Filipai 4
4
Pol ye Filipai yoba ka kidine tau di togwa
1Ana agrama abarama wagle, dena muduna suna meglkwa i, Krais okuo nono yegl mere ere wakai ere norabuka pre nono Yaglno Kade kamo i, ake gi didre, adigl gigledi molo! Ene na dena mudna suna meglko, na topo wakai ta king bitno gagl inaglka i, ene mina inaglka. Te, gun yeiga i, ene pre gun podo yedre, ene aglke kor kanagledi prika i, ama podo paugwa.
2Ana ene meglmara suna i, na abu suo, Yuodia ya Sintike ka ta di tenaglka. Ene abu suo miurka i, Yaglno Kade gagigle miurka pre na ene di prika i, ene aglke kor nomano ya deno muduno swara yeiro. 3Te, na agra kaima motnga i, ene abu suo ake ple di ten, ye aglke kor deno muduno swara yenabredi prika. Na okna abu suo i bogl Jisas kamo wakai i, ede eglke enabedi kogon podo erumga. Yoba tau no kogono si kegl dinamnedi erikwa ba abu suo i yebriko, yagl Klemen yogo, te kogon yoba tau, God yoba kor aimadi meglkwa bukmo mina yoba kagno paugwa i yeigo, no okna kogon podo akie erumga.
4Ene Yaglno Kade erumara i pre ege ege gun yei molo! Na aglke kor dia, Gun yeio!
5Ene mogl atne edidre, kiede meglbi, yoba mudu ene kiede meglmedi kanaiglkwa. I siragl pre Yaglno Kade unabuka magigl erukwa.
6Ana ene taragl kane kane pre kamage ersre, taragl swara ta pre nomane sikrio. Ene kamage eraiglkwa i, taragl kane kane pre God agle di prisre, ye ama di wakai ye teo. 7Ene yegl eribi, God ene nomano ya deno muduno sugl moran, ene Krais Jisas erumara i pre deno muduno wida di idre, moraiglkwa. Te, deno muduno wida di ibi, yoba pre inamnedi eraiglkwa ba kuno erekrabuka.
8Ana agrama abarama wagle, na ka swara ta ama ene di tenagledi prika. Ene nomano mina mabuno wakai ta paugwa i keme poglo di pre, kinano gudu pre wan molo. Na mabuno wakai we diga i, mabuno kaima ya mabuno du ya mabuno ta deglbi yeikrukwa i, ene mabuno yegl mere poglo di pre, kinano gudu pre wan moraiglkwa pre diga. Te, ene mabuno tau eribi, yoba kandre, wakai pre, ene wakai erime dinaiglkwa i, ene kinano gudu pre wan moraiglkwa pre na didre, ene mabuno ta ersre, agai goglkraiglkwa i, ene poglo di pre, kinano gudu praiglkwa pre diga. 9Ene mabuno yegl mere kinano gudu pre wan moglsre, te, na mabuno tau ene okna beke teiga i ya te, na mabuno siragl mere eriko, ene pre kan erikwa i, ene ama erio. Ene yegl eribi, God yoba deno muduno wida di padigl togwa nem yagle moglkwa i, ene bogl akie moraiglkwa.
Filipai yoba mige moni Pol teigwa pre ye di wakai yei togwa
10Ana ene okna na ake ple di narikwa ba suna bage ake ple di narekrikwa i, ene konbaunano ta yeikrukwa pre ake ple di narekrimedi prika. Ba erme ene aglke kor na ake ple di narimara na gun yedre, Yagl Kade di wakai yei teiga.
11-12Ene okna na ake ple di narekrikwa igne, taragl tau na moglmara ta yeikrukwa pre na kide pre teiga pra ta dikrika. Ta manugwa. I siragl pre mige moni mo makandigle taragl mere yogwa mo yeikrukwa igne i ya te, kaya mokna mere yogwa igne mo kidan paiga igne i na pra iedi prisre, gun yei pai moraglka mabuno i, beke i kodiga. 13Na ege ege pra iedi prisre, gun yei pai moraglka i, siragl pre Krais yene yobuglo bogl narukwa pre na ege ege yegl eraglka i, kuno erukwa. 14Na ege ege gun yei pai moraglka i, kuno erukwa ba erme na yubun igo, ene mige moni mina na ake ple di narikwa i, wakai erikwa.
15Ana na agrama abarama wagle, dumo Filipai meglkwa i, enene prikwa, na koragle Jisas kamo wakai ene di tedre, okuo provins Masedonia kide kodo, ede eiga igne, na kogon ere moratnedi ene keme mige moni mina ake ple di narikwa. Pre mediglkwa yoba bage tau makai si meglmara i, yegl ta erekrikwa ba ene keme erikwa. 16Te, na dumo Tesalonaika moglka igne i aglke kor dagl ene keme na taragl tau inaglka pamara ege mere na ake ple di narikwa.
17Ana na ene mige moni mina ake ple di narikwa pre ene wakai erime diga i, ene prisre, mige moni nare pai moraiglkwa pre dikrika. Na nana mige moni inagledi prikrika ba na wakai prika i, ene na ake ple di narimara i mina ene topo wakai inamnedi bona sigwa mere yegl pamedi prisre, wakai prika. 18Te, erme ene mige moni tau Epafroditus tedre, Pol i pi to digwa i, na mudu i kodiga pre na taragl tau ama inaglka i ta paikrukwa. Ene taragl podo nare kodigwa. Te, ene mige moni narikwa i, na swara narekrikwa ba ene ama God teigo, God kan idre, wakai prukwa. Yoba tawa gagl teigo, God demene erukwa i prisre, wakai prumere mere yegl, ye ene mige moni narikwa i kandre, ama wakai prukwa.
19Ana na Godna ye abuglage sumara suna moglkwa i, taragl wakai kane kane ye moglmara kau kaima sugwa pre ye ene taragl mudu inaiglkwa panabere mere yegl, tenabuka. I siragl pre ene Krais Jisas bogl u swara pi kodigwa pre ye kaima yegl ere tenabuka paugwa.
20Ana nono Neno Kade God i, nono aimadi kamin ye kagie kade tedre, ye debie si pai moramga paugwa. Kaima.
Ka dudumara
21-22Ana yoba ta ye Krais Jisas yobama moglsre, ye yugobunomo suna ta moraiglkwa i, ene Pol wakai we di tomiwe di teo. Te, na agrama abarama, God yobama ta na bogl akie dumo Rom munga i, ye mudu ene wakai we di teigwa. Ye mudu ene wakai we di teigo, te agroma abaroma tau Rom king yugomugl mogl, kogon erikwa i, ye kaima ene wakai we di teigwa.
23Na prika i, nono Yaglno Kade Jisas Krais ene kiano mina yoko kaima ake ple di te pai morabedi prika.
Currently Selected:
Filipai 4: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission