Filipai 3
3
Krais pre medunara swara i mina yoba du munga
1Ana agrama abarama wagle, na di wimara i, erme ene ka yegl di tenagledi prika i, yegl paugwa, ene Yagl Kade erumara i pre gun yei molo!
Ana na ka tau ene okna di teiga i, aglke kor dinaglka ba na oglka ta erekrika. Na aglke kor dibo, ene yage si dinaiglmedi ake ple di teiga mere yegl panabuka. 2Na ka okna diga ba kor dinagle diga i, ka yegl pre diga, yoba kide, ye ka mabuno kibi digwa i pre ene kan kun erio! Yoba i, ye ene ogono nagino ere kide ere tenamnedi prisre, nagino puduo nagie boraiglkwa pamiwe digwa. Yoba i, agl mere yegl meglkwa pre ene kan kun erio diga. 3Ye nagino puduo beglkwa pre God yobama muniwedi prikwa ba nono God yobama kaima munga. Moglsre, nono ogono nagino mina taragl swara ta eremun, God no wakai kanabedi prikrumga. Nono Krais Jisas ere norumara swara i mina gun yedre, God Murubuglo yobuglo norumara i mina God kagie kade tomga.
4Kaima nono mabuno tau eremun, God no wakai kanabedi prikrumga ba na prika i, yoba swara ta yegl prabuka kuno eruma, na moglka i, yegl praglka kuno erukwa. Yoba tau ye ogono nagino mina taragl tau erikwa ba na swara ere ede okna eiedi prika. 5Na diga i, yegl pre diga, no Hibru yoba mune dumga ba na Hibru yoba kaima moledi prika. Na Israel yoba moglsre, Benjamin yugobunomo mina suna moglka. Mana na kugl yogo, na 8-pela de moglko, lo dumere mere yegl, yoba na nagna puduo nagie beglkwa. Te, na kade moglka igne, na Farisi yoba moglsre, God lomo duglo boragledi kogon podo erika. 6Na yegl ersre, te, na God lomo pre mitna ediga i pre Jisas yugobunomo ere kide ere tenaglka pamedi prisre, kaima ere kide ere teiga. Te, yoba lo duglo boglsre, yoba du moraiglkwa i, na wakai kaima duglo boragledi erika pre yoba swara ta na kandre, God lomo si biglke dumiwe dinabuka ta kuno erekrukwa.
7Ana okna na prika i, na taragl tau ogona nagna mina erika i, taragl wakai kaima yomedi prika. Okna yegl prika ba erme prika i, taragl kane kane okna erika i, taragl kide yomedi prisre, Krais kogonmo swara taragl wakai kaima yomedi prika. 8Na yegl prisre, na nana okna siragl mere yoba wakai moledi prika i, pipia mere yegl yomedi prisre, pia si meda ediga. I siragl pre na prika i, na Yaglna Kade Krais Jisas bogl si dakagl morabuglka ya na ye kaima pre kan eraglka i swara pre mitna kaima ediga. 9Te, na Krais pre mediglmara swara i mina God gumuglo mina yoba du moglsre, ama Krais bogl swara kaima morabugledi prika. Na okna lo duglo bogslre, yoba du moragledi erika i kide kodidre, Krais pre mediglmara swara i mina yoba du moragledi prika. Nono Krais pre medunga swara i mina God nono du moraiglmedi erukwa.
10Te, na erme prika i, na Krais swara pre kan eragledi prika. Ye goglsre, adigl u kor ogwa pre ye yobuglomo swara i mina na tege te moglsre, ye nomanemo pamere yegl, na nomana yegl panabedi prika. Krais prukwa i, ye giugl kane kane prisre, nono pre gorabuka i pra we di prumere yegl, na ama ye nomanemo idre, giugl pre, ye pre goraglka i ama pra we dinagledi prika. 11Na yegl mere prisre, te ka kaima prika i, Jisas adigl u kor pidre, kor kaima moglmere yegl, na ama yegl mere moglsre, yoba kor kaima mere yegl wan moragledi prika.
Pol prais inagledi muku die dugwa
12-13Ana agrama abarama wagle, na Krais moglmere mere yegl moragledi prika ba God na ere i du kaima ede kodugo, na Krais moglmere mogl kodiedi prikrika. Te, na yoba wakai kaima ta mogl kodiedi prikrika. Ta manugwa. Na Krais mabunomo eminai duo ere moglka ba na taragl swara ta erika i, yegl erika, yoba resis erikwa igne ye kan ikne ede, taragl tau moknomugl yogwa i kankre, prais inamnedi kan gumanomugl iro edidre, muku dimere mere yegl, na prais inagledi muku diga. Krais na ere ikne edugwa igne i ye na prais inatnedi prisre, na ere ikne edugwa. 14Te, Krais Jisas kogon erumara i mina God na heven ibo unatnedi na agle dugwa i, na ama prais inatnedi prisre, na agle dugwa. Yegl pre na prais i, inagledi muku diga mere yegl paugwa.
15Ana na kan gumanamugl edidre, prais pre muku dinagledi primere yegl, nono yoba ta gak kebra mere moglkre, kaglno mina adigl munga yoba ta munga i, nomano yegl keme panabedi prika. Te, ene nomano ikne yegl ta paikran, na prika God ene nomano siragl mere kugl dugwa i, ene i nogugl ede tenabedi prika. 16God kaima ene nomane tau te pai morabuka ba taragl swara ta eramga podo paugwa i, nono God kamo mina mabuno tau pre kan ere kodumga i, nono ye dumere ere moglsre, kide kodokramga paugwa.
17Agrama abarama wagle, na ebrie mabuno siragl mere erimere i, ene mudu kandre, erio. Te, no ama ebrie mabunono bunere agro abaro tau duglo beglkwa i, ye mabunono ama bekio.
18Ana yoba tau ye mabuno wakai eraiglkwa i, ene kandre, sika sinaiglkwa. Ba yoba tau mere mabuno kide erikwa pre ene ye mabunono sika sikrio. Yoba mabuno kide erikwa i, ye ene ka mabuno di tomne digwa ba ye ka kaima Krais ede prak mina goglkwa ka i mane didre, ka i kudamo ikne mere yegl meglkwa. Na yoba i pre ene okna di teiga. Te na erme ye pre diga i, mitno goglsre, kai ere, ene di teiga. 19Yoba i okuo ka tage idre, u kide enaiglkwa meglkwa. Ye taragl tau ogono nagino mina ersre, gun yenaiglkwa i, pre i mitna edidre, God agaimo taragl i teigwa. Te, ye mabuno tau ersre, agai goraiglkwa i agai goglkre, wakai erumnedi pre, makandigle taragl keme pre i mitna edigwa.
20Ana yoba tau yegl erikwa ba nono we, nono heven yoba munga. Nono heven yoba moglsre, te nono ere yugwa yagl, Yaglno Kade Jisas Krais i, heven ibo kide kodo, unabedi kie ere munga. 21Jisas unabuka igne, nono ogono nagino yobuglomo paikrukwa paugwa i, ere i ye ogo nagie pogl didre, wakai yene yomere yegl edenabuka. Taragl mudu ye kamo praiglmedi yobuglo erumara i mina taragl yegl erabuka.
Currently Selected:
Filipai 3: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission