Ibru 13
13
Ka kidine swara swarade i pre dugwa
1Ene agroma abaroma deno muduno tenaiglkwa mabuno i, ere pai molo. 2Te, yoba yogugl ere wakai ere teigwa mabuno i, kide kodokrio. Ene pre kodigwa, okna yoba tau yoba yogugl wigo, ere wakai ere tomnedi prikwa ba ye angelo wigo, ere wakai ere teigwa.
3Ene agroma abaroma tau kane yugu pai meglkwa i, no ye bogl akie kane pamga mere yegl pamiwedi prisre, ye pre molo. Te, agroma abaroma tau yoba ye ere kide ere te meglkwa i, nono ye bogl yoba swara munedi prisre, pre molo.
4Yagl abu bogl inaiglkwa mabuno pre mitna edio. Te marit ere kide ere dinamnedi kunogl nekrio. I siragl pre kumugl abai mo yagl abu ta ye yagl abu pere bogl kunogl nenaiglkwa i, God ye ka tage tenabuka.
5Ene mogl pai eraiglmara mige moni bubuno goglkrio. Ene taragl ta kan neigwa i, i pra kan nomnedi prio. I siragl pre God yene dra mina didre, Na ka kaima ene kide kodokre, na mokona ene ka kaima ta tekraluwe#13.5 Lo 31.6-8 ya Josua 1.5 dugwa. 6Yegl pre God nono suglno moglmedi pre gi didre, yegl dinamga paugwa,
Yagl Kade na ake ple di nare moglkwa
pre na kudugl ta goglkraglka.
Yoba ta na ere kide ere naraiglkwa i,
kuno ta erekrumiwe#13.6 Giglage 118.6
di, yegl dinamga.
7Ana yoba tau ene suglno moglsre, God kamo ene beke teigwa ta moraiglkwa i, ye mabunono i, mogo wakai siragl mere koglkwa i, enene kanigwa pre ene ye mabuno erikwa i poglo di prisre, pre medigl meglmere yegl ene ama pre medigl molo.
8Jisas Krais ye eduedi moglmere yegl, erme moglsre, aimadi kamin ama yegl mere mogl pai morabuka. 9Yegl pre yoba ka kor kane kane ta yu didre, ene gudu i ede eglke enamnedi eribi, ene ye kano prikrio. God nono yoko kaima ere wakai ere norukwa ka i, ene deno muduno mina yobuglo bogl tenan, wakai panabuka. Ba yoba tau kaya mokna yegl yegl ta nekrio dinaiglkwa i, ene prikrio. Yoba ka yegl duglo beglkwa i, ye ta ake ple di tekrukwa.
10Ana tawa teigwa yoba ye sel yugu mina kogon erikwa i, yoba tau tawa i pi teigwa igne, ye mie tau gagl tege ersre, tau yene nedre, erikwa. Ba nono tawa bogl pere ta mina taragl wakai wakai imga i, ye ta ibi, kuno erekrabuka.
11Ana tawa teigwa yoba bitno moglkwa i ye yoba tadaglmeno si bi dinagledi agl bugla tau, si goglsre, bormaino kogl i pi dumo mawagl podo pamara God togwa. Ba agl bugla ogono nagino i, yoba i pi meda, yugu togl ta yeikrumara gaiglkwa. 12Yegl gaiglkwa pre Jisas ye yene bormaimo mina yoba ere i du edenagledi giugl prukwa i, ye togl meda pidre, giugl prukwa. 13Yegl pre nono ama ye bogl akie togl meda mere yegl pidre, moramga paugwa. Te, yoba ye kiam sidre, gauglmo erimere yegl, nono ama yubun yegl inamga paugwa. 14I siragl pre nono erme makandigle munga i, aimadi kamin moramga siti i ta yeikrukwa ba nono siti ta okuo unabuka i mina kipai moramnedi sugl munga.
15Ana nono Jisas kagie i mina God ege ege kagie kade tenamga paugwa. Nono yegl eramnara i mina ofa ta God tomga mere yegl panabuka. Ofa i, nono drano mina ye di wakai yei tenamga pre diga. 16Te, ene ama yoba pere ere wakai ere tedre, ye ake ple di tenamnedi taragl tau teigwa mabuno i, kide kodokrio. Ene mabuno yegl erimara i mina, God ofa ta ama teigwa mere yegl paugo, God ofa i wakai kanugwa.
17Ana yoba tau ene pre mediglkwa yoba suglno meglkwa i, ene wakai moraiglmedi ake ple di tedre, suglno meglkwa. Te, ye okuo kogon siragl mere erikwa i, God di pogl tenaiglkwa paugwa. Yegl pre ene ye moraiglmara mogl atne edidre, ye kano prio. Ene mogl atne edibi, ye gun yei, kogon eribi, wakai panabuka. Ba ene yegl ta erekribi, ye kide prisre, kogon eribi, ene taragl wakai ta ikre, ame wakai dikraiglkwa.
18Ana no pre gi dumga i, no God gumuglo mina aglau ta erekrumnedi pre gi dumga. Te, no mabuno kane kane ta eramga i, mabuno wakai keme eramnedi prumga pre ene kamage ere noribi, i wakai panabuka. 19Te, na taragl podo ta pamedi prika i, ene kamage ere naribi, na ene meglmara tabre ede ikne unagledi prika.
Ka dudumara
20-21Ana ka las dinaglka i, yegl dinariwa. God ene deno muduno wida di inaiglmedi ersre, nono Yaglno Kade Jisas ere i kor edugwa. Ye Jisas yobuglomo mina ene yobuglo bogl tenan, mabuno wakai kane kane, ye wakai kandre, ene eraiglmedi prukwa i, ene kaima eraiglmedi erabiwa. Jisas sipsip sugl moglkwa yagl kade kaima moglkwa. Te, promis kor aimadi kamin panabedi ye bormaimo suru edumara i mina nono ye kagie kade aimadi kamun te pai moramga. Kaima.
22Agrama abarama wagle, ene deno muduno si gigle di tenagledi ka olto ta boglkrika pre sugunagle ta boglmere ene wakai ere kinano gudu praiglmedi kamage yeiga.
23Ana na ka ta ene di tebo, ene praiglmedi prika i, yegl paugwa, nono agro Timoti kane yugu paugwa i, ye i meda edigwa. Ye ere mogl, tabre na moglmara unan, na ene meglmara unaglka igne, ye bogl akie u ene kanabuglka.
24Ana ene suglno yoba ta moraiglkwa i ya te, God yobama mudu moraiglkwa i, ene no drano idre, wakai we di teo. Te, ene agroma abaroma kantri Itali meglkwa i, ene ama wakai we di teigwa. 25God ene mudu yoko kaima ere wakai ere te pai morabedi prika.
Currently Selected:
Ibru 13: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission