Ibru 6
6
Yage si dinamnedi eramga paugwa
1-2Ana Krais kamo nogugl kaima paugwa i, nono beke kodumga pre gak kebra mere yegl moglsre, kor bekenamnedi erekre, nono yoba mere yegl moglsre, ka kor kor bekenamga paugwa. Ana ka okna beke kodumga i yegl mere paugwa. God swara pre medramga paugo, mabuno tau duglo bun, kiano ake ple dinabedi prikwa i, kide kodinamga paugo, nigl bugl tenaiglmere paugo, te yoba God kogonmo eraiglmedi ogono yenamga paugo, te yoba geglkwa siragl mere adiglsre, kot kade idre, aimadi kamin doga denaiglkwa pre paugo, erukwa i, beke kodumga pre 3God ake ple di noran, ka kor kor beke pai moramga.
4Yoba tau yage sigwa meglkwa i, nomane yake tenaiglmedi eramga ba kuno ta erekrabuka. I siragl pre yoba i, God nomano mina abuglage si te kodugo, Mudu Murubuglo bogl u swara eigo, God heven ibo mogl, yoko kaima ere wakai ere norukwa i, ye ama pre kan erikwa. 5Te, yoba i, God kamo, wakai yogwa i dogon erumedi pre kodigwa. Te, God yobuglomo okuo ede nogugl unabere mere ye ama pre kan kodigwa. 6Ana yoba yegl ta moglsre, yage si, ede meda ebi, nono ye aglke kor nomano yake tenaiglmedi erumun, kuno ta erekrabuka. I siragl pre ye mabuno erimara i, God Wam aglke kor ede prak mina sidre, ye agai gorabedi erikwa pre nono ye nomano yake tenaiglmedi erumun, kuno ta erekrabuka.
7Ana yoba makan mina kaya mokna ere yaiglko, kamun si, makan kugl tedre, kaya mokna wakai boglkwa igne, kaya mokna yaiglkwa yobamo i kaya mokna si i pi neigo, God dumo makan i ama ere wakai ere togwa. 8Ba ta manan, makan swara i mina kugl kide ya kan kagigle yaglkwa i keme panan, makan i, kogonmo wakai ta paikrabuka. God kuri ta mogl, makan i di kide yei tenabuka paugwa. Te, dumo makan yegl ta yenabuka i, yoba kono ken sibi, denabuka.
9Agrama abarama na dena muduna suna meglkwa i, no ka gigledi ene di tomga i, aglau yegl ene meglmara plau dikrabedi prumga. God ene ere yugwa pre ene mabuno du kane kane ersre, ame wakai dinaiglmedi prumga. 10Ene God we di prisre, ye kogonmo ere, ye wakai kaima kanigwa i, God pre morabuka pre dumga. Ene ye wakai kanigwa pre ye yobama okna ya erme ake ple di teigwa. Ene ake ple di teimara i mina God mabuno du ersre, ye pre morabuka keme paugwa.
11Ana no ene mudu taragl swara ta ka kaima eraiglmedi prumga i, ene God kogonmo erimere yegl, ene gigledi ere moraiglmedi prumga. God ene taragl wakai wakai tenagle dugwa i, ene kaima inamgra we di prisre, ye kogonmo ere mogl pi geglbi, i wakai panabuka. 12Ene oglka ere dinaiglmedi prumga. Yoba okna God pre medigl moglsre, oglka erekre, adigl gigledi mogl eimere yegl ene ama yegl eraiglmedi prumga. Ye adigl gigledi mogl eigwa i pre God ye taragl wakai wakai tenagledi ka promis dugwa i, ye kaima igwa.
God ere wakai ere norabedi pre gi dinamga paugwa
13-14Ana Abraham okna ibo moglkwa i, ene prio. God ye promis di te padiglsre, yegl dugwa, Na ka kaima ene ere wakai ere tedre, ene gawanma mere kide moraiglmedi ere edenagle dugwa. God okna yegl dugwa i, yoba ta ye moglmara mogl mitna edenan, Na yoba i kagie mina promis diwe dinabuka i, ta moglkrukwa pre God dugwa i, Nana kagna mina ka gigledi ene di te padiluwe#6.13-14 Oknayene Ibo 22.16-17 dugwa. 15Ana God ka promis dugwa i, Abraham oglka erekre, sugl mogl ogo, ogo, okuo kaima God dumere plau dugwa.
16Ana yoba ka gigledi ta di te padiglkwa igne, ye yoba ta mogl mitna edigwa i kagno mina digwa. Ka gigledi yegl digo, yoba okuo ka i pre nonga dikrikwa. I siragl pre ye ka gigledi di padigl kodigwa. 17Ana God ye Abraham ka kaima ta di tedre, yoba okuo ere wakai ere tenaluwe dugwa i, nono erme munga i, ka i kaima plau dinabedi praiglmedi pre ye ka gigledi di te paduglkwa. Nono yoba ta taragl wakai wakai ye ka gigledi di te paduglmara i ta inamga munga i, yegl pramga, God ka dugwa i, u ta pikrabuka pamedi pramga. 18Ana God Abraham ka di togwa igne, ye ka suo mere dugwa. Ye ka kaima ta didre, ka gigledi ama di te paduglkwa. Ye ka suo dumara i, ka kibi ta dinan, kuno erekrabuka. Kuno erekrabuka pre nono teke ede God moglmara omga i, ye promismo ake gi di moraiglmedi deno muduno si gigle di norukwa.
19-20Ana God nono ere wakai ere noragle dugwa ka i, nono ye kaima erabukra we di prumga pre ka i nono si gigle di norukwa. Sip pai morabedi anka pia si nigle edigo, sip dumo swara ta pai moglmere yegl, God nono ere norabra we di prumgo, nono si gigle di norukwa. Te, Jisas, okuo nono ye ere wakai ere norabedi pre gi dumga yagle moglkwa i, ye ede okna heven ibo pidre, ake ple di noro moglkwa. Tawa teigwa yoba bitno yagl God yugumo suna, lap kogl kegl dimara ede aket pidre, dumo mawagl podo pamara omere mere yegl, ye ede heven suna pidre, ake ple di noro moglkwa. Jisas ye yagl Melkisedek okna tawa togwa yagl moglmere yegl, nono tawano togwa bitno yagl aimadi kamin morabuka.
Currently Selected:
Ibru 6: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission