Isip Kide Kodigwa 8

Koglko mere kide wigwa

1Ana Yawe ere mogl, Moses yegl di togwa, Ene Isip king moglmara pidre, ye yegl di tenatniwa, King yo, Yawe yegl dugwa, Na yobanama ede meda pidre, na kagna kade naraiglmedi pra we do! 2Ene mane ta din, na ene dumonen Isip mudu koglko mere kide kaima moraiglmedi ere edenaglka. 3Koglko mere kide kaima nigl Nail mina moglsre, ede u yugunen yugugl udre, kiule panara u, ede boglnen mina pidre, mere kide moraiglmiwa. Te, ye ama ede pi ene nigl kogonen yoba ya yobanma mudu yuguno yugugl pidre, plaua nokinaiglmara ya bret garaiglmara ama pra, koglko keme moraiglmiwa. 4Koglko puglo di, ene ya ene yobanma ya ene nigl kogonen yoba mudu ogono gagno mina akenaiglmiwe Yawe yegl dume dinatniwe di, Yawe yegl dugwa. Yawe yegl dugo, Moses ka i king di togo, king prikrukwa.

5 Ana Yawe ere mogl, Moses aglke kor di togwa, Ene Aron di ten, ye koglko dumo Isip kau sinaiglmedi muglbomo ake duglo si, nigl kade ya kebra ya nigl nubun meglmara buglo sinabiwe dugwa. 6Dugo, Moses Aron di togo, Aron muglbomo ake duglo si, nigl kane kane Isip suna meglmara buglo sugo, koglko mere kide u, dumo Isip kau sigwa.

***********************

Kugane u dekabe koglo eigwa

16Ana okuo, Yawe ere mogl, Moses yegl di togwa, Ene Aron yegl di tenatniwa, Ene muglbonen ake duglo si, makan kugane wagle sinatniwa. Ene sin, dumo Isip koglo koglo i, kugane u dekabe koglo enabiwe di, yegl dinatniwe dugwa. 17Yawe yegl dugo, Moses Aron di togo, ye dumere eribrika. Aron ere mogl, muglbomo makan kugane mina sugo, dumo Isip koglo koglo i, kugane mudu u dekabe koglo ogwa. U dekabe koglo ogo, dekabe mere kide moglsre, yoba ya agl bugla akidre, giugl kaiglkwa.

***********************

Diun mere kide wigwa

20Ana Yawe ere mogl, Moses yegl di togwa, King tagna kana adiglsre, ede nigle enabuka. Yegl pre ene tagna kana adiglsre, ede pi ye tegigl yenagledi enatniwa. Ene ede pi king tegigl yedre, ye yegl di tenatniwa, King yo, Yawe ene yegl di togwa, Na yobanama ede pi na kagna kade naraiglkwa i, ene kanige ero! 21Ene kanige erekitn, na diun mere kide unaiglmedi dedenaglka. Dedibo, ene ya ene yobanen kade ya ene yobanma mudu meglmara u kau sinaiglmiwa. Ye Isip yoba mudu yuguno wagle yugugl kau sidre, makan gaba mudu si kegl dinaiglkwa. 22Yegl eraiglkwa ba igne i na dumo Gosen, na yobanama kipai meglmara i, diun dumo i moglkraiglmedi i pere edenaglka. Na yegl eraglka i, ene na Yawe dumo Isip suna moglmedi pratnga pre yegl eraglka. 23Na yobanama i pere edidre, ene yobanma i pere edidre, eraglka pre diga. Na kimagl eragle diga i, tagna eragle di, Yawe yegl dumiwe dinatne dugwa. 24Yawe yegl didre, tagna ye dumere eruko, diun mere kide ede u king yugumo ya ye yobamo kade yuguno yugugl kau sigwa. Ye dumo Isip mudu kau sidre, dumo Isip ere kide erikwa.

Currently Selected:

Isip Kide Kodigwa 8: KB

Highlight

Compare

Copy