Ibru 8
8
Jisas nono tawano togwa yagle moglsre, heven ibo moglkwa
1Ka yegl dumga i, mem kade ta paugwa pre dumga. Mem i, yegl paugwa, Jisas nono tawano togwa yagl kade moglkwa. Ye heven ibo pidre, God Mogl Mitna Kaima edugwa i, ogo wo kra ame di moglkwa. 2Te, ye erme sel yugu ta God yugumo kaima yomara dumo mawagl pamara i, yugugl kra God kogonmo ere moglkwa. Sel yugu kaima i, yoba ta keikrikwa ba Yagl Kade yene kegwa.
3Ana tawa teigwa bitno yoba meglkwa i, ye ofa ya tawa tenaiglkwa i kogono paugwa. Ama Jisas nono tawano togwa yagl kade moglkwa pre ye tawa ta tenabuka paugwa.
4Te, Jisas makandigle mogl pai moglma, ye tawa togwa yagl ta moglkruko. I siragl pre makandigle yoba lo dumere mere tawa te meglkwa i, ye mogl kodigwa. 5Ba ye kogon erimara yugu i, God yugumo kaima heven ibo yogwa i, piksamo mere yegl keme yogwa. Ana God yugumo makandigle yogwa i, piksa yogwa pre Moses sel yugu i kenagledi erukwa igne, God ye ka gigle di tedre, yegl di togwa, Ene sel yugu ta kedre, taragl kane kane ta bekenatnga i, na ene muglo ibo motnga igne obuno di teimere yegl keme kedre, bekidre, eragledi kan kun ero#8.5 Isip Kide Kodigwa 25.40 dugwa.
God promis kor di paduglkwa i, pai mitna ede, promis okna di te paduglkwa i, egrukwa
6Ana God heven ibo Jisas kogon ta togo, ere moglkwa i, kogon podo padre, tawa teigwa yoba makandigle kogon erikwa i, egre atne edugwa. I siragl pre promis kor ta God nono di padigl norumara i, Jisas ye God moglmara ya yoba munara suna moglsre, ake ple di noro moglkwa. Ana God promis kor erme di padigl norukwa i, kamo wakai kaima paugwa pre i win sidre, ka okna ibo di paduglkwa togwa.
7Ana ene prio. God ka okna di te paduglkwa i wakai kaima pama, God ye ka kor ta di te padragle dugwa i ta dikruko. 8Ba nono kowano awanoma ye God lomo si biglke digwa i, God kide kandre, ye kamo mina yegl dugwa,
Yagl Kade dugwa i, yegl dugwa. Ene kanio.
Israel yoba ya Juda yoba meglmara i,
okuo na ka kor ta di te padraglka.
9Ka kor i, na okna ta ye kowano awanoma di te padiglmere yegl ta paikrabiwa.
I siragl pre ye kowano awanoma dumo Isip mogl dinaiglmedi ogono akidre, auro i ede eiga igne i
na ye ka ta di te padiglka ba na di te padiglmere yegl, ye duglo boglkrikwa pre na ye mokona teiwe#8.9 Jeremaia 31.31-32
di, Yagl Kade yegl dugwa.
10Yagl Kade ka yegl didre, ama yegl dugwa,
Na okuo Israel yoba promis kor ta di te padraglka i, yegl mere panabuka, Na lona ye nomano ya deno muduno mina suna padragliwa. Te, na ye Godno moglbo, ye na yobanama moraiglmiwa. 11Te, igne i yoba tau ye kabagleno ya agroma ka di te, Ene Yagl Kade pre kan erio! di, yegl ta dikraiglkwa. I siragl pre yoba kade ya yoba yoko i pra, mudu na ira moglka i, pre kan ere kodinaiglkwa pre ka yegl ta dikraiglmiwa. 12I siragl pre na ye mitno goglsre, mabunono kide ya tadaglmeno pre moglkraluwe#8.12 Jeremaia 31.33-34
di, Yagl Kade yegl dugwa.
13Ana God ye ka kor ta di te padragle dugwa igne, ye ka okna di te paduglkwa i, u goglo enabuka mere yegl i nogugl edugwa. Ana taragl ta u goglo ogwa i, imim darabuka i, magigl erukwa.
Currently Selected:
Ibru 8: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission