Ibru 5
5
Jisas nono tawano togwa yagl wakai kaima ta moglkwa
1Ana tawa teigwa yoba bitno moglkwa i, nono kamga. Tawa teigwa yoba tau mere meglmara suna i, God yagl swara ta kogon erabedi dedugwa i, ye yoba pere againo idre, God gumuglo mina ofa tedre, yoba tadaglme erimara tawa tedre, erabedi kogon togwa. 2Ana tawa teigwa yoba bitno ta moglkwa i, ye yoba yoko meglmere kuno yegl moglko, yobuglomo ama paikrukwa pre yoba tau nomano wakai paikrukwa mo konbauna kide kodo, ede eglke eigwa i, ye mogl atne edidre, ka kiede di tenabuka i, kuno erukwa. 3Te, ye ama tadaglme yoba moglkwa pre ye yene tadaglmemo pre tawa tedre, yoba pere tadaglmeno pre ama tedre, erabuka paugwa.
4Yoba kor ta tawa teigwa yoba bitno morabuka i, ye yene kagie kade inagledi yobaglku kogon i ta erekrabuka. Ba God ye okna Aron agle dumere yegl, ye agle dinan keme ye kogon i erabuka.
5Ana kuno yegl mere, Krais yene kagie kade inagledi tawano togwa yoba moglsre, bitno moragledi erekrukwa ba God ye kogon i erabedi dedugwa. God ye Krais pre dugwa i, yegl dugwa,
Ene na Wana motngo,
Na erme ene Nen moluwe#5.5 Giglage 2.7
dugwa. 6Te, ye bage ta ama yegl dugwa,
Yagl Melkisedek ye okna tawa narukwa yoba moglmere yegl,
Ene tawa naratnga yoba aimadi moratniwe#5.6 Giglage 110.4
di, Krais pre yegl dugwa.
7Ana Jisas makandigle wan moglkwa igne, ye God swara na ere inan, na goglkre, kor moraglka pamedi prisre, God kamage ere togwa. Jisas ka podo didre, kai ere, God agle di pruko, Jisas mogl atne edidre, kana duglo boglmedi kan, God ye ake ple di togwa.
8Jisas ye God Wam moglkwa ba ye giugl yubun yumara i, yoba giugl prisre, God kamo duglo beglmere ye ama beke i kodugwa. 9-10Ye kuno ere beke yugwa pre God ye nono tawa teigwa bitno yagle morabedi padiglsre, Ene Melkisedek okna tawa togwa moglmere mere moratne dugwa. Yegl pre yoba ta Jisas duglo beglkwa i, ye tawa teigwa bitno yoba moglsre, aimadi kamin wakai kaima moraiglmedi ake ple di norukwa.
Gak kebra mere yegl mogl, am ne moglkramga paugwa
11Ana, no ka tau mere mem i pre ene di tenamnedi prumga ba ene kinano gi dugwa mere yegl paugwa pre no ene beke tomun, ene pre pogl sinaiglkwa i, waragne panabuka. 12I siragl pre ene okna kana pre medigl, ede suna wigwa pre ene mudu God kamo tisa moraiglkwa kuno erukwa. Ba ene tisa moglkre, gak kuglabu kaya mokna nekre, am keme neigwa i, meglmere yegl meglkwa. Yegl moglsre, God kamo bage tau nogugl kaima paugwa i, yoba ta kor dagl beke tebi, ene praiglkwa mere yegl paugwa.
13Ana yoba ta gak kuglabu mere yegl moglsre, am ne meglkwa i, ye mabuno du siragl mere paugwa i kan yubu sidre, eraiglkwa i, kuno ta erekrukwa. 14Ba yoba ta gak kebra mere moglkre, yoba kade mere yegl meglkwa i, mie gigle dugwa nenaiglkwa kuno erukwa. Ye ege mere mabuno wakai ya mabuno kide kan yubu sigwa pre ye nomano mina pre pogl sigwa.
Currently Selected:
Ibru 5: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission