Ibru 9
9
Tawa teigwa yoba sipsip ya ki si goglsre, tawa teigwa
1Ana God ye ka okna di te paduglkwa igne, yoba ye kogonmo siragl mere eraiglkwa i pre ye didre, ye yugumo makandigle yenabuka i pre ama dugwa. 2Yugu i, sel yugu ta yogwa. Te, sel yugu i, lap suna koglsre, ere i bage suo edigwa. Bage ta nogugl yogwa i, dumo mawagl pamara we digwa. Dumo i mina ken lam yogo, bogl ta ama yogwa. Bogl i mina ye bret tau God gumuglo mina yeigwa yogwa. 3Te, lap kogl kegl dimara aket kra i, dumo mawagl podo pamara we digwa. 4Dumo i pre bogl kebra ta gol mina bekigwa i yogo, ye bogl i mina ede nuglo demene wakai erukwa i gaiglkwa. Te, dumo i mina God ka di te paduglkwa boksmo ikra yogwa. Boks i, ye gol koglo koglo si dage padiglsre, taragl suota atne yeigwa. Taragl swara ta atne yeigwa i, sin ta gol mina bekigo, taragl mana we digwa ikra tau sin i mina atne yogwa. Te, taragl ta atne yeigwa i, Aaron muglbomo kie sugwa i yeigwa. Te, taragl ta, kobuglo paglkane suo, God ye ka di te paduglkwa i, kobuglo i mina boglkwa ikra, atne yeigwa yogwa. 5Te, boks pre, God yoba tadaglmeno si bi dinagle dumara tebe i, God yene moragle dugwa. God yene moragle dumara i, yoba angelo gigledi suo ta miurka i kiano koglo koglo beke padiglsre, ye koyeno boks pre mina ake pigla di miurka mere yegl beke padiglkwa. Ana taragl swara swarade sel yugu mina atne yogwa i pre mudu ta erme dinaglka i, kuno ta erekrabuka.
6Ana sel yugu yegl mere kei padigl kodigo, tawa teigwa yoba ege ege ede pi lap kogl kegl dimara nogugl ikra pidre, God kogonmo ere meglkwa. 7Ba lap kogl kegl dimara aket kra, dumo mawagl podo pamara ikra, bugla yugu swara swarade, ege swara keme tawa teigwa yoba bitno moglkwa i, ede yugugl ogwa. Te, ye ede yugugl ogwa i, yoko ta pikrukwa ba ye bormai kogl idre, ede ogwa. Bormai i, ye yene tadaglmemo pre God tedre, Israel yoba tadaglme ta pre kan erekrisre, erikwa i pre ama togwa.
8Ana tawa teigwa yoba kogon ere pai meglmara mina Mudu Murubuglo taragl ta obuno dugwa. Ye obuno dugwa i, tawa teigwa yugu kogonmo dudukrukwa pre yoba yoko ede dumo mawagl podo pamara ikra enaiglkwa kuno erekrumedi obuno dugwa. 9Te, erme obuno dumara i mina yoba nomane inaiglkwa. Tawa ya ofa kane kane teimara i mina ta ake ple di norokrumedi i nogugl edugo, erme tadaglmeno pai moglmedi praiglkwa. 10Ye deno muduno mina tadaglmeno pai moglmedi praiglkwa i, siragl pre God lomo okna dugwa i, taragl meda yogwa i keme pre dugwa. Yoba kaya mokna siragl mere nenaiglkwa ya nigl siragl mere nenaiglkwa ya yoba nigl panaiglkwa ya taragl yegl mere pre dugwa. Taragl i ogono nagino keme pre dugwa God togwa ba ege ta unan, God ere i kor ede, i kuno ede tenabuka.
Krais yene bormaimo suru edugwa
11Ana Krais ugwa igne, ye tawano togwa yagle moglsre, taragl wakai wakai okuo unabuka i, noragle dugwa. Ye tawano togwa yagle moglsre, yoba ogono mina sel yugu ta makandigle kei yeimara i, ede yugugl pikrukwa. Ye sel yugu wakai kaima ta heven ibo yomara i, ede yugugl ogwa. 12Te, ye ede yugugl ogwa igne, meme ya kau nagigle ya ki ta bormaino idre, ede yugugl pikrukwa ba ye yene bormaimo mina ede dumo mawagl podo pamara pidre, nono aimadi kamin kor moraiglmedi topo sugwa. Te, ye ege mere ede yugugl pikrukwa ba ege swara kaima ta omara i, nono topo si kodugwa.
13Ana God gumuglo mina yoba ta deglbi yeigwa igne, tawa teigwa yoba ere mogl, meme bormaino idre, kau kumugl bormaino idre, kau abai ta si gagl tege erikwa i, nir idre, yoba i mina si plai sigo, ye ogono nagino meda i, u wakai eigwa. 14Ba Krais bormaimo i, taragl yegl mere mudu egre atne edidre, nagino swara ere wakai erekrukwa. Bormaimo nono lo duglo boglsre, gogl dinaiglmedi ere wakai ersre, te God kor aimadi moglkwa kogonmo ere pai moraiglmedi ere wakai ere norukwa. Krais aglaumo swara ta paikruko, Mudu Murubuglo aimadi moglkwa i yobuglo tomara mina ye yene i pi God tawa togwa.
15Ana nono God bogl u swara pi, akie si dakagl moramga i pre Jisas suna wom adigl mogl, ka kor aimadi panabedi bo buko dugwa. Okna i, yoba tadaglme ersre, lo komono paugwa i, si biglki digo, Jisas goglsre, kumapno togwa. Yegl pre God di gaglkwa yoba okuo taragl wakai wakai ye inaiglmedi di paduglkwa i, inaiglkwa kuno kaima erukwa.
16-17Ana yoba ta ere mogl, Na goglbo, gagrama na taraglna yegl yegl inaiglmedi prabuka i, ye ka gigledi di padiglsre, pepa mina bogl atne edenabuka. Ba ye goran, ye pepa boglmere yegl inaiglkwa. Ye kor moran, ye ka boglkwa i, yobuglomo ta paikrabuka.
18Ana God promis komono di te paduglkwa i, ama yoko ta paikrukwa ba bormai suru edigo, gigledi paugwa. 19God lomo dumere yegl, Moses ye lo mudu Israel yoba kere te kodugwa igne, ye kau nagro bormaino tau idre, meme bormaino tau idre, nigl kor bogl toide i swara edidre, ede ta hisop we digwa i yogagle tau idre, kan gogl mina toguma si, bormai ya nigl mina i atne edidre, buk kerukwa i ya yoba meglkwa i mina si plai si edugwa. 20Si plai si edidre, yoba i yegl di togwa, Ene ya God bogl ikne ikne kamo duglo boraiglme dugwa i, promis i bormai i mina si gigle dumiwe#9.20 Isip Kide Kodigwa 24.8 dugwa. 21Te, sel yugu ya taragl mudu ta yugugl yogo, yoba idre, God kogonmo eraiglkwa i, Moses kuno yegl mere bormai taragl i mina si plai sugwa.
22Ana God lomo dumere kuno yegl taragl tau mudu bormai keme ere i wakai edugwa mere yegl pamedi kamga. Te, bormai suru edigo keme God ye tadaglmeno kide kodo togwa.
23Ana bormai mina u wakai enabuka pre sel yugu makandigle yogwa i ya taragl kane kane heven ibo yomere piksano mere yegl yogwa i, kau ya meme bormaino mina u wakai enaiglkwa keme paugwa. Ba taragl heven ibo yeigwa i, tawa wakai kaima ta mina u wakai enaiglkwa keme paugwa.
24Ana sel yugu yoba ogono mina keigwa i, God yugumo kaima ta yekrukwa ba God yugumo kaima yogwa i, piksamo mere yegl yogwa. Krais ye sel yugu makandigle yogwa i mina ede yugugl pikrukwa ba ede heven kaima ibo pidre, erme God gumuglo mina nono kano di moglkwa. 25Ana tawa teigwa yoba bitno moglkwa i, ye bugla yugu swara swarade dumo mawagl podo pamara i, yugugl pidre, taragl pere bormaino tomere yegl, Krais ye yene ege mere tenagledi heven ibo pikrukwa. 26Krais ye yegl ta erabuka pama, God dumo makan ere yogwa igne ede u erme pra, Krais ege mere udre, ege mere goglko. Ba erme, taragl mudu dudunabuka magigl erukwa igne, Krais ege swara kaima udre, tadaglme si dudu kodinagledi ye yene togwa.
27God di paduglkwa i, yoba ege swara keme goglsre, okuo ye kotmo mina adraiglmedi di paduglkwa. 28Kuno yegl mere, Krais ege swara keme yoba mere kide tadaglmeno idre, tawano tenagledi ye yene togwa. Te, ye okuo ege namba 2 unabuka i, yoba tadaglmeno gugl edenagledi pre ukrabuka ba yoba ye unabedi kie ere meglkwa i, ere inan, wakai kaima moraiglkwa i pre unabuka.
Currently Selected:
Ibru 9: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission