Ibru 7
7
Yagl Melkisedek okna moglkwa i, Jisas tawano togwa yagle okuo morabuka i, piksa mere yegl i nogugl edugwa
1Ana yagl Melkisedek ikra pre ka tau dinaglka. Ye okna ibo dumo Salem we dimara i, ye kingno moglsre, te God mogl mitna kaima edugwa i, tawa togwa yagle ama moglkwa. Abraham ege swara ta king tau kuda bogl te kodidre, ede ikne ugo, ye Melkisedek bogl tegigl yebriko, Melkisedek ye Abraham mogl pai erabara u wakai enabedi God kagie mina di wakai yei togwa. 2Di wakai yei togo, Abraham bona gana mudu kuda mina yugwa i, yubu si bage 10-pela edidre, bage swara ta Melkisedek togwa. Ana yagl i kagie Melkisedek mem paugwa i, king ta mabuno du erukwa mere yegl paugwa. Te, dumo Salem kagie mem paugwa i, deno muduno wida dugwa mere yegl paugwa. Yegl pre Melkisedek king ta dem muduo wida dugwa mere yegl moglkwa.
3Ana God kamo bage ta Melkisedek pre dugwa i, ye nem mo mam mo kowamo awamo ira meglkwa i pre ka swara ta dikrukwa. Te, ye mam aunake ye kuglkwa mo ye aunake goglkwa pre ama dikrukwa. Yegl pre ka ebrie ta dinaglka i, Melkisedek ye God Wam mere yegl moglsre, tawa togwa yagle aimadi kamin moglkwa mere yegl paugwa.
4Ana Melkisedek siragl mere yagl kade moglkwa i, ene prio. Nono kowano awano Abraham i, ye yoba kade ta moglkwa ba ye bona gana tau yugwa i, br 10-pela boglsre, swara ta Melkisedek tomara i mina nono kanamga, Melkisedek ye Abraham moglmara mogl mitna ede togwa pamedi kanamga.
5Ana God lomo dugwa i, Israel yoba, ye mudu Abraham gawama meglkwa i, taragl ta ere nenaiglkwa i, br 10-pela boglsre, br swara ta ye agroma, Livai yoba tawa teigwa yoba meglkwa i, tenaiglmiwe dugwa. Yegl pre Israel yoba meglmara i, Livai yoba tau mogl mitna edigwa mere yegl paugwa. 6-7Ana Melkisedek moglkwa i, Livai yoba ta moglkre, yugobuno pere ta moglkwa ba Abraham ere mogl, ye br swara ta togwa paugwa. Tomara i mina Melkisedek ye Abraham moglmara mogl mitna ede tomedi pramga. Prio. Abraham God promismo mudu i kodugwa ba Melkisedek aglke kor Abraham di wakai yei te, ta i tebe edugwa i, Melkisedek yagl kade kaima ta moglkwa pai dugwa. I siragl pre nono mudu pre pogl sumga i, yoba kade keme yoba yoko kamageno ersre, di wakai yei tenaiglkwa.
8Ana Livai yoba Israel yoba taraglno ya migeno ikne ta igwa i, ye bugla yugu tau nedre, geglkwa. Ba Melkisedek, ye Abraham taraglmo tau yugwa i, God kamo ye goglmiwe ta dikrukwa pre ye kor mogl pai moglkwa mere yegl paugwa.
9Te, Livai yoba ye Israel taraglno mina br swara ta igwa i, ye kowano Livai ama Abraham erumara i mina Melkisedek br ta togwa mere yegl paugwa. 10Yagl Livai Abraham yugobunomo mina okuo unabuka pre Livai moglkrukwa igne, ye kowamo Abraham ere mogl, Melkisedek br ta tomara i, i swara ede togwa mere yegl paugwa.
Jisas tawano togwa yagle i, ye tawa teigwa yoba okna meglkwa i, mudu egre togwa
11Ana Livai yoba ye tawa teigwa yoba mogl, kogon eriko, God lomo gigledi paugwa ba ye kogon erimara i mina yoba u wakai kaima enaiglkwa i, kuno eruma, God ye tawa togwa yoba kor ta unabe dugwa i ta dikruko. Ba God tawa togwa yagl kor ta unabe dugwa i, Aron gawama meglmara suna i ta unabe dikrukwa. Yagl Melkisedek okna moglmere yegl mere, tawa togwa yagl kor ta unabiwe dugwa.
12Ana tawa togwa yagl kor ta ugwa pre nono ama pramga i, lo okna paugwa i dudugo, ka kor ta ugwa pamedi pramga. 13-14I siragl pre nono prumga i, nono Yaglno Kade Jisas ye yagl Juda we digwa i gawamo ta moglkwa ba Moses lo boglkwa igne, ye Juda yoba tawa teigwa yoba moraiglme dikrukwa. Ye Livai yoba keme tawa teigwa yoba moraiglme dugwa pre Juda yoba okna kogon yegl ta erekrikwa. Ba erme Juda yagl ta nono tawano togwa yagle moglkwa pre lo okna ikra dudugo, ka kor ta ugwa pamedi pramga.
15Ana God lomo ikra dudugo, ka kor ta ume diga i, nogugl kaima paugwa. I siragl pre Melkisedek moglmere mere yegl, tawa togwa yagl kor ta unabe dugwa ikra, u kodugwa. 16Ye tawa togwa yagl moglkwa i, lo dumere yegl, tawa togwa yagl ta moglkrukwa. Lo dugwa i, Livai gawama ta meglkwa i keme tawa teigwa yoba moraiglme dugwa. Ba Jisas tawa togwa yagl moglkwa i, ye yobuglomo podo paugo, aimadi kamin kor morabuka moglkwa pre ye u tawa togwa yagl ogwa. 17God kamo Jisas pre dugwa i, yegl dugwa,
Yagl Melkisedek ye okna tawa narukwa yoba moglmere yegl,
Ene tawa natnga yoba aimadi moratne#7.17 Giglage 110.4
dugwa.
18-19Ana God lomo okna paugwa i, yoba u wakai enaiglmedi ake ple di norabuka i, yobuglomo paikrukwa pre God ye lomo i, i eglke edidre, taragl kor inaiglmedi padigl norukwa. Taragl kor i, lo egre atne edugwa, te taragl kor i mina God moglmara mogl magigl edumnedi prumga.
20Te, Jisas ye u tawano togwa yagle moglkwa i, ye kogon i yoko ta ikrukwa ba God ka gigledi ta di paduglmara i mina kogon i yugwa. Livai yoba okna tawa teigwa yoba meglkwa i, God ka gigledi ta di paduglmara i mina kogon i ta ikrikwa 21ba God ye Jisas pre yegl dugwa,
Na Yagl Kade moglka i, ka gigledi di padiglsre, nomane kor ta ikraglka.
Ene tawa natnga yoba aimadi moratniwe#7.21 Giglage 110.4
dugwa.
22God ka yegl di paduglkwa pre nono pre pogl sinamga i, Jisas adigl gigledi mogl, ka kor ta yudre, di norukwa i, God lomo, ye okna di paduglkwa i, egre atne edumedi pramga.
23Ana okna tawa teigwa yoba mere kide meglkwa. I siragl pre yoba swara ta tawa togwa yoba aimadi morabuka i, kuno ta erekrukwa. Ye mudu bugla yugu tau moglsre, geglko, yoba pere u ye againo igwa. 24Ba Jisas ye tawano togwa yagl moglkwa i, ye aimadi kamin kor morabuka pre yoba ta u ye agaimo ta ikraiglkwa. 25Te, ye aimadi kamin nono tawano togwa yagle morabuka pre yoba ye mina ede God moglmara enaiglkwa i, ye ege swara ere inan, aimadi kamin wakai kaima moraiglkwa i, kuno erukwa. I siragl pre ye aimadi kamin kor moglsre, God yoba i ake ple di tenabedi kamage ere moglkwa.
26Ana tawa teigwa bitno yoba wakai kaima ta moran, ake ple di norabuka kuno erabuka. Jisas yegl mere moglsre, ye dem muduo pe sugo, aglau swara ta erekrukwa. Te, ye mabuno deglbi yogwa i ta erekrukwa. God ye i pere edidre, heven ibo morabedi edugo, ye tadaglme yoba meglmara suna moglkrukwa.
27Tawa teigwa yoba okna meglkwa i, ye ege ege tawa tenaiglkwa paugwa. Komno kana ye yene tadaglmeno pre tawa tedre, okuo yoba pere tadaglmeno pre tawa teigwa ba Jisas yegl ta erabuka i ta paikrukwa. Ye yene ege swara ta i pi God togwa i, ye tawa te kodugwa.
28Ana God lomo yoba tau tawa teigwa yoba bitno moraiglme dugwa i, yoba yoko, ye yobuglno ta paikrukwa i kogon yegl eraiglkwa pre dugwa. Ba lo ugo, mokomugl i, God promis kor ta ere, tawa togwa bitno yoba kor ta unabiwe dugwa i, God yene Wam pre dugwa. God Wam u wakai kaima pidre, ye swara nono ake ple di norabuka. Noran, aimadi kamin yegl morabuka.
Currently Selected:
Ibru 7: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission