Efesus 5
5
Abuglage mina mogl pai eramga
1Ana ene God gagiglma mogl kodigo, God dem muduo podo ene togwa. Ene God gagiglma meglkwa pre God ebrie mabuno erumere yegl ene erio. 2God Kere Yugwa Yagl Jisas ye nono dem muduo podo norumara i, ye nono ere inagledi goglsre, tawano God te kodugo, God kandre, dem muduo aragan erukwa. Ana Jisas dem muduo podo norumere yegl, ene ama yoba deno muduno te wan molo.
3Ene God yobama meglkwa pre ene yagl abu pere bogl kunogl nedre, agl bugla mabuno beglmere yegl boglsre, te yoba ta taragl kan nenabuka i bubuno goraiglkwa i ta kuno erekrukwa. Mabuno i ka kaima ene meglmara suna i ta plau dikrabuka pre diga. 4Te, ene ka tewe di, ka boglo gua gua ere, ka kide kane kane dinaiglkwa i ama kuno erekrukwa. Ba ene ka dinaiglkwa kuno erukwa i, ene God di wakai yei te wan moraiglkwa swara i kuno erukwa.
5Ene pre kan ere kodigwa, yoba yagl abu pere bogl kunogl nedre, agl bugla mabuno beglmere yegl boglsre, te yoba pere taraglno bubuno geglkwa i, God ya ye Kere Yugwa Yagl yoba kingno mogl, suglno morabrara taragl swara ta ikraiglkwa. Yoba ere mogl, yoba pere ta taraglno bubuno geglkwa i, ye taragl i pre gumano kagle edigwa pre ye god kibi ta kagie kade teigwa mere yegl paugwa. Yegl pre ye ka kaima ede suna ta pikraiglkwa. 6Yoba ta udre, ene ka kibi di te, Mabuno tau yegl wakai pame didre, ene bakagl tenamnedi eribi, ene prikrio. Yoba meda mogl, God kamo sedigwa i, ye mabuno kide yegl erimara i pre God ye dem podo kubro togwa. 7Yegl pre ye mabuno kide erimara i, ene suna pi mogl, akie erekrio.
8Ene okna mim erumara meglkwa ba erme ene ede u nono Yaglno Kade yugubonomo suna wigwa pre ene abuglage sumara meglkwa. Yegl pre yoba abuglage sumara mabuno ta boraiglkwa kuno erukwa i, ene bolo. 9Yoba ta abuglage sumara moraiglkwa i, ye mabuno wakai ya mabuno du ya mabuno kaima duglo boraiglkwa kuno erukwa. 10Yegl pre nono Yaglno Kade mabuno ta wakai kanabuka i, ene doko kandre, eraiglkwa keme paugwa.
11Yoba mim erumara mogl, mabuno gua gua erikwa i, ene akie erekraiglkwa. Ba ene mabuno i kide yomedi i nogugl edenaiglkwa paugwa. 12Yoba ta mim erumara mogl, mabuno kide atne kra teke mogl, erikwa i, na erme dibo, nono agai goramga pre na di nogugl edekraglka. 13Na i erme ta dikraglka ba abuglage sugwa igne, yoba taragl kane kane kan pogl simere yegl, ene ye mabuno erikwa i mabuno kide yomedi i nogugl edibi, yoba nomane idre, tadaglme eunedi praiglkwa pre diga. 14Abuglage sugwa igne yoba taragl kan pogl sigwa mem i pre yoba tau ka bage ta yegl digo, prumga,
Ene ugl pai mogl, kian mina goglnga i, adiglo!
Ene adigln, God Kere Yugwa yagl abuglage si ene tenabiwe
di, yegl digwa.
15Ana ene mogl pai eraiglmara i, kan kun ere, mogl pai eraiglkwa. Yoba nomano kide paugwa ere wan meglmere yegl erekre, ene nomane wakai idre, wan moraiglkwa. 16Te, nono ege erme munga i, tadaglme u podo kide ogo, ege kide yogwa pre ene yoko ta moraiglkwa kuno erekrukwa. Ene ege ege God kogonmo ere, yoba ere wakai ere teo. 17Ene nomane gua gua idre, wan moglkraiglkwa. Nono Yaglno Kade ene siragl mere eraiglmedi prukwa i, ene pre kan pogl sidre, erio.
18Ene ama spak erekrio. Yoba spak ersre, mabuno gua gua erikwa pre ene spak erekre, Mudu Murubuglo ene si kau si tenabedi ye moglmara mogl atne ede molo. 19Ene yegl ersre, enene akie mogl, giglage kaima di ikne ikne edenaiglkwa. Ba ene giglage dinaiglkwa igne, ene drano mina dikrio. Ene deno muduno bogl akie Yaglno Kade giglage di teo. 20Te, nono Yaglno Kade Jisas, God Kere Yugwa Yagl i kogon erumara i pre ene God Nem ege ege di wakai yei teo. Jisas kogon erumara i mina God ene taragl wakai kane kane ere togwa pre ene ege ege ye taragl mudu erukwa i poglo di prisre, ye di wakai yei teo. 21Te, ene God Kere Yugwa Yagl Jisas pre mitna edidre, ikne ikne mogl atne ede molo.
Yagl abu siragl mere mogl pai eraiglmere
22Ana ene abu meglkwa i, ene Yaglno Kade moglmara mogl atne ede meglmere kuno yegl, ene winoma moraiglmara mogl atne ede molo. 23I siragl pre nono God Kere Yugwa Yagl yugobunomo mina munga i, Jisas nono ere idre, nono bitno moglmere yegl, yagl meglkwa i, ye ene ebino meglkwa i, bitno meglkwa. 24Yegl pre nono God Kere Yugwa Yagl yugobunomo mina munga i, Jisas moglmara mogl atne kra edumnere yegl, abu ama ye winoma moraiglmara mogl atne kra edidre, kano mudu praiglkwa paugwa.
25Te, ene yagl meglkwa i, ene ebinoma deno muduno teo. God Kere Yugwa Yagl yugobunomo mina nono suna munga i, ye okna dem muduo norsre, nono ere inagledi goglmere yegl, ene ebinoma deno muduno yegl tenaiglkwa pre diga. 26Jisas goglkwa i, ye yugobunomo tadaglmeno koko edidre, yene yobama moraiglmedi ye kamo mina nono nigl pai norukwa. 27Te, nono ye yugobunomo suna munga i, tadaglme mo aglau swara ta ye gumuglo mina paikran, deno muduno pe kaima sinan, nono ye yobama du kaima moramga pre goglkwa. 28Ana Jisas nono dem muduo podo norsre, nono pre goglmere mere yegl, ene yagl ama ebinoma deno muduno tenaiglkwa pre diga. Te, ene enene ogono nagino ere wakai erimere yegl, ebinoma ere wakai ere teo. Ene ebino bogl swara kaima meglkwa pre yoba ye ebinoma ere wakai ere teigwa i, ye yene ama ere wakai ere teigwa. 29-30I siragl pre yoba yene ogono nagino ere kide erekrikwa. Ta manugwa. Ye ogono nagino ere wakai ere, kaya mokna tedre, yegl erikwa. Kuno yegl mere ene ebinoma ere wakai ere teo.
Ana yoba yene ogono nagino ere wakai erimere kuno yegl mere God Kere Yugwa Yagl yugobunomo mina munga i, nono ye ogo nagie mere yegl munga pre ye nono ama yegl mere ere wakai ere noro moglkwa. 31Yegl erukwa pre okna ibo God kamo mina yegl dugwa,
Yagl ye nem mam kide kodidre, ebie bogl si dakagl morabrika.
Miur, ogono nagino swara kaima mere yegl pamiwe#5.31 Oknayene Ibo 2.24
di, yegl dugwa. 32Ka i, mem podo kide atne paugwa. Mem podo atne pame diga i, yagl abu bogl idre, u swara eimere mere yegl, nono God Kere Yugwa Yagl Jisas bogl u swara pidre, swara kaima munga pre diga.
33Na diga magigl i, nono Jisas bogl u swara omga pre diga ba na ama yagl abu pre dinaglka, ene prio! Ene yagl meglkwa i, enene wakai kanimere mere yegl, ebinoma ama wakai kanibi, te ene abu meglkwa i, ene winoma moraiglmara mogl atne ede molo.
Currently Selected:
Efesus 5: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission