Kolosi 1
1
Ka Bre
1-2Na agrama abarama wagle, ene dumo Kolosi meglkwa i, na agra Timoti bogl akie muglko, na Pol pepa magigl i ene bogl teiga. Na moglka i, God yene prumere na Jisas Krais dedugwa yoba ta moratnedi kogon naruko, na ere wan moglka. Ene meglkwa i, na agrama abarama moglsre, Krais pre medigl, adigl gigle digwa yoba meglkwa. Te, na prika i, nono Neno Kade God i, ene yoko kaima ere wakai ere tedre, deno muduno wida di padigl tenabedi prika.
Pol Kolosi yoba pre God di wakai yei togwa
3Na Timoti bogl kamage erubuglka igne, ene we di prisre, God ege ege di wakai yei tobuglka. God we diga i, nono Yaglno Kade Jisas Krais Nem moglkwa i pre diga.
4-5No God di wakai yei tobuglka i, Krais kamo wakai, kuno kaima paugwa i, ene meglmara ugwa igne, God ene taragl wakai wakai heven ibo inaiglmiwe di padigl norukrawa we di pre gi di mogl, Krais Jisas pre medigl pai moglsre, God yobama mudu deno muduno teigwa. Ene yegl erime digo, Timoti bogl prisre, God di wakai yei tobuglka.
6Jisas kamo wakai i, ene meglmara udre, pare wai di, ede uglo koglo koglo ogo, yoba bage bage meglmara mogo wakai koglsre, ene meglmara ama mogo wakai koglkwa. Ene okna Jisas kamo prisre, God no yoko kaima ere wakai ere norumedi, ene pre pogl sigwa igne i, ede u ege erme pra, Jisas kamo ene meglmara ama mogo wakai kogl pai moglkwa. 7Ene okna Jisas kamo prikwa i, yagl Epafras beke togo, prikwa. Epafras moglkwa i, ye no bogl akie Krais kogonmo yoba mungo, na Timoti bogl deno muduno tobuglka. Te, ye ene pre Krais kogonmo wakai kaima erukwa yagle moglkwa. 8Yagl Epafras di norukwa i, God Murubuglomo ene ake ple di togo, ene yoba deno muduno teime dugo, prubuglka.
Pol Kolosi yoba pre kamage erukwa
9Ene pre koragle ka yegl digo, prubuglka igne, no ege ege kamage erubuglka. Kamage erubuglka i, God ye Murubuglomo mina ene nomane podo tedre, God nono siragl mere mogl pai eraiglmedi prumere mudu pre yubu sinaiglmedi eran, ene siragl mere mogl pai eraiglkwa i, pre pogl sinaiglmedi kamage erubuglka. 10Pre pogl sidre, ye mabuno wakai ta kanugwa i keme eraiglmedi kamage erubuglka. Te, kogon wakai ya mabuno wakai mina mogo wakai koraiglmedi kamage ersre, te ene ebrie mabuno ta Yagl Kade kagie kade inabuka i keme boraiglmedi kamage erubuglka. Ama God siragl mere moglmere nomane i pai moraiglmedi kamage erubuglka.
11No ene pre kamage yegl ersre, te ene yubun inaiglkwa igne, God yobuglomo pai kawa togwa i, ene yobuglo bogl tenabuka. Ene yobuglo bogl tenan, gun yei, kanana adigl gigledi mogl, oglka erekraiglkwa. Te, ene 12Neno Kade di wakai yei tenaiglmedi kamage erubuglka. Neno Kade pre diga i, yene dumo ta abuglage podo paugo sugl moglmara i, God yobama taragl wakai wakai inaiglkwa i, ene ama akie inaiglmedi di paduglkwa.
13Okna yagl kide mim erumara bitno moglko, nono atne munga ba Neno Kade nono mogl pai mogl dinaiglmedi no ere yugwa. No ere idre, i pi dumo wakaile ye Wam sugl moglmara suna edugo, munga. Ye Wam, dem muduo podo togwa ikra. 14Mungo, ye Wam kogon erumara i mina nono topo si ikne edidre, tadaglmeno gugl ede noro kodugwa.
Pol Krais siragl mere moglkwa pre dugwa
15God siragl mere moglkwa yoba kankrikwa ba Krais ye kuno kaima i nogugl ede norsre, te, God taragl mudu ere yogwa i, Krais mogl mitna kaima ede tedre, bitno moglkwa. 16I siragl pre God taragl kane kane ere yenagledi prukwa i, God ye Krais dedugo, Krais taragl mudu ere yogwa. Taragl ta makandigle meglkwa mo heven ibo meglkwa i, ya te, nono gumuglno mina kanumga mo kankrumga i, Krais mudu ere yogwa. Angelo tau yobuglno podo paugo, ye taragl tau bitno mogl, sugl meglkwa i ama pra, Krais ye ere yogwa pre taragl kane kane i, ye swara pre meglkwa ya paigwa. 17Taragl kane kane i, moglkre, paikre, erikwa igne, Krais swara moglkwa. Te, erme Krais swara sugl moglmara taragl kane kane atne wakai mogl paigwa.
18Te, Krais ede okna pidre, ye yugobunomo bitno moglko, nono ye ogo nagie mere yegl munga. Te, Krais taragl mudu kaima bitno morabuka pre ye komono kana goglsre, adigl u kor ogwa.
19Ana God wakai ta prukwa i, ye mudu moglmere Krais mina kau kaima sinabedi prukwa. 20Te, taragl kane kane makandigle mo kamun mitna paigwa i, Krais kogon erumara mina God bogl akie deno muduno swara yenamnedi erukwa. Ersre, ye Krais ede prak mina bormaimo suru edenabara nono ama God kudamo ikne moglkre, ye bogl deno muduno swara yenamnedi erukwa.
21Ana ene okna God moglmara moglkre, mogl eglke kaima edigwa. Ene nomano mina God kudamo ikne moglsre, mabuno kide bogl meglkwa 22ba erme Krais goglmara i, ye ene i pi God moglmara magigl edugo, ene God bogl swara kaima meglkwa. Te, ene okuo God gumuglo mina adraiglkwa igne, God ene aglau ta erekre, mabuno du bogl meglmedi kanabuka. 23Ba ene pre mediglkwa i, kide kodokre, ake gi di molo. Te, Jisas kamo wakai prikwa i, kinano suo yekre, taragl wakai kane kane kaima plau dinabedi prio.
Jisas kamo wakai we dumga i, yoba tau ene di tedre, priko, te, yoba mere kide bage bage meglkwa i, ama di teigo, prikwa. Te, na Pol ama ka swara i, yoba praiglmedi kogon ere moglka.
Pol God yobama ake ple di tenagledi kogon erie dugwa
24Ana erme ene pre yubun tau iga i, na gun yeiga. Ene Krais yugobunomo Krais ogo nagie meglko, na ene pre ogona nagna mina yubun i moglka. Te, ibun iga igne, Krais okna yubun mere yumara tau ama i tebe edugwa mere yegl paugwa. 25God na kogon narukwa i, ye yugobunomo meglkwa i, ene niglno kogono ere tedre, ye kamo mudu di tenatnedi kogon yegl narukwa.
26Ye kamo mudu beke teiga i, okna teke paugwa. Ka i, yoba okna ibo meglkwa ya yugobuno siramna mere mogl wigwa i, ta prikrikwa ba God erme ye yobama praiglmedi i nogugl ede norukwa. 27I nogugl edidre, ene yugobuno pere pere meglkwa i, ka wakai kaima i, no pre ama pamedi praiglkwa pre i nogugl edugwa. Ka wakai yene ta okna teke paugwa ba erme ede nogugl ugwa i, yegl paugwa, Krais yene ene deno muduno mina suna moglkwa. Krais ene deno muduno mina suna moglkwa pre ene okuo God abuglagemo mina akie moramga i, dudumedi prikwa.
28Ana Krais kamo swara di wan munga. No dumnara i, God nomane wakai wakai noruko, no yoba mudu ye kamo beke tedre, ka gigledi di tomga. Ka yegl di tomin, God gumuglo mina adigl moraiglkwa igne, ye yake kodimedi kanabuka pre dumga. God ye gak kebra mere meglmedi kankrabuka ba yake kodidre, Krais bogl si dakagl meglmedi kanabedi kogon erumga. 29Yegl pre na pitn bogl, kogon podo ere moglka ba nana yobuglna mina kogon erekrika. Krais yobuglomo na si gigle di naruko, kogon podo ere moglka.
Currently Selected:
Kolosi 1: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission