Isip Kide Kodigwa 7

God ye Moses ya Aron aglke kor king moglmara enabredi di togwa

1Ana Yawe ere mogl, Moses yegl di togwa, Ene pro! Na God moglka. Na ka kep yoba ka di teigo, ye i pi yoba pere di teigwa. Kuno yegl mere ene Isip king ka di tenatnga i, ene na moglmere yegl motn, Aron ene kanen kep yoba mere yegl morabuka. 2Na ka siragl mere ene Di to! dinaglka i, ene i pi Aron di ten, ye i pi Isip king di te, Israel yoba ene dumonen kide kodo, ede meda enaiglmedi pra we do! dinabuka. 3Aron yegl dinabuka ba na dumo Isip suna magigl i yoba nomane inaiglmedi kimagl podo kaima mere kide eragledi prika pre nana eribo, king nomanemo gigle dinan, 4Ene Israel yoba ede pi dinaiglmedi mane dinabuka. Mane dinan, na yobuglo ersre, Isip yoba yubun podo tebo, ene Israel yoba, na yobanama meglkwa i, ene yugobunono mudu dumo Isip kide kodinaiglmedi agre i ede enaglka. 5Na yobuglo ere, Israel yoba dumo Isip kide kodinaiglmedi agre i ede meda ebo, na Yawe moglka i, Isip yoba ama pre kan eraiglmiwe di, Yawe yegl dugwa.

*************************

Aron muglbomo u toki koglo ogwa

8 Ana Yawe ere mogl, Moses ya Aron yegl di togwa, 9Isip king ere mogl, Ene kimagl ta eriro! dinabuka. Yegl dinan, Moses, ene Aron di te, yegl dinatnga, Ene muglbonen pia si king moglmara gumamugl edin, u toki koglo enabiwe di, yegl dinatniwe dugwa. 10Yawe yegl dugo, Moses ya Aron ede pi king moglmara pidre, Yawe dumere eribrika. King ya ye yobamo kade kan meglko, Aron muglbomo pia si atne edugo, u toki koglo ogwa. 11U toki koglo ogo, king ere mogl, ye nomane teigwa yagle ya kumo giai erikwa yagle agle dugo, wigwa. Ye udre, yene kimagl pre kan erimere ersre, Aron erumere yegl erikwa. 12Ye swara swarade muglbono pia si atne edigo, u toki koglo eigwa. U toki koglo eigwa ba Aron muglbomo u toki koglo ogwa i, toki mudu pemgo edugwa. 13Mudu pemgo edugo, king kan moglkwa ba Yawe okna dumere yegl, king nomanemo kobuglo mere yegl gigle dugo, Moses ya Aron ye ka di tebrika i prikrukwa.

***********************

Nigl u bormai koglo ogwa

19 Ana Yawe ere mogl, Moses yegl di togwa, Ene we, ene Aron yegl di tenatniwa, Aron yo, ene muglbonen ake duglo si, nigl kade ya kebra, ya nigl nubun dumo Isip suna meglmara i mudu buglo suo! Yegl etn, Isip suna nigl i mudu u bormai koglo enabuka. Te, nigl tau nigl migi mina atne moglkwa i, nigl migi ede mina bekigwa ya kobuglo mina bekigwa atne moglkwa i, ama u bormai koglo enabiwe di, ene Aron yegl di tenatniwe dugwa.

20Ana Yawe yegl dugo, Moses ya Aron ye dumere eribrika. Isip king ye yobamo kade bogl kan meglko, Aron muglbomo ake duglo si, nigl Nail muglbo wagle sugwa. Sugo, nigl Nail u bormai koglo ogwa. 21U bormai koglo ogo, buglo bagle mudu nigl Nail mina meglkwa i geglko, kubuno kide kaima erukwa. Yegl eruko, Isip yoba nigl Nail kogl nenaiglkwa kuno erekrukwa. Te, dumo Isip suna i, nigl moglkruko, bormai keme moglkwa.

Currently Selected:

Isip Kide Kodigwa 7: KB

Highlight

Compare

Copy