Jems 1
1
Ka bre
1Na Jems, God ya nono Yaglno Kade Jisas Krais niglno kogono yagl ta moglka i, pepa magigl i boglka. Na pepa boglka i, ene Israel yoba yugobuno 12-pela moglsre, uglo koglo koglo bage bage meglkwa i, bogl teiga. Na ene wakai we di teiga.
Yubun kane kane ugwa i, nono si gigle di norabuka pre ugwa
2Agrama abarama wagle, yubun kane kane ene meglmara ta plau dinan, ene gun keme yeio. 3I siragl pre ene pre kan erikwa i, yubun ugwa i, ene pre mediglkwa gigle dumo mo di, ere kanagledi ugwa ba ene ta yage sikribi, ene pre mediglkwa i, si gigle di togwa mere yegl paugwa.
4Si gigle di tenan, ene yake ede pi yoba mere yegl moglsre, kaglno mina adigl moraiglkwa. Kaglno mina adigl meglbi, ene God kogonmo ta eraiglmara i, ege swara ta yobuglno dokokrabuka pre ibun unabuka i, ene kanige erio.
Yoba nomane wakai ta inagledi pran, ye kamage erabuka paugwa
5Ana ene meglmara swarano ta nomane wakai paikran, nomane wakai pre God agle di pro! God agle di pitn, ye ene nomane wakai tenabuka. I siragl pre yoba God agle di prikwa i, ye ka tekre, yoba mudu taragl wakai wakai norukwa yagle moglkwa. 6Ba ene God agle di pratnga igne, ene ye pre medigl moglsre, nomane suo suo ikro. I siragl pre yoba ta kina suo yogwa i, ir ugo, mudi nigl pebigl di ede meda, suna omere mere yegl, ye nomane kane kane idre, adigl gigledi moglkrukwa. 7-8Yoba yegl ta morabuka i, ege ege kina suo yogo, ege mere yage sugwa ta moglkwa pre ye Yagl Kade agle di prabuka igne, na Yagl Kade di teimere yegl ta ere narabiwe di prikrabuka paugwa.
Goduglme ya yoba taragl mere kan neigwa pre dugwa
9Ana nono agro goduglme ta morabuka i, God na ake mitna edumedi prisre, gun yenabuka paugwa. 10Ba agro ta mige moni mere kan nenabuka i, God ye ta ake atne edenan, gun yenabuka paugwa. I siragl pre kugl kwie ege sugunagle ta padre, tabre goglmere yegl, agro i ama ege sugunagle yegl moglsre, goraglka pamedi prabuka paugwa. 11Ade ede mitna ogo, niga podo dugwa igne, kugl tabre yamunugo, kwiemo ama yage si, goglko, yoba okuo wakai kankrimere mere yegl, yoba ta mige moni mere kan nenabuka i, ye kogon kane kane ere morabara i, ere kodokre, tabre gorabuka.
God yoba tadaglme eraiglmedi ake nu sikrukwa
12Yoba ta yubun mina adigl gigledi morabuka i, ye gun yenabuka paugwa. I siragl pre ye wakai erukwa pre God ye wakai erumedi kandre, topo wakai tenabuka. Topo i, king bitno gagl mere yegl yogwa, kagie kor kaima meglkwa bitno gagl we digwa. Yoba ta deno muduno God teigwa i, God ye topo yegl tenagledi promis ere kodugwa.
13Ana yoba ta tadaglme ye dem muduo mina pogglau boran, ye God di boglsre, God na tadaglme eratnedi erumiwe di, yegl ta dikrabuka paugwa. I siragl pre God moglkwa i, mabuno kide ta ye dem muduo mina pogglau boglkruko, te ye yoba swara ta mabuno kide erabedi erekrukwa. 14Ba mabuno kide yoba swara swarade deno muduno mina pogglau boglkwa igne, ye yene mabuno kide gun yei teigwa pre ye nomane kide idre, yage sigwa. 15Ana yoba mabuno kide gun yei teigwa igne, ye pre moglsre, okuo tadaglme erikwa. Te, tadaglme ere ede eigwa igne, geglkwa mabuno ama ede nogugl ugwa.
16Agrama abarama wagle, na dena muduna suna meglkwa i, yoba ta ene bakagl te dinaiglmiwa, ene kan kun erio. 17Nono taragl wakai kane kane ta imga i, heven ibo yedre keme ede atne wigwa. Neno Kade, ye taragl kane kane kamin mitna ibo pai, abuglage sinaiglmedi ere yogwa yagle moglkwa i, ye taragl wakai keme norukwa. Nono kamga, ade ede wogwa igne, taragl kwiano ede olto sugunagle ogo, kamga. Ba God yegl ta moglkrukwa. Ye moglmere mogl pai moglsre, taragl wakai keme norukwa. 18God okna yene wakai prumere ere mogl, ye kamo kaima i mina nono ere i kor edugo, erme nono ye taraglmo mere yegl munga. God taragl kane kane ere yogwa i, okuo u wakai pidre, yene taraglmo yenabere mere yegl, nono erme kuade ede okna pidre, God taraglmo mere yegl mogl kodumga.
God kamo prisre, duglo boramga paugwa
19Ana agrama abarama wagle, na dena muduna suna meglkwa i, ene prio! Ene mudu mabuno ta eraiglkwa paugwa i, yoba pere ka dinaiglkwa i wakai ere kinano gudu praiglkwa ba ene tabre di ikne edekrio! Te, ene deno tabre kubrokraiglkwa paugwa. 20I siragl pre yoba deno kubrikwa igne, God mabunomo du paugwa i, ta i nogugl edekrikwa.
21Yegl pre mabuno deglbi yenabuka ya mabuno kide tau pai morabuka i, ene kide kodidre, mogl atne ede, God kamo ta ene deno muduno suna padigl te kodugwa i, duglo boraiglkwa paugwa. God kamo swara i, ene ere inan, ene kor moraiglkwa i, kuno erabuka.
22Ana ene God kamo praiglkwa ba dumere ta erekribi, ene enene bakaiglkwa mere yegl panabuka pre ye dumere eraiglkwa paugwa. 23-24I siragl pre yoba ta God kamo prisre, dumere erekran, ye yoba ta yene gumano drano glas mina kandre, ede bage ta eigwa igne tabre torua sumere yegl mere moglkwa. 25Ba yoba ta lo wakai kaima ta paugwa, nono kane pai dinaiglmedi ake ple di norukwa lo i, tabre kiurekrabuka ba wakai ere prisre, duglo bogl moran, ye kogon erabara i mina God ere wakai ere tenabuka.
26Ana yoba ta ere mogl, ka mabuno prie dinabuka ba ye dra sugl wakai moglkre, ka kide di moran, ye nomanemo mina ye yene bakaglkwa mere yegl paugwa. Ye ka mabuno prukwa i, u yoko kaima ogwa. 27Ka mabuno prikwa yoba mabuno kaima boraiglkwa i yegl mere paugwa, yoba ta gak mua ya abu werai yubun imara pi kandre, ere wakai ere tedre, mabuno kide makandigle yoba erikwa i, ye ta ere dinamnedi eraiglkwa i, Neno Kade God gumuglo mina ye ka prikwa i du kaima paugo, aglauno ta paikrumedi kanugwa.
Currently Selected:
Jems 1: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission