenaiglkwa paugwa. Te, ene yoba tabre deno kubro tekrio. 13Agroma abaroma ta eribi, kide praiglkwa i, ene kanige ersre, tadaglmeno ama kide kodo teo. Yaglno Kade Krais ene tadaglmeno gugl ede tomere kuno yegl mere, ene ye tadaglmeno kide kodo tenaiglkwa pre diga. 14Te, ene mabuno swara ta eraiglkwa podo paugwa i, ene deno muduno te ikne ikne edenaiglkwa paugwa. I siragl pre ene deno muduno ikne ikne tebi, ene deno muduno swara yedre, akie wakai moraiglkwa.
15Ene nomano ya deno muduno bogl mudu Krais sugl morabedi teo. Tebi, Krais deno muduno wida di padigl tenabuka. Ene God ogo nagie swara meglkwa i, mem swara i pre ene agle dugwa. Te, ene ege ege God di wakai yei te pai molo.
16Te, Krais kamo ene nomano ya deno muduno mina kau sinan, ene mogl pai eraiglmara u ta enabuka. Tebi, nomane wakai tenabara i mina ene ikne ikne God kamo duglo boramnedi si gi dio. Ene yegl ersre, te, giglage kane kane mina ene deno muduno bogl God di wakai yei teo. Giglage tau Buk Giglage mina paugwa i ene didre, kaima tau okna digwa i, didre, te, giglage tau Mudu Murubuglo ene nomane tenabere ama ene bekidre, dio.
17Te, ene ka siragl mere dinaiglkwa mo kogon siragl mere ta eraiglkwa i, ene Yaglno Kade Jisas yobama munedi prisre, yomere pamere keme mudu erio. Te, Krais kogon erumara i mina ene Neno Kade God di wakai yei te molo.
Gak neno manoma ya kogon erikwa ya bitno yoba bogl mabuno siragl mere eraiglkwa
18Ene abu, yagl ebinoma ta meglkwa i, ene winoma kano prisre, mogl atne edenaiglkwa paugwa. Yaglno Kade mabuno i du pamedi kanugwa pre ene pre mediglkwa abu ta meglkwa i, yegl erio. 19Te, ene yagl, abu winoma ta meglkwa i, ene ebinoma deno muduno tedre, ye deno muduno ere kide eramnedi erekrio.
20Ene gak meglkwa i, ene neno manoma kano mudu prisre, duglo bolo. I siragl pre mabuno i, nono Yaglno Kade wakai kanugwa. 21Te, ene gak nenoma meglkwa i, gagroma kide pre wan mogl dinaiglmedi ene ye deno muduno ere kide erekrio.
22Ana ene tau yoba pere boino pai teigwa i, ene bitno yoba makandigle meglkwa i, kano ege ege duglo bolo. Ye gumuglnomugl keme, no kogon wakai erumun, ye no wakai kanaiglmedi erekraiglkwa ba ene Yaglno Kade kuduglmo goglsre, deno muduno bogl kogon wakai ere tenaiglkwa paugwa. 23Te, ene kogon mudu ta eraiglmara i, no bitno yoba i keme kogono ere tomnedi prikrio. Ene Yaglno Kade ama kogon ere tomnedi prisre, kogon gigledi erio. 24I siragl pre enene prikwa i, ene ka kaima Yaglno Kade Krais kogonmo ere teigwa. Te, ene kogon erimara yene okuo taragl wakai wakai topo mere yegl ene tenabuka. 25Ba yoba ta kogon kide ere moran, ye ere sinabuka. I siragl pre ye kogon siragl mere erimere i, kuno ere yubu si tenabuka.
Currently Selected:
Kolosi 3: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission