Ibru 11
11
Pre mediglkwa mabuno
1Nono pre medunga i, mabuno yegl paugwa, God taragl tau noragle dugwa i, nono gumuglno mina ta kankrumga ba ye kaima dumedi prisre, norabukra we di prumga. 2Te, kowano awano okna ibo meglkwa i, ye God kamo yegl mere pre mediglkwa pre God ye wakai kanugwa.
3Nono pre medunga pre nono pre kan erumga i, God ye ka dumara i mina taragl kane kane ere yomedi prumga. Taragl kane kane makandigle paigo, nono gumuglno mina kamga i, ta idre, taragl kane kane i ta beke yeikrukwa ba ye ka dumara mina ye plau digo, erme kamga.
Yoba okna ibo God pre mediglkwa
4Ana Abel okna moglkwa i, ye God pre meduglkwa pre ye tawa kuno ere yu togwa. Ye tawa togwa i, wakai yogo, agigle Kein tawa togwa i, wakai yeikrukwa. Ana ye pre meduglmara i pre God ye yagl du moglmiwe didre, ye tawa togwa i kuno erume dugwa. Te, Abel okna ibo goglkwa ba ye pre meduglkwa mabuno i mina ka di noro moglkwa mere yegl paugwa.
5Ana Enok ye God pre meduglkwa pre ye kor moglko, God ye gagie kia bogl i ede heven ogo, yoba okuo ye ta kankrikwa. Te, God kamo dugwa i, Enok ye makandigle moglkwa igne, God ye Enok wakai kanume#11.5 Oknayene Ibo 5.24 dugwa. 6Ana yoba ta God pre mediglkran, God ye wakai ta kankrabuka. I siragl pre yoba ta God moglmara mogl magigl edenagledi prabuka i, ye taragl suo erabuka. Ye God moglmedi pre mediglsre, te, ka kaima God dokumun, God topo wakai norabukra we di, ama pre medrabuka paugwa.
7Noa ye God pre meduglkwa pre God taragl tau plau dinabe dugwa igne, Noa God kuduglmo goglsre, ye ebie gagiglma gogl dinaiglmedi sip bekugwa. Ye nigl ta sugo, kankrukwa ba ye God pre meduglkwa pre bekugwa. Te, Noa pre meduglmara i mina ye makandigle yoba mudu meglkwa i, kide erimedi i nogugl edugo, God ye pre meduglmara i, yagl du moglmedi kanugwa.
8Abraham ye God pre meduglkwa pre God Ene ede dumo bage ta po! dugwa igne, ye God kamo duglo boglsre, ede ogwa. Ye dumo kor i ta kankrukwa ba God dumo i ene makanen yenabe dugo, ye prisre, ede ogwa. 9Ana Abraham pi God dumo makan ta ye tenagle dumara i mina plau dugwa igne, ye God kamo pre medigl moglsre, ye yoba pere makano mina moglsre, sel yugu ere kipai moglkwa. Te, Aisak ya Jekop God dumo makan i tenagle dugwa ba ye ama sel yugu mina ere kipai miurka. 10Ana Abraham sel yugu ere kipai moglkwa i, ye siti ta gigledi kaima yenabuka i mina okuo moragledi pre moglkwa. Siti i siragl mere yenabuka i, God yene pre epigl ersre, ere kei moglkwa.
11Ana Sara ama God pre meduglkwa. Ye kidagl yei kodugwa pre gak ta kuglkrabuka mere yegl paugwa ba God, ye gak ta kuratniwe di, promis erukwa i, ye kamo mina adigl morabukra we di prukwa pre God ye ake ple di togo, ye gak ta kuglkwa. 12Yegl pre yagl Abraham swara i mina yoba mere plau digwa. Ye kidagl yedre, gorabuka magigl erukwa mere yegl paugwa ba ye gawama okuo mogl wigwa i, kugl kuri mere kide paimere yegl, mere kide moglsre, pi kaugl mere yegl meglkwa.
13Ana yoba okna ibo meglkwa i, ye God pre medigl moglsre, geglkwa. Te, God ye taragl tau tenagle di paduglkwa i, ye makandigle meglkwa igne i ta ikrikwa ba ye eglke mogl, kan iro ede kanigwa mere yegl paugwa. Ye taragl tau okuo inaiglkwa i kandre, gun yeigwa. Te, ye ka ta di nogugl edigwa i, makandigle yoba moglkrumga ba dumo pere nem munga mere yegl pamiwe digwa. 14Ana yoba ka yegl mere ta digwa i, ye ka dimara i, ye dumono kaima ta dokigwa mere yegl i nogugl edigwa. 15Ana ene prio. Yoba okna ibo meglkwa i, ye dumo ta mogl, ede meda eimara i, poglo di pre ede ikne enamnedi pre eima, kuno eruko. 16Ba ye ede ikne enamnedi prikrikwa. Ye dumo ta wakai kaima yei, makandigle dumo egre atne edugwa i, inamnedi prikwa. Ye heven dumo ta inamnedi prikwa pre diga. Yegl pre yoba i ere mogl, God no Godno moglmiwe dinaiglkwa i, God agai ta goglkrukwa. I siragl pre God yene siti ta ye kipai moraiglmedi ere wakai ere togwa.
17-18Ana Abraham ye God pre meduglkwa pre God ye ta eran kanagledi ka di togwa igne, ye wam swara Aisak i, si gogl, God tawa tenagledi erukwa. God ye okna Aisak pre dugwa i, yegl dugwa, Ene gawanma mere kide moraiglme diga ikra we, Aisak swara wama ya gawama pre die#11.17-18 Oknayene Ibo 21.12 dugwa. Yegl dugwa ba Abraham God di tomere mere ye si goragledi erukwa. 19Abraham prukwa i, na wana si goglbo, God ye ere i kor edenabuka i, kuno erumedi prukwa. Te, ka ebrie mere yegl dinamga i, Aisak goglko, God ye Abraham te ikne edugwa mere yegl paugwa.
20Aisak ye God pre meduglkwa pre ye wam suo Jekop ya Iso di wakai yei tedre, siragl taragl ye miurara okuo plau dinabuka i, di pogl togwa.
21Jekop ye God pre meduglkwa pre ye goragledi erukwa igne, ye Josep wam suo di wakai yei tedre, bre i pi muglbomo mina tebe yei, magididre, God kagie kade togwa.
22Josep ye God pre meduglkwa pre ye goragledi erukwa igne, ye Israel yoba okuo dumo Isip kide kodinaiglmiwe di tedre, Na yobra dumo Isip i yei dinabiwa. Ene enaiglmara idre, ede pio dugwa.
23Moses nem mam suo God pre mediurka pre ye Moses kiurka igne, ye ba suota mere yegl, teke padiurka. I siragl pre ye gak wakai kaima ta moglmedi kandre, ye king lomo si bugl dinabrika i, ama kudugl ta goglkribrika.
24Moses ye God pre meduglkwa pre ye kade moglkwa igne, yoba ye Isip king abuglo wam moglmiwe dinaiglkwa i, ye mane dugwa. 25Ye Isip yoba bogl tadaglme eribi, ege sugunagle ta gun yenabuka i, mane didre, God yobama bogl yubun akie inamnedi prukwa. 26I siragl pre ye prukwa i, Isip yoba mige moni ya bonagana mere kan neigwa i, taragl kebra yomedi prukwa ba ye Krais pre yubun inabuka i, wakai panabedi prukwa. I siragl pre ye topo okuo inabuka i, poglo di prukwa.
27Ana Moses ye God pre meduglkwa pre ye ama Israel yoba auro i ede enan, Isip king dem kubrabuka i ye kudugl ta goglkre, auro i ede ogwa. Nono gumuglno mina God moglkwa i ta kankrumga ba Moses ye God siragl mere moglkwa i, kaima pre kan ersre, adigl gigledi mogl, kogon erukwa. 28Te, ye pre meduglmara i pre God ye Israel yoba oglo sinagle dugwa igne, ye God dumere mere Israel yoba yegl di togwa, Angelo ta wan u ikne ikne pidre, yoba wano komono si gorabuka i, ene wano komono ama si gogl dinabedi sipsip ya meme si gogl, bormaino yugu guglo mina egrio dugwa.
29Israel yoba ye God pre mediglkwa pre ye mudi nigl Retsi moglmara ede koglo eigwa igne, makan kugla dugwa ye egre ede eigwa. Ba Isip yoba ede suna wigwa igne, ye nigl nedre, geglkwa.
30Ana Israel yoba God pre mediglkwa pre ye ama dumo Jeriko wigwa igne, ye ege 7-pela de taun i kobuglo togl erimara egre winabo digo, kobuglo togl i, gurdi yage atne sugwa.
31Rahap, ye konbauna abu ta moglkwa i, God pre meduglkwa pre Israel yagl suo dumo Jeriko doko daka ere kanabugledi ubrika i, ye i yugugl edidre, ake ple di togo, okuo Jeriko yoba ye God kamo sedigwa i, geglkwa igne, ye ta goglkrukwa.
32Ana na yoba tau mere pre ama dinaglka ba ege ta yeikrukwa. Na Gideon ya Barak ya Samson ya Jepta ya Devit ya Samuel ya God kamo kep yoba okna meglkwa i pre mudu ta dibo, kuno erekrabuka. 33Ye God pre mediglkwa pre ye king tau kuda bogl tedre, yobuglo erikwa. Te, ye mabuno du erikwa. Te, God ye taragl tau tenagledi promis erukwa i, ye igwa. Te, ye laion drano si kegl digwa. 34Yoba okna ibo meglkwa i, ye pre mediglmara taragl yegl mere ersre, te, yoba ege tau doga podo ere gaglsre, ye gagl tege eramnedi erikwa igne, ye dekrikwa. Te, ege tau yoba bainet mina ye si goramnedi eriko, ye teke ede eigwa. Ye yobuglno paikrumara i, God yobuglo bogl togo, ye kuda mina yobuglo ersre, yugobuno pere pere meglkwa i, amino yobuglo ere teigo, ami i teke ede eigwa.
35Ana yoba okna ibo meglkwa i, ye pre mediglkwa pre God ye taragl kane kane ere togwa. Abu tau, gagroma geglkwa ba ye pre mediglmara i, God ye ere i kor edugo, meglkwa. Ba pre mediglkwa yoba okna meglkwa i, ye tau mere ama yubun igwa. Tau yoba si kane sidre, ye yegl di teigwa, Ene God pre mediglkwa i kide kodibi, ede meda enaiglmiwe digwa. Ba pre mediglkwa yoba i, ye yegl eraiglkwa i, mane digwa. I siragl pre ye prikwa i, pre medunga i ta kide kodokrumun, adigl u kor enamga igne, topo wakai kaima inamnedi prikwa. Yegl pre ye ede meda enakiuro, mane digo, yoba ye gagno giugl podo tedre, si geglkwa. 36Te, pre mediglkwa yoba tau yoba ye kenaglno sidre, duglnai sigwa. Te, tau si kane si i pi kane yugu edigwa. 37Tau, yoba kobuglo sidre, si geglko, tau yoba so idre, ogono nagino suna wom si bugl digo, tau bainet mina si geglkwa. Te, tau kuguglno gaglno ki ta manugo, ye sipsip nagino ya meme nagino keme ede wan meglkwa. Tau kaya mokna ya ki manugo, yoba ye ere kide ere teigo, ye yubun igwa. 38Ye dumo wau yomara ya muglo meglbi ki wan moglsre, kobuglo mur ya makan mur yomara atne kwi pai wan meglkwa. Pre mediglkwa yoba i, makadigle yoba meglmere mere yegl ta moglkrikwa. Ye mabunono wakai pai, makandigle yoba mabunono egre i atne edugwa.
39Ana yobamo i, ye mudu pre mediglmara i God wakai kanugwa ba God ye taragl tau tenagle dugwa i, ye kor meglkwa igne ikrikwa. 40Ye ikrikwa i, God okuo taragl wakai wakai nono noragle dumara i, akie idre, ame wakai dinaiglmedi prukwa pre tabre ta tekrukwa.
Currently Selected:
Ibru 11: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission