Efesus 4
4
Jisas yobama ye yugobuno swara meglkwa
1Yegl paugwa pre Yagl Kade kogonmo ersre kane paiga moglka i, ene yegl yana diga, God gagiglma konbo mina kaima ta egraiglmedi agle dugwa i, ene egramnedi mogl pai erio.
2Ene enene mogl atne ede, deno muduno wida di idre, deno tabre kubrokraiglmedi prika. Te, ene enene deno muduno ikne ikne tenaiglkwa paugwa. Yegl pre, pre mediglkwa yoba ta ene aglau ere tebi, ene ye aglau erikwa i pre moglkrio. 3God Murubuglo ene mudu i swara ede kodugwa pre ene ege ege deno muduno swara yenaiglkwa mabuno i erio. Yegl eribi, ene akie wakai moraiglkwa.
4Ana nono yugobuno swara kaima mungo, God Murubuglo nono munara suna moglkwa i, ama swara moglkwa. Te, God nono ye gagiglma moraiglmedi agle didre, nono okuo wakai kaima moraiglme dugwa i, nono mudu akie yegl moramnedi kie ere munga. 5Nono Yaglno Kade swara moglko, ye kamo pre medunga i swara paugo, te nigl bunga i ama mem swara paugwa. 6Te, God moglkwa i, swara moglkwa. Ye taragl mudu bitno moglkwa. Te, ye nono mudu Neno moglsre, nono mudu munara suna mogl, kogon kane kane ere, ake ple di noro moglkwa.
7Ana nono yugobuno swara munga ba God Kere Yugwa Yagl yene nono siragl mere ere noragledi prumere i ere noro, nono ye kogonmo pere pere eraiglmedi yobuglo ya nomane norukwa. 8God kamo bage swara ta Jisas yegl mere erabe dugwa i, yegl paugwa,
Ye ede kuglo ibo ogwa igne,
ye yobuglo ere, kuda ikne si kane si yudre,
ye taragl wakai kane kane yoba tomiwe#4.8 Giglage 68.18
di, God kamo mina yegl dugwa. 9Ana ene prio. God kamo bage swara i mina ka ta dugwa, Ye ede kuglo ibo omiwe dugwa. Ye ede kuglo ibo omiwe dugwa i, komono kana ede atne makandigle udre, okuo ede kuglo ibo ogwa pre dugwa. 10Jisas swara ye komono kana ede atne makandigle udre, okuo ede kuglo ibo pi, mogl mitna kaima ede, kagie kade paugo, dumo uglo koglo koglo mogl kuno erukwa. 11Yegl ersre, te yene ere mogl, nono ye kogonmo pere pere eraiglmedi nomane ya yobuglo norukwa. Yoba tau ye dedugwa yoba moraiglmedi tedre, tau God kamo kep yoba moraiglmedi tedre, tau Jisas kamo i pi yoba pere pere di tenaiglmedi tedre, te tau pre mediglkwa yoba suglno yoba mogl, God kamo beke tenaiglmedi togwa.
12Ye kogon kane kane tomere i mina God yobama mudu ye kogonmo eribi, nono Krais yugobunomo mina munga i, ama yakenamga. 13Akie yake pai mun, nono God Wam pre medunere ya pre kan erumnere u swara enabuka. U swara enan, nono yake ede pi yoba mere yegl mogl, Krais moglmere mere kuno yegl moramga.
14Ana nono gak kebra mere yegl moglkre, yake ede pi yoba mere yegl mun, nono Jisas kamo prisre, pre medunga i ake gi di moramga. Yoba tau ka pere ta yu di noribi, nono nomane sidre, kinano suo gudukramga. Ye nono bakagl noramnedi u kinano sidre, ka kibi kane kane nono pre medraiglmedi dinaiglkwa ba nono ka dinaiglkwa i prisre, nomane kor ta ikramga. 15Yoba tau u ka kibi kane kane dinaiglkwa ba nono ye erimere mere yegl ta erekramga. Nono yoba mudu deno muduno tedre, ka kaima keme di tenamga. Nono yegl ere, yake ede kade pi yoba mere mun, nono ebrie mabunono mudu u pere ta enan, nono mogl ede pi pi, bitno yagl Jisas, God Kere Yugwa Yagl moglkwa i, moglmere kuno yegl moramga. 16Jisas nono bitno moglko, nono ye ogo nagie mere yegl munga. Ana nono ogono nagino siragl mere kunga i kamga. Ogono ya kaglno ya gogono ya yobuglno u swara kaima pi, ogono gagno swara paugwa. Te, ogono kaglno ya deno muduno, ogono gagno mudu wakai paugo, wakai munga ba deno muduno mo ki ta kide erukwa igne, wakai ta moglkrumga. Kuno yegl mere Jisas ye nono yobuglo bogl noran, nono mudu deno muduno ikne ikne tedre, kogono pere pere siragl mere ta norabere i eun, nono mudu yake ede pi yobuglo idre, wakai moramga.
Jisas yugobunomo mabuno kor boraiglkwa
17Ana na nono Yaglno Kade Jisas dra idre, ene ka giglede di teiga. Yoba God kamo pre pogl sikre, meda meglkwa i, ye nomano kugl dugo, mabuno gua gua ere wan meglkwa. Ye ere wan meglmere kuno yegl, okna ene ama yegl ere wan meglkwa. Okna yegl erikwa ba erme ene yegl erekrio. 18Yoba meda meglkwa i, nomano u kide ogwa pre ye nomano gigle di kodugo, ye nomane kor inakiurikwa. Yegl erikwa pre ye God kamo pre pogl sikre, kor aimadi moramga God nono norukwa i, yoba i ta ikrikwa. 19Te, yoba meda meglkwa i, ye mabuno kide kane kane ere kan kodigwa pre ye agai ta goglkrikwa. Ye agai goglkre, mabuno kide ya mabuno gua gua siragl mere ta eramnedi prikwa i kide kodokre, ege ege ere wan mogl, ere ede podo enamnedi prikwa.
20Yoba meda meglkwa i, yegl ere wan meglkwa, ba no ene God Kere Yugwa Yagl kamo di tomga i, no ene yegl eraiglmedi beke tekunga. 21No Jisas kamo ene beke tomgo, ene prikwa i, Jisas kamo kaima pamere di tomgo, prikwa. 22No Jisas kamo yegl beke tomgo, ene prikwa, ene okna mogl pai erikwa i, deno muduno okna goglo paugwa i, duglo bogl wan meglkwa. Ene deno muduno goglo i, tadaglme eraiglmedi pogglau bogl, u kide kaima pidre, ene bakagl togwa. Yegl mere erukwa ba ene deno muduno goglo okna paugwa i, ene gugl kide kodimiwedi, ene yegl beke tomga. 23Te, ene ka ta beke tomga i, yegl mere paugwa, God nomane kor ene ege ege beke te moglko, ene ege ege kiano mina nomane kor kor imiwe di, ene okna yegl beke tomga. 24Te, God deno muduno kor ene padigl togwa pre di tomga i, God yene mabuno du ere, wakai kaima moglmere yegl, ye ene deno muduno kor padigl tomiwe dumga.
25Ana God ene deno muduno kor padigl togwa pre ene ka kibi digwa mabuno i, kide kodio. Nono erme yugobuno swara munga i, ka kaima keme di ikne ikne edinamga. 26Te, ene ege tau deno kubraiglkwa ba ene deno kubraiglmara i, tadaglme erekre, tabre kide kodinaiglkwa.#4.26 Giglage 4.4 Ene deno kubraiglkwa i pai mogl enan, ade beinan, kide panabuka. 27Ene Satan agai tekrio. 28Te, ene tau yoba taraglno kunogl neigwa i, mabuno i kide kodo, enene ogono wagle kogon ere yagl, i neo. Ene kogon eribi, ene enene si nedre, te, yoba ta kaya mokna mo ki ta yeikrabuka i, ama ene ake ple dinaiglkwa kuno erabuka.
29Ana ene ka dinaiglkwa i, ka kide ya ka tewe ki dikrio. Ene ka yomere pamere didre, te, ene ka siragl mere dibi, yoba ake ple di tenan, wakai moraiglkwa i keme dio. 30God ene okuo agre i ede enagledi Mudu Murubuglo muno gane mere yegl ene ere padigl togo, ene meglmara suna moglkwa i, ene ye kide prabedi erekrio. 31Te, ene yoba kide pre teigwa mabuno i, ene kide kodio. Ene deno kubro, yoba deno bogl tedre, kigl nonga digwa i kide kodidre, ama ene yoba kenaglno sigwa ya ene mabuno siragl mere ere, yoba ere kide ere tenamnedi erikwa i, kide kodio. 32Ene mabuno yegl kide kodidre, yoba deno muduno tedre, enene ikne ikne ere wakai erio. Te, God komono kana ere mogl, ye Kere Yugwa Yagl kogon erumara i mina ene tadaglmeno gugl ede tomere kuno yegl mere, yoba ta ene ere kide ere tenabuka i, ene ake moglkre, ere ede teo.
Currently Selected:
Efesus 4: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission