Oknayene Ibo 38
38
Juda ya Tamar kano paugwa
1Ana igne i Jekop wam Juda ere mogl, agiglema meglmara kide kodidre, yagl ta dumo Adulam we dimara kipaugwa kanagledi ede ogwa. Yagl i kagie Hira we digwa. 2Juda ede pi dumo Adulam i pidre, Kenan abai ta kanugwa. Abai i yagl ta Sua we digwa abuglo moglkwa. Ye abai i kandre, ere mogl, yugwa. Yugo, ye bogl swara pabriko, 3ye dane paugwa. Dane paugo, okuo yagl gak ta kuglkwa. Kuglko, Juda ye kagie Er we dugwa. 4Te, okuo Juda ebie aglke kor yagl gak ta kuglkwa, kagie Onan we dugwa. 5Te, okuo ye dumo Kesip we dimara moglkwa igne, ye yagl gak ta ama kuglkwa, kagie Sela we dugwa.
6Ana okuo Juda wam komono Er i kade moglkwa igne, Juda ye abu ta bogl i wam togwa, kagie Tamar we digwa. 7Abu i bogl i togwa ba Juda wam komono Er i, Yawe gumuglo wagle yoba kide moglkwa pre Yawe ye si goglkwa. 8Yawe ye si goglko, Juda ere mogl, wam Onan yegl di togwa, Ene agitn goglkwa pre ene ye ebie inatnga paugwa. Ene in, ye gagiglma tau kuran, gagiglma i ene agitn goglkwa i gagiglma meglme dinaiglkwa. 9Yegl dugwa ba Onan prukwa, Ye gak ta kuran, gak kurabuka i na gagrama ta moglkraiglme di prukwa. Yegl pre ye bogl swara pabrika igne, abu i ye wie goglkwa ikra gagigle ta kuglkrabedi, Onan niglmo yoko makan mina edugwa. 10Yegl erukwa i, Yawe gumuglo wagle mabuno kide boglkwa pre Yawe ye ama si goglkwa. 11Yawe ye si goglko, Juda ye wam okuo Sela abu i inabuka kudugl goglsre, ye agigle suo giurere ama gogl dinabedi prukwa. Yegl prukwa pre ye ere mogl, ebiamo Tamar yegl di togwa, Ene we, ene ede ikne nen moglmara pidre, na wana Sela kade morabedi sugl mogl, abu werai moratniwa. Ye okuo ene inabiwe di, yegl dugwa. Yegl dugwa pre Tamar ede ikne nem moglmara ogo, nem bogl pai miurka.
12Ana bugla yugu tau ede ogo, Juda ebie goglkwa. Juda ebie i, yagl Sua abuglo ikra goglko, yoba kai erikwa. Kai ere kodigo, Juda ere mogl, ye yagl kabagle Hira, Adulam nem ikra bogl ede pi Juda nigl kogonmo yoba sipsipmo yugo baiglmara ede ebrika. Ye sipsip yugo baiglmara i, dumo Timna we digwa. 13Ye ede ebriko, yoba tau ere mogl, abu Tamar moglmara pi, ye di te, yegl digwa, Ene yuan yagl ede Timna pi sipsipmo yugo baragledi ede ome digwa. 14Ana Tamar kanugwa, Juda wam okuo Sela ikra kade moglkwa ba ye Tamar ikrukwa. Yegl pre yoba Tamar ka di teigwa i ye prisre, abu werai kuguglmo gaglmo i gugl edidre, kugugl gagl pere tau edugwa. Edidre, lap ta idre, ye guma dra yoba kan dinaiglmedi guma dra si kegl didre, ye ede pi konbauna ta ede dumo Enaim suna omara konbauna nogagle bina ame di moglkwa. Konbauna nogagle i, konbauna ede dumo Timna omara yogwa.
15Ana Juda ede u konbauna nogagle ikra udre, abu i kanugwa. Ye guma dra si kegl dugwa pre Juda ye kandre, konbauna abu ta moglmedi kanugwa. 16Ye ebiamo moglmedi kankre, konbauna abu ta moglmedi kanugwa pre ye ede pi abu i moglmara pidre, Nono bogl swara panabugle dugwa. Dugo, Tamar di ikne ede, Ene topo siragl mere natn, nono bogl swara panabugle? di, yegl di prukwa. 17Yegl di pruko, Juda yegl dugwa, Na meme tau kuglka. Na yoba ta dedibo, ye meme nagigle ta yu, ene tenabiwe dugwa. Yegl dugo, abu aglke kor yegl di prukwa, Ana na taraglnen ta ake moglbo, meme i yu natn, taraglnen te ikne edenagle di, yegl dugwa. 18Yegl dugo, Juda ye di pre, Ene siragl taragl inatne? dugwa. Yegl dugo, Tamar di ikne ede, yegl dugwa, Ene ring ta toginga, ene kagn ring i mina beglkwa i narsre, te, muglbonen nare etn, ake moragle dugwa. Yegl dugo, Juda ye taragl i togo, bogl swara pabrika. Bogl swara pabriko, Tamar ye dane paugwa. 19Ana, ye bogl swara pai kodibrika igne, Tamar aglke ede ikne pi, ye kipamara pidre, lap wagle guma dra si kegl dugwa ikra gugl edidre, abu werai kuguglmo gaglmo i aglke kor edugwa.
20Ana okuo Juda ere mogl, kabaglemo Hira, Adulam nem ikra meme nagigle abu i tenagle dugwa ikra ye tedre, Juda taraglmo ama ikne edenabedi dedugo, ogwa. Ogwa ba ye abu i kankrukwa. 21Abu kankrukwa pre ye ere mogl, makan nem yagl tau yegl di prukwa, Okna konbauna abu ta dumo Enaim konbauna bina moglkwa i, ye ede aglo ome? dugwa. Dugo, ye di ikne ede, Konbauna abu magigl i ta moglkrume digwa. 22Yegl digwa pre Hira ede ikne Juda moglmara pidre, yegl dugwa, Na abu i doko eiga ba kankrika. Te, makan nem yagl dumo i meglkwa ama konbauna abu magigl i ta moglkrume dimiwe di, Hira yegl dugwa. 23Yegl dugo, Juda di ikne ede, Ana kodo dugwa. Abu i na taraglnana ake morabuka. Nono meme nagigle ikra na ye di temere tenabugledi erubuglka ba abu i moglkrukwa. Nono ede ikne pi, dokubugl, yoba nono gauglno eribi, agai gorabugle dugwa.
24Ana ba suota ede ogo, yoba tau ede Juda moglmara udre, ye yegl di teigwa, Ene ebian Tamar we, ye konbauna abu erimere yegl ersre, dane pamiwe digwa. Yegl digo, Juda dem boglko, yegl dugwa, Ene abu i yuio! Yuibi, nono ye si gagl tege eun, gorabiwe dugwa. 25Dugo, yoba tau ede pi Tamar yunamnedi eigo, Tamar ere mogl, Juda taraglmo ikra yoba i tedre, ye yegl di togwa, Ene taragl i, i pi yuana yagl obuno di tedre, ka yegl dio! dugwa. Tamar we, dane paugwa i, yoba ta taragl i kan nogwa, yoba i bogl pabriko, dane paugwa. Yegl pre ene ring kan paduglkwa i ya muglbo i kan pogl sin, taragl i nem bogl pabriko, dane pame di pratniwe di, yegl dio! dugwa. 26Dugo, yoba i yegl eriko, Juda yene taraglmomo yogwa kanugwa. Kandre, yegl dugwa, Ye mabuno kide boglkrukwa. Na ye i pi wana Sela tekrika pre nana mabuno kide boluwe dugwa. Didre, ye okuo Tamar bogl, bogl swara paikribrika.
27Ana Tamar ere mogl, gak kuglkwa igne, ye yagl gak pikagl suo kuglkwa. 28Ye emnai kuragledi eruko, yagl gak swara ta ogo i meda edugwa. I meda edugo, abu ta Tamar ake ple dugwa i kan kebra gogl ta idre, ogo wagle toguma sidre, gak i komono moglme dugwa. 29Yegl dugwa ba yagl gak i aglke kor ogo ake ikne edugo, ye agigle ta ede meda ugwa. Ede meda ugo, abu ikra Aya! dugwa. Ene siragl mere etne? Yoba kobuglo togl si buko didre, ede meda wimere mere yegl ede meda uniwe di, yegl dugwa. Yegl pre yoba yagl gak i kagie Peres#38.29 Ka Hibru mina, kagie Peres i, mabuno paugwa, si buko di, ede meda ugwa mere yegl paugwa. we digwa. 30Peres ede meda ugo, okuo ye agigle ikra, abu kan gogl ta idre, ogo wagle toguma sugwa i ede meda ugwa. Yagl gak i, kagie Sera#38.30 Ka Hibru mina, kagie Sera i, mabuno paugwa, gogl. we digwa.
Currently Selected:
Oknayene Ibo 38: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
