Filipai 2
2
Krais nomanemo pamere mere yegl, nomane inamga paugwa
1Ana ene prio! Krais ene dem muduo tomara ene deno muduno wida di igwa. Te, Krais ene deno muduno si gigle di togo, meglkwa. Te, God Murubuglomo ene akie si dakagl moraiglmedi erukwa. Te, ene ikne ikne deno muduno tedre, ama ikne ikne ake ple di tenamnedi prikwa. 2God ene yegl mere ere wakai ere te kodugwa pre ene nomano swara yedre, deno muduno swara yeo. Te, ene deno muduno ikne ikne tedre, kogon akie eramnedi erio. Ene yegl eribi, na gun podo yenaglka.
3Ene swara swarade moraiglmara i, ene enene we di prikre, te ene kagno kade inamnedi pre taragl swara kaima ta erekrio. Ene yegl ta erekre, enene pre i atne edidre, agroma abaroma tau moraiglkwa i pre i mitna edio. 4Te, ene enene keme wakai moramnedi prikre, agroma abaroma tau i ama wakai moraiglmedi prio.
5Ene Krais Jisas nomanemo pamere yegl, nomane inaiglkwa paugwa. Ye nomanemo paugwa i, yegl paugwa, 6Krais moglkwa i, God bogl kuno kaima miurka, ba ye prukwa i, ye God moglmere moglsre, mogl mitna keme edenabuka i, i taragl podo pamedi pre i mitna edekrukwa. 7Krais ye yene ake atne kaima edidre, u yoba ogwa. Ye u yoba pidre, yoba mudu niglno kogono yoba mere yegl moglkwa. 8 Nono ogono nagino pamere kuno yegl ye yoba ogo nagie idre, God kamo duglo bogl pi goglkwa. Te, ye goglkwa i, ye mogl atne edidre, ede prak mina goglkwa.
9Ana Jisas ye yene ake atne kaima edidre, goglkwa i pre God ere mogl, ye ake mitna kaima edidre, kagie podo kide togwa. Yoba kagno kade ta igwa i mudu mogl atne kaima edigo, Jisas swara kagie podo kide yugwa. 10-11God ye Jisas kagie podo kide togwa i, okuo yoba mudu goglkono bodugl tedre, drano mina Jisas Krais swara Yagl Kade moglmiwe dinaiglkwa pre kagie kade togwa. Yoba heven ibo meglkwa mo makandigle meglkwa mo makan atne meglkwa i, mudu kaima goglkono bodugl tedre, Jisas Krais Yagl Kade moglmiwe dinaiglkwa keme paugwa. Dibi, God Nem ama kagie kade inabuka.
Pre mediglkwa yoba abuglage sinaiglkwa paugwa
12Agrama abarama wagle, ene na dena muduna suna meglkwa i, okna nono akie munga igne, ene ege ege God kamo wakai ere duglo beglkwa. Erme nono akie ta moglkrumga ba ene ege ege God kamo duglo bogl, siragl mere ene ere yugwa i, i nogugl edinamnedi erio. Te, eraiglkwa igne, God kuduglmo golo. 13I siragl pre God yene ene deno muduno suna mogl, mabuno wakai kanugwa i, ene nomane tedre, mabuno yegl boraiglmedi ama yobuglo bogl togwa.
14Ana ene ege ege siragl ta eraiglmara i, ene kigl nonga dikre, ka kane kane dikrio. 15Ene yegl eribi, yoba meda meglkwa i, ene kenaglno sikraiglkwa paugwa ba ye ene kanaiglkwa i, ene God gagiglma meglmedi kandre, te ene aglau erekre, mabuno du ere meglmiwe#2.15 Lo 32.5 di, ene yegl kanaiglkwa. Yoba yugobuno erme meglkwa i, u kide eigo, ebrie mabunono kugl dugwa ba ene mabuno wakai ere meglbi, ene ye meglmara abuglage si teigwa mere yegl panabuka. 16Ene abuglage yegl si tedre, yoba kor aimadi moraiglkwa ka i, ye ama di tenamnedi erio. Ene yegl eribi, Krais ede ikne unabuka igne, na gun yenaglka. I siragl pre na erme pitn bogl, kogon podo erika i, yoko ta erekrika ba kogon wakai erika pamiwedi kandre, gun yenaglka pre diga.
17Ana erme we, ene Krais pre mediglmara i pre ye kogonmo eramnedi enene mudu meglmere ye teigwa i, yoba tawa mudu gagl teimere yegl mere, enene teigwa mere yegl paugwa. Te, yoba tawa gaiglkwa igne, ege tau nigl wain toide tebe edimere mere yegl, yoba erme na si geglbi, na bormaina kuno yegl mere toide ede meda enabuka. Ba ye na si geglbi, na gun yei pai moraglka. Te, na prika i, ene na bogl akie gun yenamnedi prika. 18Na erme Krais kogonmo ersre, gun yeimere yegl, ene ama gun yeo. Ene gun yebi, nono gun akie yenamnedi prika.
Pol ye Timoti unabuka pre dugwa
19Ana na erme pre gi diga i, Yaglno Kade Jisas konbauna ta yauro naran, na kuri ta mogl, Timoti ene meglmara unabedi dedenagledi prika. Na ye dedibo, ye u ene kandre, siragl mere mogl pai erikwa i, ikne u di naran, na prisre, gun yenagledi prika.
20Na Timoti dedenagledi prika i, i siragl pre ye swara dedenaglka kuno erumedi prika. Timoti moglkwa i, ye nomanemo i, na nomana pamere yegl paugwa. Ye ene we di prisre, ene wakai meglmo mo moglkrimo mo di, ege ege kina gudu prukwa ta moglkwa. 21Na yoba tau dedenaglka i, kuno ta erekrumedi prika. I siragl pre ye yene siragl mere ere wan moraiglkwa i keme prisre, Jisas Krais ye siragl taragl podo pamedi prukwa i, ye pre, taragl yoko mere edigwa. 22Yoba mudu yegl erikwa ba Timoti moglkwa i, gak ta ye nem ake ple di tomere mere yegl ye Jisas kamo wakai i, ede eglke enabedi na ake ple di naruko, ye kogon wakai erukwa i, ene ama kan kodigwa. 23Yegl pre na pre gi dimere yegl, God konbauna tabre yauro naran, na Timoti swara dedenagledi prika. Na moglmara siragl taragl plau dinabuka i komono kana kandre, okuo ye dedibo, ene meglmara u kanabedi prika. 24Te, na ama pre gi diga i, Yaglno Kade konbauna yauro naran, na nana kuri ta mogl, ene meglmara u kanagledi prika.
Pol Epafroditus dedibo, unabe dugwa
25Unagledi prika ba Epafroditus, ene okna dedigo, ye udre, na yubun imara ake ple di nare moglkwa i, erme na dedibo, ede ikne ene meglmara unabedi prika. Ye moglkwa i, na agra moglko, no soldia mere yegl moglsre, kogon yoba akie muglka. 26Ana na Epafroditus dedenaglka pamedi prika i, i siragl pre ye kide sugwa i, yoba tau ene di teigo, ene primiwe di, yoba ye Epafroditus yegl di teigo, ye prisre, ene kide pre dinaiglmedi nomane sidre, ede ikne unagledi prukwa. 27Yoba ene di tedre, Epafroditus kide sume digwa i, kaima digwa. Ye kide sugo, goglkwa baka dugwa ba God ye mirie goglsre, ere i kor edugwa. God ye Epafroditus mirie goglsre, na ama mitna gogl narukwa. I siragl pre na yubun imara i kide prisre, Epafroditus goran, ama kide kaima pre dinatnedi God ye ere i kor edugwa.
28Ana yoba ye Epafroditus kide sumiwe digo, ene prikwa i pre na ye tabre dedenagledi prika. I siragl pre ye aglke kor ene meglmara unan, ene ye kandre, gun yenaiglkwa. Te, ye ene meglmara tabre enan, na ama ene siragl mere mogl pai erimada di, pre yubun deiga i, okuo ta prikraglka paugwa. 29Ana na Epafroditus dedibo, ye ene meglmara unan, ene Yagl Kade yobama akie muniwedi prisre, gun yei, ye di io. Ene ye di idre, te, yoba Epafroditus moglmere mere yegl ta moraiglkwa i, yoba wakai meglmedi prisre, pre i mitna edio. 30I siragl pre ye Krais kogonmo eragledi ersre, goglkwa baka dugwa. Ene eglke mogl, na ake ple di naraiglkwa kuno erekruko, Epafroditus gorabuka pre ibun dekrisre, ene againo idre, na ake ple di narukwa pre diga.
Currently Selected:
Filipai 2: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission