Kolosi 2
2
Pre medigl moglsre, ka mabuno kibi pre dinaiglkwa pre dugwa
1Ene praiglmedi prika i, ene Kolosi meglkwa ya Laodisia yoba ya te, pre mediglkwa yoba tau gumana drana ta kankrikwa i, ene ake ple di tenagledi kogon podo kaima ersre, pitn boglka pre diga. 2Na kogon podo erika i, ene mudu si dakagl mogl, deno muduno ikne ikne tedre, te, ene deno muduno mina yobuglo inaiglmedi kogon yegl erika pre diga.
Te, God kamo okna teke paugwa i, mudu pre pogl sinaiglmedi kogon podo erika. Ka i, mudu pre pogl sibi, ene adigl gigledi moraiglkwa. Ka okna teke pame diga i, Krais kogon okuo erabuka i pre diga. 3Te, nono nomane wakai mudu inamga ya te, mabuno wakai mudu boramga i, Krais yene mabuno kama si moglkwa.
4Ka mabuno yegl diga i, kowai yoba ta ene meglmara u kinano sinamnedi ka dogon erukwa dibi, kano prikraiglkwa pre diga. 5Nono akie moglkrumga ba na ene siragl mere meglkwa ege ege poglo di prisre, gun yeiga. Gun yeiga i, ene yomere pamere mogl pai ersre, Krais kamo pre medigl mogl, ake gi di meglmiwe digwa pre gun yeiga.
Nono Krais bogl si dakagl moramga paugwa
6Ana erme ene Krais Jisas nono Yaglno Kade morabedi igwa pre ene ye bogl si dakagl moglsre, taragl mudu erio. 7No ene beke tomga i, ene yakinaiglkwa pre dumga. Yoba yugu kei ede mitna eimere ya, ede duglane ede atne kaima omere mere yegl, ene Krais bogl si dakagl mogl, ye kamo pre gi dinaiglkwa pre dumga. Te, ene yegl ersre, God ege ege di wakai yei te molo.
8Ana yoba nomano podo paugwa ta ene meglmara udre, ye ka kane kane mem wakai ta paikrukwa i ta dibi, ene ye duglo bogl dinaiglmiwa! Ye kowano awano dimere didre, makandigle lo ere padiglmere ama digwa ba Krais kamo pamere dikrikwa. 9Krais ogo nagie yugwa ba moglmara suna ibo ye God moglmere mere mudu kaima kau sugwa. 10Te ene ye moglmara atne mogl kodigwa pre ene taragl mudu kaima i kodigwa. Te, yoba mo angelo ta mogl mitna edidre, taragl tau bitno meglkwa i, Krais swara mogl mitna kaima ede tedre, ye mudu bitno moglkwa.
11Ana ene Krais yugobunomo mina ede suna wigwa igne, ene deno muduno goglo Krais koko edugwa. Ka padum mere Israel yoba nagino puduo nagie beglkwa. Beglkwa i, ogo nagie u wakai enabedi erikwa ba Krais mabuno ta ersre, ene deno muduno goglo koko edugwa pre diga. 12Te, ka padum ta yoba nigl mina ede atne eimere mere God ene Krais moglmara i atne ede kodugo, ene akie geglkwa mere yegl paugwa. Akie geglkwa ba ene God yobuglomo kandre, pre mediglko, God ene ama ere i kor edugwa. God yobuglo ere, Krais ere i kor edugwa igne pre diga.
13Ana okna, Krais nono deno muduno goglo koko edekrukwa igne, ene tadaglme erimara i, kiano mina gogl kodigwa. Ene geglkwa ba God yene ene Krais bogl adigl u kor enaiglmedi erukwa. Adigl u kor omga i, God yene tadaglmeno gugl ede norsre, 14nono braun pepano koko edugwa. God lomo nono aglauno di pogl noro, braun pepa bogl norukwa i, Krais i pi ede prak mina nil si kide kodugwa. 15Te, Krais ede prak mina goglkwa igne, ye ama murubuglo kide ta yobro podo paugo, nono bitno meglkwa i, yobuglo ere tedre, yoba gumuglno mina ye yobuglno si dudu kodugwa.
Nono Krais bogl gunga pre lo mina atne moglkrumga
16Ana God taragl yegl mere ere noro kodugwa pre yoba ta ene jasno mere yegl moglsre, nigl ya kaya mokna neigwa i pre ta ene mawagl pamara neimiwe dinan, ene prikrio. Te, ye ere mogl, ene wakan kade igne wakan moglkrikwa mo ba kor gere yogwa igne makai sikrikwa mo Juda yoba egeno kade ta makai sikrikwa pre ene aglau erimiwe dinan, ene ama prikrio. 17Lo mawagl pamara pre dugwa i, ege sugunagle padre, dudunabuka paugwa ba taragl kaima i, Krais u kodugwa.
18Te, yoba tau ene topo wakai ta i dinaiglmedi eribi, kan kun erio. Yoba tau ene di tedre, Mogl atne ede, taragl kane kane mawagl erio di tedre, te, Angelo kamage ere teo dinaiglkwa i, prikrio. Ye yene nomane goglo duglo bogl, mogl mitna edinamnedi mem ta paikrumara i, No taragl tau gumuglnomugl eruko, kanumniwe dinaiglkwa. 19Dinaiglkwa ba Krais nono bitno moglkwa i, kamo kide kodigwa.
Krais nono bitno moglko, nono ye ogo nagie mere yegl munga. Yoba ta ogono kaglno ya gogono ki swara paugo, kogon akie erimere yegl, nono ama Krais ogo nagie mere yegl mungo, ye nono bitno mogl, suglno moglkwa. Te, God yene nono yakenaiglmedi erukwa.
20Ene Krais bogl akie geglkwa pre makandigle lo pamara atne kane paikrikwa. Yegl pre ene siragl eruko, makandigle lo duglo boglsre, yoba mogl pai erimere ere pai meglme? 21Makandigle lo kane kane ere padiglkwa i, Taragl tau baikre, akekre, te kaya mokna mawagl erio! digwa. 22Lo i, yobaglku ere padiglsre, yoba ta beke teigwa ba kaya mokna ya ki pre digwa i, erme dudunabuka pre paugwa. 23Yene lono ere padiglsre, duglo boramnedi, mawagl mere ere, ye lotu gigledi ersre, yene ogono nagino u wakai enabedi giugl podo teigwa. Teigo, yoba kan, kuno yene pamara erimedi prikwa ba ta manugwa. Yoba i deno muduno goglo pogglau boglkwa igne, lo i ta ake ple di tekrabuka.
Currently Selected:
Kolosi 2: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission