Ibru 12
12
Nono kan Jisas moglmara edinamga paugwa
1Yoba okna ibo pre mediglkwa i, mere kide mogl, nono mogl winabo didre, pre medramga mabuno i, i nogugl ede noriko, kamga. Yegl pre nono adigl gigledi mogl, God nono resis ta eraiglmedi padigl norukwa i, ere kodinamga paugwa. Taragl ta nono resis mina muku di dinaiglmedi erabuka taragl i, nono kide kodidre, tadaglme mabuno kigln mere yegl kogl paugwa i, nono si dinamnedi eramga paugwa. 2Te, nono kan Jisas moglmara swara iro edidre, muku dinamga paugwa. Nono pre medramga i, Jisas mabuno moglsre, ere kodinabuka ama moglkwa. Jisas okuo gun podo yenagledi prukwa pre ye agai podo goglsre, ede prak mina gorabuka i, siragl kebra yomedi pra we dugwa. Pra we didre, erme God ogo wo kra ame di moglkwa.
God ye gagiglma ere si di ake du edugwa
3Ana Jisas okna erumere i, ene poglo di prio. Tadaglme yoba ere mogl, Jisas kudamo ikne kaima moramnedi erikwa ba Jisas adigl gigledi mogl, pre wige erukwa. Ana Jisas erukwa i, ene poglo di pre meglbi, ene deno muduno mina oglka ta erekran, adigl gigledi moraiglkwa. 4Tadaglme mabuno no si atne ede dinabedi ene kuda mere yegl beglkwa ba ene kuda bogl pi bormaino suru edenaiglkwa pai moglkwa pre ene oglka ta erekrio.
5Ana God ye kamo mina ene deno muduno si gigle di tenagledi na gagrama yo dugwa i, ene kinano yom kana. Ye kamo i yegl dugwa,
Gagra yo, Yagl Kade ene ere si di ake du edenabuka i, taragl kebra yomedi prikro. Te, ye ene ka tenabuka i, ama kide prikro.
6I siragl pre Yagl Kade dem muduo togwa yobamo i, ye mabunono ake du ede tenabuka. Te, yoba ira ta na gagrama meglmedi kanugwa yobamo i, ye ere si di ake du edume#12.6 Ame Wakai Digwa 3.11-12
dugwa.
7Ana yubun ta ene meglmara unabuka igne i ene praiglkwa, God no mabunono ake du edenagledi erumedi prisre, adigl gigledi molo. Siragl pre God ene kanugwa i, na gagrama kra meglmedi kandre, ene ere si di yugwa. Ana nono kamga, nenoma mudu meglkwa i, ye gagroma ere si di igwa. 8Kuno yegl mere, God nono mudu si ake du edugwa ba ene ta ere si di ikran, ene pratnga, ye gagiglma meglmara suna i, na ta moglkriwa. Na konbauna gak mere yegl ta moliwedi pratnga. 9Ana nono nenoma makandigle meglkwa i prio. Nono gak munga igne, nenoma nono ere si di igo, nono ye kano prisre, mogl atne edumga. Mogl atne edumnere yegl, God nono kiano Neno moglkwa i kamo prisre, mogl atne edinamga i, taragl podo paugwa. Nono yegl erumun, kor wakai moramga paugwa. 10Nenoma makandigle meglkwa i, ye yene wakai primere, ege sugunagle nono mabunono ake du edinamnedi erikwa ba God nono ka kaima wakai moraiglmedi erukwa. Ye nono si ake du edenan, nono ye yoba du moglmere yegl moraiglmedi pre mabunono ake du edugwa.
11Ana God nono ta ere si di yugwa igne, nono deno muduno yubun dogo, kide prumga. Kide prumga ba okuo, nomane wakai imga. Nomane wakai idre, mabuno du bogl munga igne, deno muduno wida dugwa.
12Ana God yegl ere, nono ere si di yugwa pre ene ogono kaglno mir erabuka i pre wige ere, adigl gigledi mogl, 13konbauna du duglo bogl moraiglkwa paugwa.#12.13 Ame Wakai Digwa 4.26 Ene kaglno wagagl ta erekre, u wakai enabuka pre yegl eraiglkwa paugwa.
Nono God mokono tekramga paugwa
14Ana ene yoba mudu bogl deno muduno swara yenamnedi ersre, mabuno du panabuka i, duglo boramnedi erio. I siragl pre yoba mabuno du duglo bogl moraiglkwa yobamo i keme, ye Yagl Kade kan pogl sinaiglkwa.
15Ana ene meglmara suna i, yoba ta God yoko kaima ere wakai ere norukwa i ta kide kodinan, kide panabuka pre ene kan kun erio. Ede ta pare ede mitna pidre, mogo kide koglmere mere yegl, yoba ta God yoko kaima ere wakai ere norukwa i ta kide kodinan, yoba mere u kide enaiglkwa pre kan kun eraiglkwa.
16Ene meglmara suna i, yoba ta yagl abu ta bogl kunogl nebi, kide panabuka. Te, yoba ta Iso erumere yegl ere, God moko ta tenan, ama kide panabuka. Iso moglkwa i, ye komono moglsre, taragl wakai wakai inabuka nambamo i, kaya mokna ta erme keme nenabuka i pre topo boglkwa. 17Te, ene prikwa, Iso okuo nomane kor idre, ye nambamo ikne edenagledi prukwa ba God mane dugwa. Ye kai ersre, namba ikne edenagledi konbo dokugwa ba ye konbomo ta yeikrukwa.
18Okna ibo Israel yoba ede muglo Sainai mabunomugl eigwa ba ene erme muglo kor ta yomara wigwa. Muglo Sainai i, makadigle yogwa ba muglo meglbi ta yoba kankrikwa mabunomugl i, i mina ene wigwa. Israel yoba i, ede muglo Sainai wigwa igne, muglo ibo doga ta dogo, mim podo kide eruko, ir waga podo ugwa. 19Te, biugel ta boglko, ye prisre, God ka tau dugwa ama prikwa. Ye prikwa igne, ye kudugl gogl, God ka tau ama di noro dinabedi kamage yeigwa. 20I siragl pre God ka ta dugwa i, yegl dugwa, Yoba mo agl bugla pra, ta u muglo meglbi akenan, ene kobuglo mina si, ye si golo#12.20 Isip Kide Kodigwa 19.12-13 dugwa. Yegl dugo, Israel yoba kudugl podo geglkwa. 21Ye taragl tau kanigwa i, yoba kandre, kudugl goraiglkwa mere yegl paugwa pre Moses ama dugwa i, Na kudugl goglsre, ogona nagna nuglo dume dugwa.
22Ba ene ede muglo Saion udre, God kor aimadi moglkwa i dumomo, Jerusalem ta heven ibo yomara i, u kodigwa mere yegl paugwa. Dumo i, angelo mere kide kaima, nono ta keremun, kuno erekrabuka i, gun yei, makai si meglkwa. 23Te, heven ibo i, God gagiglma ye kagno heven bukmo mina paugo, ye ede okna eigwa meglkwa i, makai sigo, te God ye yoba mudu jasno moglkwa i moglko, erimara i, ede suna wigwa mere yegl paugwa. Te, heven ibo i, yoba ta du moglsre, u wakai pi kodigwa i, kiano bogl meglko, 24Heven ibo Jisas moglko, bormaimo ama yogwa. Abel goglkwa igne, ye bormaimo God Kein si gorabedi agle dugwa ba Jisas bormaimo nono mina si plai si edidre, ka wakai keme di moglkwa. Te, nono God bogl kuda ikne ikne munga ikra, promis kor ake ple di norabedi Jisas suna mogl, bo buko di norsre, deno muduno wida di inaiglmedi erukwa. Taragl mudu i, heven ibo yogo, ene heven ibo ede suna u kodigwa mere yegl paugwa.
25Ana God ene erme ka di te moglkwa i, ye mokono te dinamnedi kan kun erio. Moses okna makandigle mogl, Israel yoba ka gigledi di togo, yoba ye kamo i ta sedigwa igne i yubun keme igwa. Yegl pre yoba ta erme heven ibo moglsre, nono ka di norukwa i, kamo sedumun, yubun ta ikramnedi primo? Ta manabuka.
26God okna Israel yoba ka di togwa igne, ye ka dugo, dumo makan piga dugwa. Ba ye erme ka kaima ta di noro padiglsre, yegl dugwa, Na ege swara ta ama dumo makan ake piga didre, kamun mitna ama ake piga dinagle dugwa. 27Ana ye ege swara ta dumo makan ya kamun mitna ake piga dinagle dumara i mina ye i nogugl edugwa i, ye taragl tau ere yogwa piga dinabuka mere yegl paigwa i, okuo taragl tau piga dikrabuka i keme panaiglmedi taragl mudu ake piga didre, si dudu kodinabuka.
28Ana nono ede suna umgo, God nono kingno moglsre, suglno moglmara dumo i, ta piga dinan, kuno erekrabuka. Dumo i aimadi kamin yei pai morabuka pre nono God di wakai yei tenamga paugwa. Te, nono ye kuduglmo goglsre, ye pre i mitna ede, yene wakai ta kanabere mere ye kogonmo ere tenamga paugwa. 29I siragl pre nono Godno moglkwa i, doga ta taragl kane kane de tege erumere mere yegl, ye yobuglomo podo kide yegl paugwa#12.29 Lo 4.24 pre nono ye kuduglmo goramga paugwa.
Currently Selected:
Ibru 12: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission