Efesus 3
3
Pol ye Jisas kamo i pi yugobuno pere pere di togwa i pre boglkwa
1Ana Jisas kogon erumara nono erme yugobuno swara munga pre na Pol, kane pai mogl, ene pre kamage ere moglka. Ana yoba na si kane sigo, na kane yoba moglka i, mabuno swara pre ta na si kane sigwa. Mabuno i yegl mere paugwa, na God Kere Yugwa Yagl Jisas kogonmo ersre, ye kamo i pi yugobuno pere, ene Juda yoba moglkrikwa i di teiga pre yoba na si kane sigo, na kane pai moglka.
2Ana na prika i, God kogon ta narukwa i, ene ama pre kan erikwa. God kogon ta narukwa i, ye yoba yoko kaima ere yugwa kamo i, na i pi ene Juda yoba moglkrikwa i, di tenatnedi dedugwa pre diga. 3-5God kogon yegl narsre, te yene ere mogl, ye kamo swara ta yoba okna di tekrumere mere i, na di narukwa. Ye kamo i, yoba okna di tekrukwa ba erme ka i God Murubuglo ere mogl, God kamo kep yoba meglkwa i di tedre, te God no kere i pere edugo, Jisas dedugwa yoba munga i, ama di norukwa. Ana ka swara i pre na komono kana kuri ta boglka. God ye Kere Yugwa Yagl Jisas mina kogon ta eragledi okna di paduglkwa ba yoba okna di tekrukwa i, erme na pre kan erika pre ene ama kersre, pre kan eraiglkwa. 6God ye kamo swara ta okna yoba di tekrukwa ba erme di norume diga i, yegl paugwa, Juda yoba ya yoba yugobuno pere meglkwa i mudu Jisas kamo wakai i prisre, God Kere Yugwa Yagl Jisas ta pre medraiglkwa i, ye yugobuno swara kaima moglsre, God ye yobama siragl kane kane inaiglmedi ka kaima di paduglkwa i, akie inaiglkwa pre diga.
7Ana na Jisas kamo wakai yoba di te wan moglka i, God yene wakai prumere kogon i yoko kaima narsre, yobuglo bogl narukwa pre na kogonmo yegl ere wan moglka. 8God yobama meglmara suna i, na yagl wakai ta moglkrika. Na swara yoba kide kaima ta moglka ba God yene wakai prumara na kogon wakai kaima ta yoko narukwa i, yegl mere paugwa, God Kere Yugwa Yagl Jisas kogon erumara i mina nono taragl wakai kane kane podo kide kaima inamga kamo i, na yoba yugobuno pere pere di tenatnedi, God kogon yegl narukwa. 9God kogon yegl narsre, ye ama kamo swara ta okna yene moglmara teke paduglkwa ikra, na pi yoba di tebo, yoba pre pogl sinaiglkwa pre na dedugwa. God yene okna ibo taragl mudu ere yedre, Jisas kogon u erabara i, yoba ye ta pre medraiglkwa i, ye mudu ere i yugobuno swara edenabuka kamo i okna teke paduglkwa. Okna teke paduglkwa ba na erme di nogugl ede tenatnedi na dedugo, na kogon yegl ere wan moglka.
10Ana Jisas pre mediglkwa yoba, ye Juda yoba meglkwa mo yugobuno pere pere meda ta meglkwa i, God ye i swara edidre, yugobuno kor ta i nogugl edugwa. Ye yegl erukwa i, angelo kade ta heven ibo moraiglkwa i kandre, God ye kogon kane kane erukwa i, ye nomanemo podo kide kaima pamara i mina erumedi praiglkwa pre erukwa. 11God okna kaima ibo taragl yegl plau dinabedi prukwa pre erme nono Yaglno Kade Jisas, God Kere Yugwa Yagl kogon erumara i mina i nogugl edugwa.
12Ana erme we, Jisas nono kogon podo ere noruko, nono ye pre medunga pre nono ede God moglkwa pidre, ka di tenamga i, kuno kaima erukwa. Nono kudugl goglkre, nono kamage eramga i, God kaima prabedi prisre, ye kamage ere tenamga paugwa.
13Ana God ye taragl wakai kane kane ere norsre, ye kamo i pi yugobuno pere pere meglkwa i na ene di tenatnedi dedugwa. Yegl pre na erme kane pai mogl, yubun iga i, ene pre yubun dekrio. Na Jisas kamo ene yugobuno pere pere di teimara swara i pre yoba na si kane sigo, yubun iga. Yegl erika ba ene kide prikre, wakai praiglkwa paugwa. I siragl pre na ene wakai moraiglmedi kogon erimara i, ene aimadi kamun God bogl wakai moraiglkwa.
Efesus yoba pre kamage erukwa
14Ana God nono ere i swara edidre, nono ere wakai ere norukwa pre na ege ege goglkona bodugl, Neno Kade agle didre, ene pre kamage ere teiga. 15Na Neno Kade we diga i, taragl mudu heven ibo meglkwa ya makandigle meglkwa i, ye ere yogwa pre taragl mudu nem yagl moglkwa. 16Ana na ene pre ye kamage yegl ere teiga, God ye yagl podo kaima moglko, ye nomanemo ya yobuglomo pai kawa tomere kuno yegl mere ye Murubuglomo ene deno muduno mina yobuglo podo kaima tenabedi kamage erika. 17Na yegl kamage ersre, ama ene Jisas pre mediglkwa pre Jisas ene deno muduno mina ya nomano mina sugl wakai moran, ene deno muduno wida di idre, ye moglmara mogl atne edinaiglmedi kamage erika. Te, Jisas nono dem muduo podo kide norukwa i, ene ege ege nomano mina poglo di pribi, Jisas dem muduo podo norukwa i, ene deno muduno wagle ede mere duglane idre, si kau si tenabedi kamage erika.
18-19Ana na ene pre yegl kamage ersre, te God Kere Yugwa Yagl Jisas nono dem muduo podo norukwa i, ene ya God yobama mudu pre pogl sinaiglmedi kamage ere moglka. Ye nono dem muduo podo ka kaima norukwa i, mudi nigl mere yegl yogwa. Mudi nigl ta ede prak enatnga kuno erekrukwa ya ede nigl beye atne pi egratnga kuno erekrukwa ya mudi nigl winabo dinatnga kuno erekrukwa moglmere mere yegl, Jisas nono demo muduo podo yegl mere norukwa. Ka kaima yegl yogwa pre nono Jisas dem muduo podo norumere mudu pre pogl sinamga kuno erekrukwa. Kuno erekrukwa ba na ene pre kamage erika i, God ene ake ple di tenan, nomano mina kuri ta pre pogl sinaiglmedi kamage erika. Ene nomane kuri yegl ta ibi, taragl wakai kane kane God moglmara kau si moglkwa i, ene meglmara ama si kau si tenabuka.
20Ana nono God kagie kade tenamga paugwa. God yobuglomo nono deno muduno mina kogon erukwa i, pai kawa togo, ye taragl mudu erabuka keme paugwa. Nono ye kogon siragl mere erabedi agle di pramga mo kinano gudu pramga i, ye erabuka kuno erukwa. Ye ersre, te kogon podo kide, ye ta erekrabedi pramga i ama erabuka kuno kaima erukwa. 21God yobuglomo yegl paugo, ye Kere Yugwa Yagl Jisas mina kogon podo kide ere norukwa pre nono ye yugobunomo mina munga i ye kagie kade erme tedre, okuo aimadi kamun kagie kade te pai moramga. Kaima.
Currently Selected:
Efesus 3: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission