Ibru 10
10
Krais tawano ege swara te kodugwa
1Ana taragl wakai okuo unabuka i, God lomo ta manugwa. I piksa keme yogwa. Yegl pre bugla yugu yomere yomere yoba lo dumere ersre, ege swarade pi tawa teigwa ba ye erimara i mina du moglkrikwa. 2Ana yoba ye ege swara tawa teimara i, God ye tadaglmeno gugl ede toma, no tadaglmeno ta pai moglkrumedi prisre, tawa okuo ta tekriko. 3Ba mabuno yegl ta paikrukwa. Ye bugla yugu swara swarade tawa te meglkwa igne, ye tadaglmeno pai moglmedi poglo di prikwa. 4I siragl pre kau ya meme bormaino i, yoba tadaglmeno ta gugl edenan, kuno erekrabuka.
5Yegl pre Krais ede makandigle ugwa igne, ye God yegl di togwa,
Yoba ene ofa ya tawa kane kane teigwa i, ene wakai ta prikitnga pre
Na ogona nagna panabedi prisre,
Ogona nagna ere wakai ere yei natnga.
6Yoba tawa tau mudu gagl tege erikwa i ya
tawa tau ye tadaglmeno pre teigwa i,
Ene kandre, gun yeikitnga.
7Yegl pre God yo, na ene yegl di teiwa,
Kano, yoba ene kanen mina bogl atne edimere yegl,
Ene na ta erabedi pitnere mere yegl,
Na eragledi wiwe#10.7 Giglage 40.6-8
di, Krais yegl dugwa.
8Ana Krais ka yegl dumara i mina ye komono kana dugwa i, Yoba ofa ya tawa kane kane teigwa i, ene wakai kankre, tawa tau mudu gagl tege erikwa i ya, tawa tau tadaglmeno pre teigwa i, ene kandre, gun yeikitniwe dugwa. God lomo dumere mere yoba taragl i teigwa ba God kandre, wakai prikrukwa pre dugwa. 9Ye yegl didre, okuo dugwa i, Kano, ene na ta erabedi pitnere eragledi wiwe dugwa. Krais ka yegl dumara i mina nono pramga i, yoba tawa okna teigwa mabuno i, Krais si dudidre, yene kogon erumara i mina mabuno kor i nogugl edugwa. 10Te, God Jisas Krais ta erabedi prumere mere yegl, ye yene ogo nagie nono tawano pre ege swara kaima te kodugo, nono erme God gumuglo mina yoba du munga.
11 Ana tawa teigwa yoba mudu meglkwa i, ye ege ege kogono ersre, tawa ege mere kaima kuno ere te pai meglkwa. Yegl erikwa ba ye erimara i mina yoba tadaglmeno ta gugl edibi, kuno ta erekrabuka. 12Ba Krais ege swara kaima yoba tadaglmeno pre tawa swara te kodidre, ede heven ibo pi, God ogo wo kra ame di moglkwa. 13Ye God ogo wo kra ame di moglsre, na kudana ikne meglkwa i, God ye mudu yu, kaglna mina atne edenabedi sugl moglkwa. 14I siragl pre ye tawa swara kaima tomara i mina ye yoba ta ere i du edugwa meglkwa i, aimadi kamin wakai kaima moraiglmedi ere ede kodugwa.
15Ana mem swara i pre Mudu Murubuglo okna ka ta di norukwa, 16Yagl Kade yegl dugwa, Na okuo ere mogl, Israel yoba promis kor ta di te padraglka i, yegl mere panabuka, Na lona ye nomano ya deno muduno mina suna padragle#10.16 Jeremaia 31.33 dugwa. 17Ye yegl didre, ama yegl dugwa, Ye mabunono kide ya tadaglmeno pre moglkraluwe#10.17 Jeremaia 31.34 dugwa. 18Ana God yoba ta tadaglmeno gugl ede te kodugwa meglkwa i, ye tadaglmeno pre tawa kor ta tenaiglkwa i ta paikrukwa.
Jisas mina nono ede God moglmara magigl enamga paugwa
19Ana agrama abarama wagle, Jisas bormaimo suru edumara i mina nono kudugl goglkre, ede pi dumo mawagl podo pamara enamga kuno erukwa mere yegl paugwa. 20I siragl pre Jisas yene ogo nagie mina goglmara i, ye nono u kor pidre, lap podo kogl kegl dimara ede aket enaiglmedi, konbauna kor yauro norukwa. 21Te, Jisas erme nono tawano togwa yagle moglsre, God yobama mudu bitno mogl, suglno moglkwa. 22Yegl pre nono deno muduno mina kaima prisre, Jisas ka kaima pre medigl mogl, ede God moglmara magigl enamga paugwa. I siragl pre nono mabunono kide dudumedi praiglmedi Jisas yene bormaimo nono mina si plai sidre, God gumuglo mina nono deglbi yei dinaiglmedi nigl wakai kaima ta mina nono nigl pai norukwa mere yegl paugwa.
23Nono God ka kaima taragl wakai wakai noragle dume dumga i, nono ka i kide kodokre, ake gi di moramga paugwa. I siragl pre God promis ta erabuka i, ye erabuka keme paugwa.
24Te, nono siragl mere agrama abarama wagle wakai kandre, mabuno wakai boramga i, nono wakai ere kinano gudu prisre, ka di pre eramga paugwa.
25Ana pre mediglkwa yoba tau ye yene akie makai sinaiglkwa i, kide kodigwa ba nono mabuno yegl ta erekramga paugwa. Nono akie makai sinamga paugwa. Te, Yaglno Kade ede ikne unabuka magigl erukwa pre nono kogon podo ersre, deno muduno ikne ikne si gigle di tenamga.
Krais kamo kide kodokramga paugwa
26I siragl pre nono Krais kamo kaima paugwa i, pre kan ere kodo, mane di tedre, tadaglme ere pai mun, nono tadaglmeno tawamo tenamga i, swara ta yeikrabuka. 27Yeikran, God no sinabukra we di prisre, kudugl goramga paugwa. Te, God kubrisre, ye kudamo ikne doga mina si garabere mere yegl, nono ama ka tage norabiwe di prisre, kudugl gogl moramga paugwa.
28God lomo okna Moses togwa i, yoba ta ere mogl, ye lomo sedugo, yoba suo mo suota ye mabuno kide erukwa i kandre, u digo, yoba ye mirie goglkre, si geglkwa. 29Yoba God lomo sedigwa i, yubun yegl igwa pre ene siragl we di prime? Yoba ta God Wam moko tedre, ye bormaimo i taragl yoko mere yegl yomedi pran, ye yubun kebra dagl ta inabo mo yubun podo inabe? Podo inabuka. Jisas bormaimo i mina God ka kor ta di noro paduglkwa i plau dugo, yoba i Jisas bormaimo i mina ama God gumuglo mina ye du moglkwa ba ye aglke kor Jisas moko tedre, God Murubuglomo, yoko kaima ere wakai ere noro moglkwa i, ka kide di togwa mere yegl paugwa pre ye kaima yubun podo inabuka.
30Ana God yubun norabe diga i, ene prio. Nono Godno, nono ye pre kan erumga i, okna yegl dugwa, Yoba mabuno kide ta eraiglkwa i, nana ere te ikne edenagliwa. I na kogona pamiwe#10.30 Lo 32.35 dugwa. Te, ye kamo mina ama yegl dugwa, Yagl Kade moglkwa i, ye yobama ka tage tenabiwe#10.30 Lo 32.36 dugwa. 31Kor aimadi moglkwa God i, yoba ta si akenan, ye kudugl podo kaima gorabuka.
32Ana ene okna God abuglage koragle si togwa igne i ene mabuno siragl mere erikwa i, poglo di prio! Igne i, yoba ene yubun podo teigo, ene giugl prikwa ba ene adigl gigledi mogl pai meglkwa. 33Ege tau yoba gumuglnomugl ene ka kide di tedre, ere kide ere teigwa. Ege tau ye yoba pere yubun yegl teigo, ene yubun igwa yobamo i bogl si dakagl moglsre, ake ple di teigwa. 34Ye ene agroma tau si kane sigwa igne, ene agroma kane paigwa i, mitno goglsre, ere wakai ere teigwa. Te, ye ene taraglno kunogl i ede eigwa igne, ene gun yedre, pra we digwa. I siragl pre ene prikwa i, taragl wakai wakai okuo inamga i, makandigle taragl i win si tedre, aimadi kamin yenabedi prikwa.
35Ana okna ene mabuno yegl ersre, adigl gigledi meglkwa pre erme yoba ene ere kide ta ere tebi, ene pre mediglkwa i kide kodokre, God no ere wakai ere norabukra we di pre pai molo. I siragl pre ene yegl pre pai meglbi, ene topo podo okuo inaiglkwa. 36Ene kaima adigl gigledi moraiglkwa paugwa. I siragl pre God ene ta eraiglmedi prumere yegl, ene eribi, ye taragl wakai wakai ene tenagledi promis di te paduglkwa i, ene inaiglkwa.
37Ene prio! Nono kuri ta mun, Yoba ta unabuka paugwa i, sugl moglkre, unabuka.#10.37 Aisaia 26.20 38Te, God kamo dugwa i, yegl dugwa, Na yoba ta du mogl kodumedi kaniga i, ye pre medigl pai morabuka paugwa. Ba ye pre meduglkwa i ta kide kodinan, na kiana mina gun yeikragle#10.38 Habakuk 2.4 dugwa. 39Ba yoba pre mediglkwa i kide kodo, ye u kide eimere mere yegl, nono yegl ta moglkrumnedi prika. Nono pre medigl pai mun, u kide pikre, wakai moramga mere yegl munedi prika.
Currently Selected:
Ibru 10: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission