Ibru 4
4
God yobama wakan moglsre, wakai moraiglkwa paugwa
1Ana God okna promis ta dugwa i, Na yobanama i, wakan moraiglmiwe dugwa ikra pai moglkwa. Pai moglkwa pre ene meglmara suna i, yoba swara ta yage sidre, wakan ta moglkrabuka i, kide panabuka. Yegl pre taragl yegl mere plau di dinabedi nono kudugl goramga paugwa.
2Ana ene prio. Israel yoba okna meglkwa i, nono God kamo wakai yogwa i prumnere mere ye ama ka wakai prikwa. Ye ka wakai prikwa ba ye pre mediglkrikwa pre ka i ye ta ake ple di tekrukwa. 3Ba nono erme God kamo pre medunga munga i wakan moramnara ede suna enamga kuno erukwa. Ana yoba wakan moraiglmara ede suna enaiglmo mo pikraiglkwa i pre God okna yegl dugwa,
Na dena kubrisre, ka gigledi yegl di padiliwa,
Yoba i, ye wakan moraiglmedi na ere wakai ere yei temara i, kaima ta ede suna pikraiglme die#4.3 Giglage 95.11
dugwa. Moses egemo ikra mina God ka yegl dugwa ba okna ibo God dumo makan ere yei kodugwa igne, ye kogonmo dudugo, wakan mogl kodugo, prumga. 4God kamo suna i, bage swara ta de namba 7 pre yegl dugwa, Ege namba 7 we, God kogon ere kodugwa pre wakan moglmiwe#4.4 Oknayene Ibo 2.2 dugwa. 5Ba ka bage ta nono erme prumga i yegl dugwa, Yoba i, ye wakan moraiglkwa pre na ere wakai ere yei temara i, kaima ta ede suna pikraiglmiwe#4.5 Giglage 95.1 dugwa.
6Ana yoba tau wakan moraiglkwa kuno erukwa ba Israel yoba okna meglkwa i, ye God kamo wakai yogwa i digo, pre mediglkrikwa pre ede suna pikrikwa. 7Ana bugla yugu mere kide ede ogo, God ere mogl, aglke kor dagl yoba wakan moraiglmedi ege ta paduglkwa. Ye Devit dra idre, kamo mina yegl boglkwa,
Erme, na ka diga i ta pribi,
Ene nomano gigle dinabedi erekrio#4.7 Giglage 95.7-8
dugwa
God Devit dra idre, wakan moramga pre ege ta paduglkwa i, ege erme yomiwe dugwa.
8Te, Josua ye Israel yoba auro i pi dumo Kenan suna edugwa igne, ye wakan moraiglmedi tekrukwa. Ye kaima wakan moraiglmedi toma, God aglke kor ege ta yoba wakan moraiglmiwe dugwa i, ta dikruko. 9Yegl pre nono pre pogl sinamga, God yobama wakan kade moramga i, yoko pai moglmedi pramga.
10Ana God yoba ta wakan moraiglmedi togwa i, ye kogono ere kodidre, wakan meglkwa. God yene okna ibo kogon ere kodidre, wakan moglmere yegl, wakan meglkwa. 11Yegl pre nono wakan moramnara ede suna enamnedi kogon podo eramga paugwa. Israel yoba ye God kamo pre mediglkrikwa pre wakan moraiglmara ede suna pikrimere mere yegl, nono ama yegl yage si dinamnedi eramga paugwa.
12Ana God kamo yogwa i, kor moglsre, kogon yobuglo ere moglkwa. Te, bainet ta dra aket aket nogwa i, podo nogwa ba God kamo bainet i egre tedre, nogwa. Ana yoba bugla togidre, dem muduo i nogugl edimere mere yegl, God kamo i, nono nomano, kwiano ya, deno muduno siragl mere paugwa i, togo i nogugl edugwa. Nono nomano mina siragl mere prumga ya kide wakai deno muduno mina prumga i, ere i nogugl edugwa. 13Te, God taragl kane kane ere yogwa i, mudu ye gumuglo mina nogugl paigo, kanugwa. Taragl swara ta God gumuglo mina teke paikrukwa. Te, God i gumuglo mina, nono adigl mogl, siragl mere mogl pai erumga i, di poramga paugwa.
Tawa teigwa yoba mogl wimara i, Jisas ede okna pi, bitno moglkwa
14Ana ene prio! Tawa teigwa yoba bitno ta moglmere yegl, nono tawano togwa yoba ta ama nono bitno moglkwa. Tawano togwa yoba ta nono bitno moglkwa i, Jisas, ye God Wam moglkwa i pre diga. Jisas ye ede kamun mitna pidre, ede heven ibo ogwa pre ye pre medunga i, ake gi di moramga paugwa. 15I siragl pre nono tawano togwa yoba bitno moglkwa i, nono konbo kane kane mina yage sumnara i, ye pre kan ersre, nono mitno podo kaima goglkwa. Satan konbo kane kane mina nono kinano sumere mere yegl, ye okna kuno yegl mere Jisas kina sugwa ba Jisas tadaglme ta erekrukwa. Yegl pre Jisas nono siragl mere nomane sumga i, pre kan ere kodidre, nono mitno podo goglkwa.
16Yegl pre nono kudugl goglkre, God ye sia kingmo mina moglmara ede magigl enamga paugwa. God ye sia kingmo mina moglsre, yoko kaima ere wakai ere noragledi prukwa. Yegl pre nono yubuno ta panabuka igne i, God nono mitno goglsre, ake ple di norabedi ye moglmara magigl enamga paugwa.
Currently Selected:
Ibru 4: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission