Oknayene Ibo 39
39
Potifar Josep nigl kogona morabedi sopo sugwa
1Ana Ismael yoba ikra ye Josep i pi kantri Isip suna pidre, nigl kogon yoba morabedi topo bogl neigo, Isip nem ta kagie Potifar we digwa ikra ye topo sugwa. Yagl Potifar i, ye Isip king yobamo kade ta moglkwa. Ye soldia tau king yugumo sugl kan meglkwa i, bitno mogl, ye sugl moglkwa. 2Isip nem i ye Josep topo sugo, Josep ye sugl moglkwa yagl kipamara moglsre, nigl kogonmo ere togwa. Nigl kogonmo ere togwa i, Yawe ye moglmara mogl, ye ake ple di togwa pre ye kogon erukwa i, u wakai keme ogwa. 3Kogon erukwa i, u wakai ogo, ye sugl moglkwa yagl ikra kanugwa. Kandre, yegl prukwa, Yawe Josep moglmara mogl, ake ple di tedre, kogon siragl mere erukwa i, u wakai enabedi erumiwe di prukwa. 4Yegl prisre, Josep ye nigl kogon wakai ere tomara i pre Josep wakai kandre, nigl kogonmo yoba mudu ya taraglmo mudu Josep swara sugl morabedi edugwa. 5Edugwa igne, Josep Potifar taraglmo ya kogonmo mudu sugl moglkwa pre Yawe ye Potifar kogonmo mudu u wakai enabedi ere edugwa. Ye nigl kogonmo yoba kogonmo yugugl erikwa ya te, kaya mokna ere yaiglkwa mudu u wakai ogwa. 6Yegl pre ye taraglmo mudu Josep sugl morabedi edidre, pre yubun dekre, kanige erukwa. Josep kogon wakai erukwa pre Potifar ye siragl kaya mokna nenabuka i keme pre moglkwa.
Te, Josep we, ye guma dra wakai koglsre, ogo nagie wakai koglsre, erukwa. 7Eruko, Potifar ebie ere mogl, Josep wakai kandre, Nono bogl swara panabugle dugwa. 8Yegl dugwa ba Josep ere mogl, mane didre, ka ta ama yegl dugwa, Na sugl moglkwa yagl i, taraglmo mudu na sugl moraglka pre narukwa. Narsre, ye yugumo wagle kogon siragl mere paugwa i, pre yubun dekre, kanige erukwa. 9Te, na ye nigl kogonmo yoba mudu bitno mere yegl edugo, na ye mudu sugl moglka. Sugl moglko, ene win ere mogl, taragl pra pra narukwa keme yogwa. Ene swara ye ebie motnga pre ene ta narekrukwa. Yegl pre na ene kunogl nenaglo? Yegl ta erekraglka. Mabuno i, mabuno kide kaima, God mane dumara pamiwe di, yegl dugwa. 10Yegl dugo, abu i ege ege Josep kina sidre, Bogl swara panabugle dugwa. Yegl dugwa ba Josep ye kamo i prikre, ye moglmara ama magigl pikrukwa.
11Ana aglke ta Josep ere mogl, kogon eragledi ede Potifar yugumo yugugl ogwa. Yugugl ogo, nigl kogon yoba tau ama yugugl moglkrikwa. 12Yugugl moglkriko, Potifar ebie ere mogl, Josep moglmara u, ye gaglmo suna ake gi didre, Nono bogl swara pabuglo! dugwa. Dugo, Josep ye gaglmo suna i gugl kide kodidre, teke ede meda ogo, abu i ye gaglmo suna ake moglkwa.
13Ana Josep gaglmo suna gugl kide kodidre, teke ede meda ogo, abu i kandre, 14-15ye nigl kogonmo yagl agle dugo, wigwa. Wigo, ye yegl di togwa, Na gagl suna ake moglka i kanio! Na wina Hibru yagl ta nigl kogon yoba morabedi yugwa i, na wina ye mabuno kide ere norabuka pre yugwa pamiwa. Ye na moglmara u, na gudinagledi erukwa ba na grigle diga. Na grigle diga pre ye gaglmo suna erme ake moglka i, gugl kide kodidre, teke ede meda omiwe di, yegl dugwa.
16Ana Potifar ebie ka yegl didre, ye Josep gaglmo suna ikra ye wie okuo ede ikne kipamara u kanabedi magigl yogwa. 17Yogo, ye wie okuo ede ikne ugo, ye ere mogl, yegl di togwa, Ene Hibru yagl ta nigl kogon erabedi yunga ikra erme na moglmara u mabuno kide ere naragledi erukwa. 18Yegl erukwa ba na grigle diga. Grigle digo, ye gaglmo suna magigl i gugl kide kodidre, teke ede meda omiwe di, yegl dugwa.
19Ana Potifar ebie ye Potifar di te, Ene nigl kogon yagl yunga i yegl erume dugo, Potifar kamo i prisre, dem podo boglkwa. 20Dem podo boglko, ye Josep si ake, i pi kane yugu, king yoba si kane sumara dumo edugwa. Edugo, Josep kane yugu moglkwa. 21Josep kane yugu moglkwa ba Yawe ye Josep moglmara mogl, ye ake ple di tedre, ye ere wakai ere togwa. Yegl ersre, ye ama yagl ta kane yugu sugl moglkwa i, ye Josep wakai kanabedi ere edugwa. 22Ere edugo, yagl i ere mogl, Josep kane yoba mudu ya kogon siragl mere kane yugu ta paugwa i, ye sugl morabedi edugwa. 23Edugo, Yawe ye Josep moglmara mogl, kogon siragl mere erukwa i, mudu u wakai enabedi ye ake ple di togwa. Yegl pre yagl ta kane yugu sugl moglkwa i, kogon tau Josep togwa i, okuo pre yubun dekre, kanige erukwa.
Currently Selected:
Oknayene Ibo 39: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
